Yeremiya 51:1-64
51 Yehova wakamba kuti:
“Ndivundumuwengi chimphepu chakunangaKuti chinangi Babiloni+ kweniso ŵanthu wo aja ku Lebu-kamayi.*
2 Ndazamutumiza akupeta ku Babiloni,Ndipu azakumupeta ndi kumusambusa charu chambula kanthu;Yiwu azakumuyukiya muvigaŵa vosi mu zuŵa la soka.+
3 Wakuponya muvu waleki kukunga* uta waki.
Ndipu munthu weyosi wangamanga cha wavwala chakuvwala cha mamba ngavisulu.
Anyamata ŵaki mungaŵalongonga lisungu cha.+
Asilikali ŵaki wosi abayiki.
4 Azamubayika ndi kuwa pasi mucharu cha Akadiya,Azamugwazika mumisewu yaki.+
5 Pakuti Isirayeli ndi Yuda ndi vyoko cha kwaku Chiuta wawu, kwaku Yehova wa mizinda.+
Kweni pa masu pa Mtuŵa waku Isirayeli, charu chawu* chazaza ndi mulandu.
6 Thaŵani pakati paku Babiloni,Thaŵani kuti mutaski umoyu winu.+
Mungafwanga cha chifukwa cha kunanga kwaki.
Pakuti ndi nyengu yakuti Yehova waweze nduzga.
Iyu watimuweze chifukwa cha vo wachita.+
7 Babiloni wenga kapu yagolidi mu manja mwaku Yehova;Iyu wanguloŵeresa charu chosi.Chifukwa cha vinyu waki, mitundu ya ŵanthu yaloŵe;+Lekani mitundu ya ŵanthu yafuntha.+
8 Babiloni wawa ndi kufyoka mwamabuchibuchi.+
Muliyeni!+
Mutoliyeni mafuta nga basamu kuti urwirwi waki umali; kuti panyaki wangachizgika.”
9 “Tinguyesa kuchizga Babiloni, kweni wanguchizgika cha.
Mulekeni, tiyeni tikengi, weyosi kucharu chaki.+
Pakuti cheruzgu chaki chafika kuchanya;Chakwera mpaka kumitambu.+
10 Yehova waza ndi urunji kwaku isi.+
Zani, tiyeni ku Ziyoni kuti tikakambi ntchitu zaku Yehova Chiuta widu.”+
11 “Norani mivi;+ nyamuwani vishangu vakuzunguliya.*
Yehova wavunduwa mtima* wa mafumu nga Amedi,+Chifukwa wakhumba kubwanganduwa Babiloni.
Pakuti Yehova waweze nduzga, waweze nduzga chifukwa cha nyumba yaki yakusopiyamu.
12 Soskani chiziŵisu*+ kuti muyukiyi mpanda waBabiloni.
Vikiliyani ukongwa malu, ŵikani alonda.
Nozgekeresani akukhaza.
Pakuti Yehova wanozga nthowa,Ndipu wafiskengi vo wakulayizga kuti wachitiyengi ŵanthu a ku Babiloni.”+
13 “Yiwi munthukazi yo waja pamaji nganandi,+Yo we ndi chuma chinandi,+Umaliru waku wafika, waleka kusaniya phindu.*+
14 Yehova wa mizinda walapizga kuti,‘Ndikuzazengi ndi ŵanthu, ajengi anandi nge azombi,Ndipu azamudaniriza mwalikondwa chifukwa cha kuthereskeka kwaku.’+
15 Iyu ndiyu wakupanga charu chapasi ndi nthazi zaki,Ndiyu wakujalikiska charu ndi zeru zaki+Ndipuso ndiyu wakutambasuwa kuchanya pakuti wavwisa vinthu.+
16 Asani mazu ngaki ngavwika,Maji nga kuchanya ngapoma,Ndipu wachitiska kuti mitambu yikweri* kutuliya kuvigoti va charu chapasi.
Wachitiska kuti malimphezi ngang’animi asani vuwa yituwa,*Ndipu watuzga mphepu munkhokwi zaki.+
17 Munthu weyosi wachita vinthu mwambula zeru kweniso wakulongo kuti waziŵa vinthu cha.
Munthu weyosi wakusula visulu wazamulengeseka chifukwa cha chikozgu chaki chakujoba;+Pakuti chikozgu chaki chachisulu,* ndi boza,Ndipu yivu vilivi mzimu.*+
18 Yivu vaŵaka,+ ndi ntchitu yakwenere kunyozeka.
Asani zuŵa lawu la chilangu laza, vazamumala.
19 Chigaŵa chaku Yakobe chiyanana cha ndi vinthu venivi,Pakuti iyu Ndiyu wakupanga vinthu vosi,Kweniso nthonga ya chihara chaki.+
Zina laki ndi Yehova wa mizinda.”+
20 “Yiwi ndiwi nthonga yangu, chidya chakuchitiya nkhondu,Pakuti mwakugwiriskiya ntchitu yiwi, ndazamukuswa mitundu ya ŵanthu.
Mwakugwiriskiya ntchitu yiwi, ndazamubwanganduwa maufumu.
21 Mwakugwiriskiya ntchitu yiwi, ndazamukuswa hachi ndi wakukwerapu waki.
Mwakugwiriskiya ntchitu yiwi, ndazamukuswa galeta la nkhondu ndi wakukweramu waki.
22 Mwakugwiriskiya ntchitu yiwi, ndazamukuswa munthulumi ndi munthukazi.
Mwakugwiriskiya ntchitu yiwi, ndazamukuswa munthulumi wakukota kweniso kamnyamata.
Mwakugwiriskiya ntchitu yiwi, ndazamukuswa mnyamata kweniso msungwana.
23 Mwakugwiriskiya ntchitu yiwi, ndazamukuswa mliska kweniso mskambu waki.
Mwakugwiriskiya ntchitu yiwi, ndazamukuswa mlimi kweniso gulu laki la viŵetu.
Mwakugwiriskiya ntchitu yiwi, ndazamukuswa nduna kweniso achiŵi kwa alongozgi.
24 Ndazamuweze Babiloni kweniso ŵanthu wosi a mu Kadiya,Chifukwa cha vinthu vosi viheni vo akuchita mu Ziyoni pa masu pinu,”+ Yehova ndiyu wakamba.
25 “Ndilimbana nawi,+ yiwi phiri lakubwanganduwa,” Yehova ndiyu wakamba,“Yiwi wakubwanganduwa charu chosi chapasi.+
Ndazakukutambasuliya janja langu ndipu ndazakukukunkhuzga kutuliya mumajalawiNdipu ndazakukusambusa phiri lakufya ndi motu.”
26 “Kwaku yiwi, ŵanthu azamutoku cha mwa wapakona pamwenga mwa wapafawundeshoni,Chifukwa chakuti wazamuja mahami ngamuyaya,”+ Yehova ndiyu wakamba.
27 “Soskani chiziŵisu* mucharu.+
Mbani mbata* pakati pa mitundu ya ŵanthu.
Sankhani* mitundu ya ŵanthu kuti yimuyukiyi.
Mudaniyeni maufumu nga ku Ararati,+ Mini kweniso Ashikenazi.+
Mudaniyeni munthu wakulemba ntchitu asilikali.
Tumani mahachi kuti ngazi nge azombi acheya.
28 Sankhani* mitundu ya ŵanthu kuti yimuyukiyi,Mafumu nga ku Mediya,+ nduna zaki, achiŵi kwa alongozgi ŵakiKweniso vyaru vosi vo alamuliya.
29 Ndipu charu chapasi chazamusukunyika ndi kundengandenga,Pakuti vo Yehova waŵanaŵana kuchitiya Babiloni vazamufiskikaKuti charu cha Babiloni chisambuki chinthu chakuchitiska mantha, chambula ŵanthu.+
30 Asilikali a ku Babiloni aleka kuchita nkhondu.
Yiwu aja mumalu ngawu ngakuvikilirika.
Nthazi zawu zamala.+
Yiwu aja nge anthukazi.+
Nyumba zaki zabuskika ndi motu.
Akabali ŵaki afyoleka.+
31 Wakupinga uthenga watchimbiya kuti wakakumani ndi wakupinga uthenga munyaki,Ndipu muthenga watchimbiya kuti wakakumani ndi muthenga munyaki,Kuti wakakambiyi fumu ya ku Babiloni kuti tawuni yaki yatoleka muvigaŵa vosi,+
32 Kuti malu ngakuyambukiyapu ngatoleka,+Kuti maboti ngakupangika ndi gumbwa ngawotcheka ndi motu,Ndipuso kuti asilikali achita mantha.”
33 Pakuti Yehova wa mizinda, Chiuta waku Isirayeli wakamba kuti:
“Mwana munthukazi wa ku Babiloni we nge malu ngakukhwemiyapu mbewu.
Iyi ndi nyengu yakumukandiyakandiya.
Pambula kuswera nyengu yakuvuniya yimuziyengi.”
34 “Nebukadinezara* fumu ya ku Babiloni wandimeza;+Wachitiska kuti nditimbanyizgiki.
Wandiŵika pasi nge chiyaŵi chamwazi.
Wandimeza nge mo njoka yikulu yichitiya;+Wazaza lufu laki ndi vinthu vangu vamampha.
Iyu wandisukuluza.
35 Munthu yo waja mu Ziyoni wakamba kuti, ‘Nkhaza zo andichitiya kweniso zo achitiya liŵavu langu, zizi paku Babiloni!’+
Ndipu Yerusalemu wakamba kuti, ‘Ndopa zangu zizi pa Akadiya.’”
36 Mwaviyo, Yehova wakamba kuti:
“Ndikumiyengi pa mulandu waku,+Ndipu ndiwezengi nduzga chifukwa chaku yiwi.+
Ndiphwisengi nyanja yaki kweniso ndikamusengi visimi vaki.+
37 Ndipu Babiloni wasambukengi milu ya mya,+Mphanji ya akambwi,+Wasambukengi chinthu chakuchitiska mantha kweniso chinthu cho ŵanthu achimbiyengi khwelu,Ndipu mwazamujanga ŵanthu cha.+
38 Wosi azamubangula nge nkharamu zimanazimana.*
Azamuwuluma nge ŵana a nkharamu.”
39 “Asani azikondwa, ndazakuŵanozge phwandu ndi kuŵaloŵeresa,Kuti azizayi;+Pavuli paki, azamugona tulu tambula kumala,Ndipu azamuyuka cha,”+ Yehova ndiyu wakamba.
40 “Ndazamuluta nawu kumalu ngakubayiyaku nyama nge ŵana a mbereri,Nge mbereri zinthulumi limoza ndi mbuzi.”
41 “Sheshaki* watoleka,+Tawuni yo charu chosi chayithamikanga yakoleka!+
Babiloni wasambuka chinthu chakuchitiska mantha pakati pa mitundu ya ŵanthu!
42 Nyanja yabizga Babiloni.
Mayiŵa nganandi nga nyanja yo, ngamubenekere.
43 Matawuni ngaki ngasambuka chinthu chakuchitiska mantha, charu chambula maji kweniso chipalamba.
Charu cho mwazamujanga munthu weyosi cha kweniso cho mwazamujumphanga munthu weyosi cha.+
44 Ndilangengi Belo + mu Babiloni,Vinthu vo wanguŵika mumulomu mwaki ndazakuvituzgamu.+
Mitundu ya ŵanthu yazamundonde so kwaku iyu cha,Ndipu mpanda wa Babiloni wazamukuwa.+
45 Tuwanipu pakati paki, mwaŵanthu ŵangu!+
Thaŵani kuti mutaski umoyu winu+ ku ukali wakukole waku Yehova!+
46 Mungachitanga mantha cha pamwenga kopa chifukwa cha uthenga wo uvwikengi mucharu cho.
Mu chaka chimoza uthenga wo uzengi,Ndipu mu chaka chinyaki uthenga unyaki so uzengi,Uthenga wakuti mucharu cho muchitikengi chiwawa kweniso kuti fumu yiyukiyengi fumu yinyaki.
47 Mwaviyo, awonani! mazuŵa ngatuzaPenipo ndazamunanga vikozgu vakujoba va ku Babiloni.
Charu chaki chosi chazamulengeseka,Ndipu ŵanthu ŵaki wosi wo azamubayika azamukuwa pasi pakati paki.+
48 Kuchanya, charu chapasi kweniso vosi vo ve mwenimo,Vazamudaniriza mwalikondwa chifukwa chaku Babiloni,+Pakuti akubwanganduwa azamukuza kwaku iyu kutuliya kunkhondi,”*+ Yehova ndiyu wakamba.
49 “Babiloni wangubaya ŵanthu a ku Isirayeli pe cha+Kweni wangubaya so ŵanthu a pacharu chosi chapasi ku Babiloni.
50 Yimwi muthaŵa lipanga, lutirizgani kwenda, mungamanga ŵaka cha!+
Kumbukani Yehova, yimwi mwe kutali,Ndipu muŵanaŵanengi vakukwaskana ndi Yerusalemu mumtima mwinu.”+
51 “Talengeseka, pakuti tavwa mazu ngakunyoza.
Soni zabenekere visku vidu,Pakuti alendu ayukiya malu ngakupaturika nga nyumba yaku Yehova.”+
52 “Mwaviyo, awonani! mazuŵa ngatuza,” Yehova ndiyu wakamba,Penipo ndazamunanga vikozgu vaki vakujoba,Ndipu ŵanthu wo apwetekeka mucharu chaki chosi azamutamantha.”+
53 “Chinanga kuti Babiloni wangakwere kuchanya,+Chinanga kuti wangakholesa tinyumba taki takuthopoka takuvikilirika,Wo amubwanganduwengi atuliyengi kwaku ini,”+ Yehova ndiyu wakamba.
54 “Vwisiyani! Mu Babiloni muvwika kuliya,+Mucharu cha Akadiya muvwika chiwawa cha soka likulu,+
55 Pakuti Yehova wabwanganduwa Babiloni,Iyu wazamuchetamisa mazu ngaki nganthazi,Ndipu mayiŵa ngawu ngazamuwuluma nge maji nganandi.
Chiwawa chawu chazamuvwika.
56 Pakuti wakubwanganduwa wazamukuza kuti wabwanganduwi Babiloni;+Asilikali ŵaki azamukoleka,+Mauta ngawu ngazamuvikitika,Pakuti Yehova ndi Chiuta yo wapereka chilangu.+
Iyu wazamuweze nadi.+
57 Ndazamuloŵeresa alongozgi ŵaki akuzirwa, ŵanthu ŵaki azeru,+Nduna zaki, achiŵi kwa alongozgi ŵaki kweniso asilikali ŵaki,Ndipu azamugona tulu tambula kumala,Azamuyuka cha,”+ Fumu, yo zina laki ndi Yehova wa mizinda ndiyu yakamba.
58 Yehova wa mizinda wakamba kuti:
“Mpanda wa Babiloni, chinanga kuti ngukhomi, wazamubwangandulikiya limu,+Ndipu mageti ngaki, chinanga kuti ngatali, ngazamubuskika ndi motu.
Ŵanthu azamusuzgikiya paŵaka;Mitundu ya ŵanthu yazakujivukisa kuti yiryisi motu.”+
59 Yanga ndi mazu ngo mchimi Yeremiya wangukambiya Seraya mwana waku Neriya,+ mwana waku Mahaseya, pa nyengu yo wanguluta ku Babiloni ndi Zedekiya fumu ya ku Yuda, mu chaka chachinayi cha ulamuliru waki; Seraya wagwiranga ntchitu yakuwonere vinthu va fumu.
60 Yeremiya wangulemba mubuku limoza masoka ngosi ngo ngawiyengi Babiloni, mazu ngosi ngo ngangulembeka ngakukwaskana ndi Babiloni.
61 Kweniso Yeremiya wangukambiya Seraya kuti: “Asani wachifika mucharu cha Babiloni ndipu wachiwona, ukaŵerengi mwakukweza mazu ngosi yanga.
62 Pavuli paki, ukakambi kuti, ‘A Yehova, mwakamba vinthu vo vichitikiyengi malu yanga, kuti ngabwangandulikengi ndipu mwazamuja kanthu cha, munthu pamwenga nyama, kweniso kuti ngajengi mahami mpaka muyaya.’+
63 Ndipuso asani wachimaliza kuŵerenga buku ili, ukamangiriyeku mwa ndipu ukalitayi pakati pa Msinji wa Yufureti.
64 Pavuli paki, ukakambi kuti, ‘Umu ndimu Babiloni wazamubiliya ndipu wazamuyuka so cha+ chifukwa cha soka lo nditimuwisiya; ndipu ŵanthu ŵaki azamuvuka.’”+
Mazu ngaku Yeremiya ngamaliya penapa.
Mazu Ngam'mphata
^ Viwoneka kuti ili ndi zina linyaki la Kadiya kweni lalembeka mu nthowa yinyaki.
^ Pamwenga kuti, “kukanda.”
^ Kung’anamuwa charu cha Akadiya.
^ Yapa pangafwatulikiya so kuti, “ŵikani mivi mukachikwama kaki.”
^ Mazu ngaki chayingu, “mzimu.”
^ Pamwenga kuti, “polu lachiziŵisu.”
^ Mazu ngaki chayingu, “mwesu wa phindu laku wamala.”
^ Pamwenga kuti, “wachitiska kuti mvuchi ukweri.”
^ Yapa pangafwatulikiya so kuti, “Wajula mageti nga vuwa.”
^ Pamwenga kuti, “chachisulu chakusongono.”
^ Pamwenga kuti, “mvuchi.”
^ Pamwenga kuti, “polu lachiziŵisu.”
^ Anyaki akamba kuti, “lipenga.”
^ Mazu ngaki chayingu, “Patuwani.”
^ Mazu ngaki chayingu, “Patuwani.”
^ Zina ili lilembeka so kuti, “Nebukadirezara.”
^ Pamwenga kuti, “nkharamu zimanazimana zanthazi.”
^ Viwoneka kuti ili ndi zina linyaki la Babele (Babiloni) kweni lalembeka mu nthowa yinyaki.
^ Anyaki akamba kuti, “kumpotu.”
