Zefaniya 3:1-20
3 Soka yiwi tawuni yakugaruka, yakunangika, yakukandirizga!+
2 Tawuni yo, yavwiya cha mazu ngengosi;+ yakana kulangika.+Yathemba Yehova cha;+ yandere cha kufupi ndi Chiuta waki.+
3 Alongozgi ŵaki ŵe nge nkharamu zakukoroma.+
Akweruzga ŵaki ŵe nge mphumphi ndi usiku;Asiyaku chiwanga chechosi cha chakuti akukuti mpaka mlenji.
4 Achimi ŵaki mbaganyavu, mbaryarya.+
Asembi ŵaki afipiska vinthu vakupaturika;+Yiwu atuswa dangu.+
5 Yehova ndi murunji pakati pa tawuni yo;+ wachita cha chinthu chiheni.
Mlenji wewosi waziŵikisa vyeruzgu vaki,+Vitondeka cha nge ukweru.
Kweni munthu wambula urunji walivi soni.+
6 “Ndingunanga mitundu ya ŵanthu; tinyumba tawu takuthopoka tapakona tingubwangandulika.
Ndingusakaza misewu yawu mwakuti pengavi wakujumphamu.
Matawuni ngawu ngangusambuka mahami, kwambula munthu, kwambula wakujamu.+
7 Ndingukamba kuti, ‘Wazakundiwopa nadi kweniso wazamulonde chilangu,’*+
Kuti malu ngaki ngakujamu ngaleki kusakazika+Ndimumbengi mulandu* chifukwa cha vinthu vosi venivi.
Kweni wosi ŵenga akunozgeka kuchita vinthu vo vingaŵananga.+
8 ‘Mwaviyo, lutirizgani kundilindizga,’*+ Yehova ndiyu wakamba,‘Mpaka pa zuŵa lo ndazamuyukiya kuti ndiphangi vinthu,*Pakuti cheruzgu changu ntchakuti ndiwunganisi mitundu, ndiwunjiki maufumu,Kuti ndiŵapunguliyi ukali wangu, ukali wangu wosi wakukole;+Pakuti ndazamupiriza charu chosi chapasi ndi motu wa ukali wangu.*+
9 Pakuti pa nyengu yo, ndazamusintha chineneru cha ŵanthu amitundu yosi kuti chiŵi chineneru chituŵa,Kuti wosi adaniyi pa zina laku Yehova,Kuti amuteŵete* mwakukoliyana.’+
10 Ŵanthu wo atindiŵeyere, mwana munthukazi wa ŵanthu ŵangu wo akumbininiskika, azengi ndi mphasu kwaku ini,Kutuliya kuchigaŵa cha misinji ya ku Ifiyopiya.+
11 Pa zuŵa lenilo, wazamulengeseka chaChifukwa cha vinthu vosi vo unguchita pakundigarukiya,+Pakuti pa nyengu yo, ndazamutuzgapu ŵanthu akujikuzga kweniso akujiŵikamu pakati paku;Ndipu yiwi wazamukuŵa so munthu wakujikuzga cha muphiri langu lakupaturika.+
12 Ndazamuchitiska kuti munthu wakujiyuyuwa kweniso wakufwasa waje pakati paku,+Ndipu yiwu azamubisama mu zina laku Yehova.
13 Ŵanthu akujaku aku Isirayeli,+ azamuchita cha vinthu vambula urunji;+Yiwu azamukambanga boza cha ndipuso lilimi lauryarya lazamusanirika cha mumulomu mwawu;Yiwu azamukurya ndi kugona, ndipu palivi munthu yo wazakuŵawofya.”+
14 Yiwi mwana munthukazi wa ku Ziyoni, daniriza mwalikondwa!
Yiwi Isirayeli, daniriza mwakukondwa chifukwa chakuti wathereska!+
Yiwi mwana munthukazi wa ku Yerusalemu, kondwa ndi kusekere ndi mtima waku wosi!+
15 Yehova wakutuzgiyapu vyeruzgu.+
Waweza murwani waku.+
Yehova Fumu ya ku Isirayeli, we pakati paku.+
Wazamukopa so soka cha.+
16 Pa zuŵa lo, Yerusalemu wazamukuvwa mazu ngakuti:
“Yiwi Ziyoni, ungawopanga cha.+
Manja ngaku ngangamalanga nthazi cha.
17 Yehova Chiuta waku we pakati paku.+
Iyu ngwanthazi ndipu wazakukutaska.
Wazamuzaya kweniso wazamukondwa ukongwa chifukwa chaku yiwi.+
Wazamuja cheti* chifukwa chakuti watikuyanja.
Iyu wazamusekere ndi kudaniriza mwalikondwa chifukwa chaku yiwi.
18 Ndazamuwunganisa ŵanthu wo achita chitima chifukwa cha kuleka kusanirika pa maphwandu ngaku;+Yiwu ŵenga nawi cha chifukwa chakuti ŵenga ku ukapolu ko anyozekanga.+
19 Awona! Pa nyengu yo, ndazamuyukiya ŵanthu wosi wo atikukandirizga;+Ndazamutaska munthu wakuganthiya,+Ndipuso ndazamuwunganisa pamoza ŵanthu akumbininiskika.+
Ndazamuchitiska kuti alumbiki kweniso kuti aziŵiki*Muvyaru vosi vo angulengeseka.
20 Pa nyengu yo, ndazakukuweziyani mucharu chinu,Pa nyengu yo, ndazakukuwunganisani pamoza.
Pakuti asani ndaziŵaweze kwawu ŵanthu ŵinu wo angutoleke ku ukapolu pa masu pinu,Ndazamuchitiska kuti muziŵiki* kweniso kuti mulumbiki+ pakati pa ŵanthu a pacharu chapasi,” Yehova ndiyu wakamba.+
Mazu Ngam'mphata
^ Pamwenga kuti, “Ndimulangengi.”
^ Pamwenga kuti, “kweniso wazamuchenyeka.”
^ Pamwenga kuti, “lutirizgani kundilindizga mwakuzikira.”
^ Yapa pangafwatulikiya so kuti, “ndazamuyukiya nge kaboni.”
^ Mazu ngaki chayingu, “phamphu langu.”
^ Pamwenga kuti, “amusopi.”
^ Pamwenga kuti, “Wazamukhorwa.”
^ Mazu ngaki chayingu, “kuti apangi zina.”
^ Mazu ngaki chayingu, “kuti mupangi zina.”
