Masalimo 69:1-36
Kwaku yo walongozga sumu. Sumu iyi yishuniki pa “Maluŵa.” Sumu yaku Davidi.
69 Nditaskeni yimwi Chiuta, pakuti maji ngapenja kundibaya.+
2 Ndabira mumawulambwi ngandimba mo mulivi malu ngakulama.+
Ndasere mumaji ngandimba,Ndipu msinji wamweza wandipeye kutali.+
3 Ndavuka kudaniriza;+Kukhosi kwangu kwachita bambawu.
Masu ngangu ngavuka po ndilindizga Chiuta wangu.+
4 Ŵanthu wo atinditinkha kwambula chifukwa+Mbanandi ukongwa kuluska sisi la kumutu kwangu.
Ŵanthu wo akhumba kundibaya,Ndipuso arwani ŵangu wo mbaryarya* mbanandi ukongwa.
Ndinguchichizgika kupereka chinthu cho ndinguba cha.
5 Yimwi Chiuta, uzereza wangu mutiwuziŵa,Ndipu mulandu wangu ngwakubisika cha kwaku yimwi.
6 Ŵanthu wo alindizga yimwi angachitanga soni cha chifukwa chaku ini,Yimwi Ambuya Fumu Yikulu, Yehova wa mizinda.
Ŵanthu wo atikupenjani angalengesekanga cha chifukwa chaku ini,Yimwi Chiuta waku Isirayeli.
7 Ŵanthu atindinena chifukwa chaku yimwi;+Soni zabenekere chisku changu.+
8 Ndaja nge mulendu kwa abali ŵangu,Kweniso nge munthu waŵaka pakati pa ŵana ŵa ama.+
9 Phamphu la panyumba yinu landirya,+Ndipu mazu ngakunyoza nga ŵanthu wo atikunyozani ngawiya ini.+
10 Ndati ndajiyuyuwa ndi kufunga,*Ŵanthu angundinena.
11 Pa nyengu yo ndinguvwala vigudulu,Ndinguja chinthu cho yiwu achinenanga.*
12 Ŵanthu wo aja pageti la tawuni ajaliya ŵaka kunena ini,Ndipu aloŵevu atindinena mu sumu zawu.
13 Kweni pempheru langu lifiki kwaku yimwi,Yimwi Yehova, pa nyengu yakuzomerezeka.+
Mu chanju chinu chikulu chambula kumala yimwi Chiuta,Ndimukeni ndi ntchitu zinu za utaski zambula kukayikisa.+
14 Nditaskeni ku vimawulambwi;Mungazomerezanga cha kuti ndibili.
Nditaskeni ku ŵanthu wo atinditinkhaKweniso ku maji ngandimba.+
15 Mungazomerezanga cha kuti maji ngakusapaliya ngo ngatchimbiya ngandipeyi,+Pamwenga kuti ndimba yindimezi,Kweniso kuti chisimi* chindibenekere.+
16 Ndimukeni yimwi Yehova, pakuti chanju chinu chambula kumala ntchamampha.+
Nding’anamukiyeni mwakukoliyana ndi lisungu linu likulu,+
17 Mungamubisanga chisku chinu cha mteŵeti winu.+
Ndimukeni mwaliŵi, pakuti nde mu suzgu.+
18 Zani kufupi ndi ini ndipu nditaskeni;Ndiwomboni chifukwa cha arwani ŵangu.
19 Yimwi muziŵa kunyozeka kwangu, soni zangu kweniso kuyuyulika kwangu.+
Arwani ŵangu wosi mutiŵawona.
20 Mazu ngakunyoza ngandipweteka mtima, ndipu chilonda chaki ntchakuti chingapo cha.*
Ndalindizganga kuti ŵanthu andilengiyengi lisungu, kweni pengavi chinanga njumoza,+Ndakhazanga kuti anyaki andipembuzgengi kweni ndingusaniya weyosi cha.+
21 Kweni mumalu mwa chakurya, angundipaska poyizoni,*+Ndipu ndati ndavwa nyota, angundipaska viniga* kuti ndimwi.+
22 Thebulu lawu lisambuki chiŵana chawu,Ndipu chuma chawu chisambuki chisali.+
23 Masu ngawu ngachiti mdima kuti aleki kuwona,Ndipu viwunu vawu vinjekeme kwambula kulekeza.
24 Apunguliyeni ukali winu,Ndipu ukali winu wakukole uŵawiyi.+
25 Msasa wawu* usambuki mahami;Mumahema ngawu mungajanga munthu weyosi cha.+
26 Pakuti yiwu atchimbiza munthu yo yimwi mwamulanga,Ndipu alutirizga kukonkhoska maurwirwi nga ŵanthu wo yimwi mwaŵapweteka.
27 Sazgiyanipu mulandu pa milandu yawu,Kweniso angasaniyanga chigaŵa chechosi cha mu urunji winu.
28 Mazina ngawu ngasisitiki mubuku la ŵanthu amoyu,*+Kweniso angalembekanga cha pamundandanda wa ŵanthu arunji.+
29 Kweni ini ndapwetekeka ndipuso nde mu urwirwi.+
Yimwi Chiuta, nthazi zinu zakutaska zindivikiliyi.
30 Ndimbengi sumu zakuthamika zina laku Chiuta,Ndipu ndimukuzgengi mwakumuwonga.
31 Venivi vimukondwesengi ukongwa Yehova kuluska ng’ombi yinthulumi,Kuluska tholi* linthulumi lo le ndi masengwi ndi viphundulu.+
32 Ŵanthu akufwasa awonengi venivi ndipu akondwengi.
Yimwi mwaŵanthu mupenja Chiuta, mitima yinu yisisipuliki.
33 Pakuti Yehova wavwisiya akavu,+Kweniso waŵajowongi cha ŵanthu ŵaki wo akoleka ukapolu.+
34 Kuchanya ndi charu chapasi vimuthamiki,+Kweniso nyanja ndi vosi vo vitenda mwenimo.
35 Pakuti Chiuta wataskengi Ziyoni+Wazengengi so matawuni nga ku Yuda,Ndipu yiwu ajengi mwenimo kweniso chijengi chawu.*
36 Mphapu ya ateŵeti ŵaki yichiharengi,+Ndipu wo atanja zina laki+ ajengemu.
Mazu Ngam'mphata
^ Pamwenga kuti, “Ŵanthu wo mbarwani ŵangu kwambula chifukwa.”
^ Yapa pangafwatulikiya so kuti, “Pa nyengu yo ndinguliya ndipuso ndingufunga.”
^ Mazu ngaki chayingu, “Ndinguja nthanthi kwaku yiwu.”
^ Pamwenga kuti, “zenji.”
^ Pamwenga kuti, “ndipu ndisoŵa chakuchita.”
^ Pamwenga kuti, “chakume cha poyizoni.”
^ Viniga ntchakumwa chakunthyanthyama cho chipangika kutuliya ku vinyu pamwenga ku vakumwa vinyaki vakuloŵeresa.
^ Pamwenga kuti, “Msasa wawu wa mpanda.”
^ Pamwenga kuti, “mubuku la umoyu.”
^ Tholi ndi mwana wa ng’ombi.
^ Kung’anamuwa charu.
