WONA maluŵa kweniso vipasu va alimondi vakufya vo ve ku nthonga. Nthonga iyi njaku Aroni. Maluŵa ndi vipasu vo ve ku nthonga yaku Aroni vingume usiku umoza pe. Tiyi tiwoni chifukwa chaki.

Panyengu iyi, Ayisraele ŵenga ŵeche kuyinga m’chipululu. Ndipu anyaki aku yiwu awonanga kuti Mosese wangaŵa mulongozgi wawu so cha, kweniso kuti Aroni wangaŵanga so mula wa asembi cha. Ŵanthu wo ŵenga ndi maŵanaŵanu yanga ŵenga Kora, Datani, Abiramu kweniso alongozgi 250. Ŵanthu yaŵa wosi anguza kwaku Mosese ndi kumukambiya kuti: ‘Kumbi nchifukwa wuli utijikuzga?’

Mosese wangukambiya Kora ndi gulu laki kuti: ‘Mawa ndi mlenji muto libani muliyiki mu mbali zakuwotchiyamu. Ndipu muzi ku chihema chaku Yehova, kuti tiziwoni mweniyo Yehova wazakumusankha.’

Kwati kwacha, Kora ndi gulu laki la ŵanthu 250 ŵanguluta ku chihema. Ndipu ŵanthu anyaki so anguŵalondo. Yehova wangukwiya ukongwa. Ndipu Mosese wangukambiya ŵanthu kuti: ‘Tuwaniku ku mahema nga ŵanthu aheni yaŵa. Mungakwasanga kanthu kawu kekosi cha.’ Ŵanthu anguvwiya ndipu angutuwaku ku mahema ngaku Kora, Datani ndi Abiramu.

Sonu Mosese wangukamba kuti: ‘Yapa sonu ndipu muziŵengi mweniyo Yehova wasankha. Charu chijurikengi ndipu chimezengi ŵanthu aheni yaŵa.’

Mosese wati wamaliza waka kulongoro, charu chingujurika. Hema ndi vinthu vosi vaku Kora kweniso Datani, Abiramu ndi ŵanthu wosi wo ŵenga nawu, angusere pasi ndipu charu chingujarika. Ŵanthu ŵati ŵavwa kuliya kwa ŵanthu wo aserenga pasi, angudanirizga kuti: ‘Tiyeni tithaŵi charu chingatimeza so nasi!’

Kweni Kora ndi gulu laki la alongozi 250 ŵenga ŵeche pafupi ndi chihema. Mwaviyo, Yehova wangutuma motu ndipu wosi angufya. Pavuli paki Yehova wangukambiya Eleazara mwana waku Aroni kuti wato mbali zakuwotchiyapu libani za ŵanthu wo angufwa ndipu wazipangi kuti zije chakubenekere pa guŵa la sembi. Chibenekereru ichi chenga chakutcheŵeska Ayisraele kuti palivi munthu yo watenere kuŵa wa sembi waku Yehova kuluska Aroni ndi ŵana ŵaki.

Kweni Yehova wakhumbanga kulongo kuti Aroni ndi ŵana ŵaki ndiwu wasankha kuti aje asembi. Sonu wangukambiya Mosese kuti: ‘Kambiya alongozi a fuku lelosi la Yisraele kuti azi ndi nthonga zawu. Mu fuku laku Levi, kambiya Aroni kuti wazi ndi nthonga yaki. Ndipu uŵiki nthonga zosi mu chihema, panthazi pa bokosi la phanganu. Sonu nthonga ya munthu yo ndamusankha kuŵa wasembi, yimengi maluŵa.’

Kwati kwacha, Mosese wanguwona kuti nthonga yaku Aroni ndiyu yingume maluŵa ndi vipasu vakufya va alimondi. Sonu kumbi wachiziŵa chifukwa cho Yehova wanguchitiskiya kuti nthonga yaku Aroni yime maluŵa?