Uthenga Wamampha wo Ukulembeka ndi Mateyu 14:1-36
14 Pa nyengu yeniyo, Herodi yo walamuliyanga chigaŵa* wanguvwa vakukwaskana ndi Yesu,+
2 ndipu wangukambiya ateŵeti ŵaki kuti: “Mwenuyu ndi Yohane Mubatizi. Iyu wakuyuskika, ndichu chifukwa chaki we ndi nthazi zakuchitiya vakuziziswa.”+
3 Herodi* wanguko Yohane, wangumumanga ndi kumuponya mujeri chifukwa chaku Herodiya muwolu wa mku waki Filipu.+
4 Pakuti Yohane wamukambiyanga kuti: “Ntchinthu chambula kwenere kuti umuto.”+
5 Kweni chinanga kuti wakhumbanga kumubaya, wawopanga ŵanthu chifukwa awonanga kuti Yohane ndi mchimi.+
6 Kweni achikondwere zuŵa la kuwa+ kwaku Herodi, mwana munthukazi waku Herodiya wanguvina pa phwandu lo, ndipu wangumukondwesa ukongwa Herodi+
7 mwakuti wangumulayizga mwakulapizga kuti wamupaskengi chechosi cho wangapempha.
8 Wati wapangizgika ndi anyina, mwana yo wangukamba kuti: “Ndipaskeni mutu waku Yohane Mubatizi mumbali.”+
9 Chinanga kuti fumu yenga ndi chitima, kweni pakuti yingulapizga, kweniso chifukwa cha ŵanthu wo yaryanga nawu,* yingulamula kuti amupaski mutu wo.
10 Sonu yingutuma munthu kuti wakadumuwi mutu waku Yohane mujeri.
11 Munthu yo wanguza nawu mutu waku Yohane mumbali ndipu unguperekeka ku msungwana yo, iyu wanguchiwupereka kwa anyina.
12 Pavuli paki, akusambira aku Yohane anguza kuzituzgapu thupi laki ndi kuchiliŵika mumuwunda; ndipu anguluta kwaku Yesu kuchimukonkhoske vo vinguchitika.
13 Yesu wati wavwa venivi, wangutuwaku kweniko, wangukwera boti ndi kuluta kumalu ngambula ŵanthu kuti wakaje kwakuyija. Kweni chigulu cha ŵanthu chati chaziŵa, chingumulondo wapasi kutuwa mumatawuni.+
14 Wati wafika mulikumba,* wanguwona chigulu cha ŵanthu ndipu wanguŵalenge lisungu+ kweniso wanguchizga wo atamanga.+
15 Kweni chakumazulu akusambira ŵaki anguza kwaku iyu ndi kumukambiya kuti: “Malu nganu kuja ŵanthu cha ndipu nyengu nayu yamala, akambiyeni ŵanthu kuti aluti mumizi akajiguliyi chakurya.”+
16 Kweni Yesu wanguŵakambiya kuti: “Palivi chifukwa chakuti alutiyi, kweni yimwi ndimwi muŵapaski chakurya.”
17 Yiwu angumukambiya kuti: “Tilivi chakurya chechosi kunu, kweni te ndi viŵandi vinkhondi ndi somba ziŵi pe mbwenu.”
18 Yesu wanguŵakambiya kuti: “Ndipaskeni kunu.”
19 Ndipu wangukambiya chigulu cha ŵanthu kuti chije pa uteka. Pavuli paki wanguto viŵandi vinkhondi ndi somba ziŵi, wangulereska kuchanya ndi kupemphera+ ndipu wangumenya viŵandi vo ndi kupaska akusambira ŵaki, ndipu akusambira wo angupaska chigulu cha ŵanthu.
20 Mwaviyo, wosi angurya ndi kuguta, pavuli paki anguyola vibanthu vakujaku ndipu vinguzaza masokola 12.+
21 Ŵanthu wosi wo angurya ŵenga anthulumi 5,000 kwambula kuŵerengiyaku anthukazi ndi ŵana.+
22 Sonu mwaliŵiliŵi, wangukambiya akusambira ŵaki kuti akweri boti, adanjiyepu ndi kuluta kusirya linyaki la nyanja, kweni iyu wangujaliya kuti wakambiyi ŵanthu kuti akengi.+
23 Wati wakambiya ŵanthu kuti akengi, wangukwera kuphiri kuchipemphera.+ Kuchifipa wengaku yija kweniko.
24 Pa nyengu iyi, boti lenga kutali ukongwa ndi mtunda,* ndipu lasuzgikanga kwenda chifukwa cha mayiŵa pakuti alutanga ko kwatuliyanga mphepu.
25 Kweni mu ulinda wachinayi* wanguza kwaku yiwu wachiyenda panyanja.
26 Akusambira ŵaki ŵati amuwona wachiyenda panyanja, angutimbanyizgika ndipu anguti: “Ndi malotu kwali!” Ndipu angudaniriza chifukwa cha mantha.
27 Kweni nyengu yeniyo, Yesu wanguŵakambiya kuti: “Khwimani mtima! Ndini, mungawopanga cha.”+
28 Peturo wangukamba kuti: “Ambuya, asani ndimwi nadi, ndilamuleni kuti ndiyendi pamaji ndizi kwaku yimwi.”
29 Iyu wanguti: “Zanga!” Ndipu Peturo wangusika muboti ndi kwamba kwenda pamaji kuluta ko kwenga Yesu.
30 Kweni wati wawona chimphepu wangutenthema. Iyu wangwamba kubira ndipu wangudaniriza kuti: “Ambuya, nditaskeni!”
31 Nyengu yeniyo, Yesu wangutambasuwa janja laki ndi kumuko, ndipu wanguti: “Wamunthu wachivwanu chimana yiwi, ntchifukwa wuli ungwamba kukayika?”+
32 Ŵati akwera muboti, chimphepu chingugowoka.
33 Wo ŵenga muboti angumujikamiya ndipu anguti: “Ndimwi nadi Mwana waku Chiuta.”
34 Pavuli paki, yiwu anguyambuka nyanja ndipu angufika kucharu cha Genesareti.+
35 Ŵanthu a kweniko, ŵati amuziŵa angutuma uthenga muvigaŵa vosi va charu cho, ndipu anguza ndi ŵanthu wosi wo atamanga.
36 Yiwu angumuŵeyere kuti akoku ŵaka mphonji za laya laki lakubwalu,+ ndipu wosi wo azikonga, achiriyanga limu.
Mazu Ngam'mphata
^ Mazu ngaki chayingu, “tetiraki.”
^ Uyu ndi Herodi Antipasi. Wonani Mazu ngo Ngakonkhoskeka.
^ Pamwenga kuti, “wo yinguyegeme nawu limoza pathebulu.”
^ Pamwenga kuti, “mumphepeti mwa nyanja.”
^ Mazu ngaki chayingu, “masitadiya nganandi kutuliya kumtunda.” Sitadiya yimoza yiyanana ndi mamita 185 (mafiti 606.95).
^ Kwamba cha mu ma 3 koloku matandakucha mpaka cha mu ma 6 koloku mlenji.
