Yeremiya 29:1-32
29 Yanga ndi mazu nga mukalata yo mchimi Yeremiya wangutumiza kutuwa ku Yerusalemu kuluta ku ŵara wosi pakati pa ŵanthu wo angutoleke ku ukapolu, asembi, achimi kweniso ŵanthu wosi wo Nebukadinezara wanguŵato ku Yerusalemu ndi kuluta nawu ku ukapolu ku Babiloni.
2 Yeremiya wangutumiza kalata yeniyi, Fumu Yekoniya,+ anyina a fumu,+ nduna, alongozgi akuzirwa a ku Yuda ndi ku Yerusalemu, ŵanthu alusu kweniso akusula visulu* ŵati atuwaku ku Yerusalemu.+
3 Iyu wangutumiza kalata yeniyi kuziya mwaku Elasa mwana waku Shafani+ kweniso Gemariya mwana waku Hilikiya, wo Zedekiya+ fumu ya ku Yuda, wanguŵatuma kwaku Nebukadinezara fumu ya ku Babiloni. Kalata yo yenga ndi mazu ngakuti:
4 “Ivi ndivu Yehova wa mizinda, Chiuta waku Isirayeli, wakambiya akapolu wosi, wo ndaŵatumiza ku ukapolu ku Babiloni kutuliya ku Yerusalemu,
5 ‘Zengani nyumba ndi kujamu. Limani minda ndi kurya vipasu vaki.
6 Toni anthukazi ndipu balani ŵana anthulumi ndi anthukazi; ŵana ŵinu anthulumi muŵasaniriyi anthukazi kuti atorani nawu, ndipu ŵana ŵinu anthukazi muŵasaniriyi anthulumi kuti atorani nawu, kuti nawu abali ŵana anthulumi ndi anthukazi. Muyandani kweniko ndipu mungajanga amana cha.
7 Muyikhumbiyengi chimangu tawuni yo ndakutumaniku kuti muje akapolu, ndipu muyipempheriyengi kwaku Yehova, pakuti asani mutawuni yo mwe chimangu, namwi mujengi mwachimangu.+
8 Pakuti Yehova wa mizinda, Chiuta waku Isirayeli wakamba kuti: “Mungazomerezanga cha kuti achimi ŵinu kweniso akuloska vamunthazi wo ŵe pakati pinu akupusikeni,+ ndipu mungavwisiyanga cha malotu ngo alota.
9 Pakuti ‘akamba mauchimi ngaboza mu zina langu. Ini ndaŵatumapu cha,’+ Yehova ndiyu wakamba.”’”
10 “Pakuti Yehova wakamba kuti, ‘Asani vyaka 70 vo mujaliyengi ku Babiloni vakwana, ndazakukukumbukani,+ ndazamufiska vo ndikulayizga ndipu ndazakukuweziyani mumalu yanga.’+
11 “‘Pakuti ndiziŵa umampha vo nditikuŵanaŵaniyani,’ Yehova ndiyu wakamba, ‘ndiŵanaŵana kuti ndikupaskeni chimangu, soka cha,+ kuti vinthu vizikuyendiyeni umampha kunthazi kweniso kuti muje ndi chilindizga chamampha.+
12 Mwazakundidana, mwazamukuza kwaku ini kweniso, mwazamupemphera kwaku ini ndipu ndazakukuvwisiyani.’+
13 “‘Mwazakundipenja ndipu mwazakundisaniya,+ pakuti mwazakundipenja ndi mtima winu wosi.+
14 Ndazakukuzomerezani kuti mundisaniyi,’+ Yehova ndiyu wakamba. ‘Ndazakukutuzganiku ku ukapolu ndipu ndazakukuwunganisani pamoza kutuliya mu mitundu yosi kweniso kumalu ngosi ngo ndakumbininiskiyaniku,’+ Yehova ndiyu wakamba. ‘Ndipu ndazakukuweziyani kumalu ko mungutuwa muchiluta ku ukapolu.’+
15 “Kweni yimwi mwakamba kuti, ‘Yehova watiyuskiya achimi ku Babiloni.’
16 “Pakuti ivi ndivu Yehova wakambiya fumu yo ye pampandu waufumu waku Davidi+ ndipuso ŵanthu wosi wo aja mutawuni iyi, abali ŵinu wo aza namwi cha ku ukapolu,
17 ‘Yehova wa mizinda wakamba kuti: “Ndiŵatumiyengi lipanga, nja kweniso mulili,*+ ndipu ndiŵasambusengi vipasu va mkuyu vakuvunda* vo viheni ukongwa vakuti vingaryika cha.”’+
18 “‘Ndazakuŵaskera ndi lipanga,+ nja kweniso mulili ndipuso ndazakuŵasambusa chinthu chakuchitiska mantha ku maufumu ngosi nga pacharu chapasi,+ chinthu chakutembeka, chinthu chakuziziswa kweniso chinthu cho ŵanthu azakuchimbiya khwelu,+ ndipu ŵanthu azakuŵanyoza mu mitundu yosi yo ndazakuŵambininiskiyamu,+
19 chifukwa chakuti avwiya cha mazu ngangu ngo ndinguŵatumiya kuziya mwa ateŵeti ŵangu achimi,’ Yehova ndiyu wakamba, ‘ndaŵatumanga mwakuwerezawereza.’*+
“‘Kweni munguŵavwiya cha,’+ Yehova ndiyu wakamba.
20 “Mwaviyo, vwiyani mazu ngaku Yehova, yimwi mosi mwe ku ukapolu, yimwi ndakutumizani ku Babiloni kutuwa ku Yerusalemu.
21 Ivi ndivu Yehova wa mizinda, Chiuta waku Isirayeli wakamba vakukwaskana ndi Ahabu mwana waku Kolaya kweniso Zedekiya mwana waku Maseya, wo akamba mauchimi ngaboza mu zina langu,+ ‘Ndiŵaperekengi mu janja laku Nebukadinezara* fumu ya ku Babiloni ndipu waŵabayengi pa masu pinu.
22 Ndipu vo viŵachitikiyengi vijengi thembu lo ŵanthu wosi a ku Yuda wo ŵe ku ukapolu ku Babiloni alikambengi, kuti: “Yehova wakuchitiskeni kuti muje nge Zedekiya ndipuso nge Ahabu, wo fumu ya ku Babiloni yinguŵawotcha pamotu!”
23 pakuti achita vinthu vakulengesa mu Isirayeli,+ yiwu achita chigololu ndi anthukazi a ŵanthu wo akuzengezana nawu, kweniso akamba vinthu vaboza mu zina langu, vo ndikuŵalamulapu cha.+
“‘“Ini ndini ndiziŵa, ndipu nde kaboni.”+ Yehova ndiyu wakamba.’”
24 “Ndipu Shemaya+ wa ku Nehelamu, ukamukambiyi kuti,
25 ‘Yehova wa mizinda, Chiuta waku Isirayeli wakamba kuti: “Chifukwa chakuti ungutumiza makalata mu zina laku ku ŵanthu wosi wo ŵe mu Yerusalemu, kwaku Zefaniya+ mwana waku Maseya wasembi, kweniso kwa asembi wosi, ndipu makalata ngo nge ndi mazu ngakuti,
26 ‘Yehova wasankha yiwi kuti uje wasembi mumalu mwaku Yehoyiyada wasembi, kuti uje wakuwonere nyumba yaku Yehova kweniso kuti uje ndi mazaza pa munthu weyosi wakufuntha yo wachita vinthu nge mchimi ndi kumuŵika mumatangaza kweniso kumuvwalika goli;+
27 sonu walekiyanji kuchenya Yeremiya wa ku Anatoti+ yo wachita vinthu nge mchimi pakati pinu?+
28 Pakuti wangutitumiya uthenga kunu ku Babiloni wakuti: “Mujengeku nyengu yitali! Zengani nyumba ndi kujamu. Pandani minda ndi kurya vipasu vaki,+—”’”’”
29 Zefaniya+ wasembi wati waŵerenga kalata iyi mchimi Yeremiya wachivwa,
30 Yehova wangukambiya Yeremiya kuti:
31 “Tumiza uthenga ku ŵanthu wosi wo ŵe ku ukapolu wakuti, ‘Ivi ndivu Yehova wakamba vakukwaskana ndi Shemaya wa ku Nehelamu: “Chifukwa chakuti Shemaya wakukambiyani mauchimi, chinanga kuti ndingumutuma cha ndipu wakhumbanga kukuchitiskani kuti mugomezgi vinthu vaboza,+
32 mwaviyo, Yehova wakamba kuti, ‘Ndilangengi Shemaya wa ku Nehelamu ndipuso ŵana ŵaki. Palivi munthu weyosi wa mubanja laki yo waponengi pakati pa ŵanthu yaŵa, ndipu wazakuviwona cha vinthu vamampha vo ndazamuchitiya ŵanthu ŵangu,’ Yehova ndiyu wakamba, ‘pakuti wachiska ŵanthu kuti agarukiyi Yehova.’”’”
Mazu Ngam'mphata
^ Yapa pangafwatulikiya so kuti, “akuzenga ndi kunozga mipanda.”
^ Yapa pangafwatulikiya so kuti, “vakuphumuka.”
^ Pamwenga kuti, “nthenda.”
^ Mazu ngaki chayingu, “ndayukanga mlenjilenji ndi kuŵatuma.”
^ Zina ili lilembeka so kuti, “Nebukadirezara.”
