Numeri 24:1-25
24 Balamu wati wawona kuti vakondwesa* Yehova kuti Ayisirayeli atumbikiki, wanguluta so cha kuchiwombeza kuti Ayisirayeli apwetekeki.+ Mumalu mwaki, wangung’anamuka ndi kulereska kuchipululu.
2 Balamu wati wayunuska chisku chaki ndi kuwona Ayisirayeli ŵe mumahema ngawu mwakukoliyana ndi mafuku ngawu,+ mzimu waku Chiuta unguza paku iyu.+
3 Pavuli paki, wangukamba nthanthi yakuti:+
“Mazu ngaku Balamu mwana munthulumi waku Beyori,Ndipuso mazu nga munthu yo masu ngaki ngajulika,
4 Mazu nga munthu yo watuvwa mazu ngaku Chiuta,Yo wanguwona chiwona cha Wanthazizosi,Mweniyo wasindama pasi ndi masu ngaki ngakujulika. Iyu watiti:+
5 Hati kutowa mahema ngaku, yiwi Yakobe,Malu ngaku ngakujamu, yiwi Isirayeli!+
6 Mahema ngo ngato malu ngakulu nge madambu,*+Nge minda ya mumphepeti mwa maji,Nge aloyi yo Yehova wapanda,Nge vimiti va sidara* va mumphepeti mwa maji.
7 Maji ngasuluwa muviyaŵi vaki viŵi vachikopa,Ndipu mbewu* yaki yapandika mumphepeti mwa maji nganandi.+
Fumu yaki+ nayu yiŵengi yanthazi kuluska Agagi,+Ndipu ufumu waki wazamukwezeka.+
8 Chiuta watimutuzga mucharu cha Ijipiti;Iyu we nge masengwi nga ng’ombi yamudondu* kwaku yiwu.
Iyu wamezengi mitundu ya ŵanthu wo atimukandirizga,+Ndipu wakukutengi viwanga vawu, waŵanangengi ndi mivi yaki.
9 Iyu wajikama pasi, wagona pasi nge nkharamu,Ndipu nge nkharamu, ndiyani yo wangayese dala kumuyuska?
Ŵanthu wo atimutumbika, atumbikika,Ndipu wo atimutemba, atembeka.”+
10 Sonu Balaki wangukwiyiya Balamu. Ndipu Balaki wangumba manja ngaki mwachipongu ndi kukambiya Balamu kuti: “Ndingukudana kuti uzinditembe arwani ŵangu,+ kweni waŵatumbika katatu yaka.
11 Sonu luta kunyumba kwaku sonu viyo. Ndakhumbanga kuti ndikutumbiki,+ kweni awona! Yehova wachitiska kuti uleki kutumbikika.”
12 Balamu wangukambiya Balaki kuti: “Asi mathenga ngo ungutuma ndingungakambiya kuti,
13 ‘Chinanga Balaki wangandipaska nyumba yaki yakuzaza siliva ndi golidi, ndingachita chechosi cha mu khumbu langu* chakupambana ndi dangu laku Yehova, kwali ntchamampha pamwenga chiheni. Ndamulongoro vo Yehova wakundikambiya pe mbwenu’?+
14 Sonu ndiluta ku ŵanthu amtundu wangu. Ayiza kuti ndikukambiyi vo ŵanthu yaŵa azamuchitiya ŵanthu amtundu waku kunthazi.”*
15 Sonu Balamu wangukamba nthanthi yakuti:+
“Mazu ngaku Balamu mwana munthulumi waku Beyori,Ndipuso mazu nga munthu yo masu ngaki ngajulika,+
16 Mazu nga munthu yo watuvwa mazu ngaku Chiuta,Ndipuso munthu yo we ndi zeru za Wapachanya Limu,Iyu wanguwona chiwona cha WanthazizosiPa nyengu yo wangusindama ndi masu ngaki ngakujulika. Iyu watiti:
17 Ndimuwonengi, kweni sonu cha;Ndimulereskengi, kweni pambula kuswera cha.
Nyenyezi+ yituwengi mwaku Yakobe,Ndipu nthonga+ ya ufumu yituwengi mwaku Isirayeli.+
Iyu waswengi chisku chaku Mowabu+ kwambula kutondekaNdipuso waswengi mabwaza nga ŵana wosi anthulumi achimtimbaheka.
18 Edomu wajengi chihara,+Seiri+ wajengi chihara cha arwani ŵaki,+Pa nyengu yo Isirayeli walongo chiganga chaki.
19 Mwaku Yakobe mwazamutuwa munthu yo wazamuthereskanga,+Ndipu iyu wazamunanga weyosi yo wapona mutawuni yo.”
20 Wati wawona Aamaleki, wangulutirizga kukamba nthanthi yaki, ndipu wanguti:
“Aamaleki ŵenga akwamba pa ŵanthu amitundu yinyaki,+Kweni pakumaliya, azamumaliya limu.”+
21 Wati wawona Akeni,+ wangulutirizga kukamba nthanthi yaki ndipu wanguti:
“Malu nginu ngakujapu ngakuvikilirika, ndipu malu nginu ngakujapu nge pajalawi.
22 Kweni munthu munyaki wawotchengi Kayini.*
Kumbi kwaja nyengu yitali wuli kuti ŵanthu a ku Asiriya akutole ku ukapolu?”
23 Iyu wangulutirizga kukamba nthanthi yaki, ndipu wanguti:
“Hati ini! Ndiyani yo waponengi asani Chiuta wachita venivi?
24 Sitima zizengi kutuliya mumphepeti mwa nyanja ku Kitimu,+Ndipu zazamusuzga charu cha Asiriya,+Ndipuso zazamusuzga Ebere.
Kweni iyu nayu wazamumaliya limu.”
25 Pavuli paki, Balamu+ wangusoka ndi kuwere kwawu. Balaki nayu wanguwere kwawu.
Mazu Ngam'mphata
^ Mazu ngaki chayingu, “ve umampha mu masu mwaku.”
^ Yanga ndi madambu ngo ngaja ndi maji mu nyengu ya vuwa pe.
^ Vimiti ivi viyananaku ndi vimiti va payina ndipu kali vasanirikanga ukongwa ku Lebanoni.
^ Pamwenga kuti, “mphapu.”
^ Wonani Mazu ngo Ngakonkhoskeka.
^ Mazu ngaki chayingu, “chakutuliya mumtima mwangu.”
^ Pamwenga kuti, “pa umaliru wa mazuŵa.”
^ Kung’anamuwa ŵanthu amtundu wa Akeni.
