MSUNGWANA yo uwona yapa wenga wa vyaka 12. Yo wamuko janja ndi Yesu ndipu anyina ndi awiski ndi wo ama pafupi po. Kumbi wachiziŵa chifukwa cho awoneke akukondwa? Tiyi tiwoni.

Awiski a msungwana yo ŵenga akuzirwa ndipu zina lawu ŵenga a Yairo. Zuŵa linyaki mwana wawu wangutama. Ndipu matenda ngangulutiriya mbwenu. Sonu Yairo ndi muwoli waki angufipa mtima ukongwa, chifukwa mwana wawu wawonekanga kuti wafwengi. Yiwu ŵenga ndi mwana yumoza pe. Sonu Yairo wanguluta kuchipenja Yesu. Iyu wanguvwa vakuziziswa vo Yesu wachitanga.

Yairo wanguchimusaniya Yesu we mkati mwa ŵanthu anandi. Kweni Yairo wanguporota mkati mwa ŵanthu wo mpaka wanguchigwada pa malundi ngaku Yesu. Iyu wangumukambiya kuti: ‘Mwana wangu watama ukongwa. Chondi tiyeni mukamuchizgi.’ Ndipu Yesu wangukamba kuti walutengi.

Sonu achiluta, ŵanthu atutuzgananga kuti afiki ko wenga Yesu. Mwamabuchibuchi Yesu wanguma ndipu wangufumba kuti: ‘Ndiyani wandikwaska?’ Iyu wanguziŵa kuti nthazi zaki zingutuwa mwaku iyu, ndipuso wanguziŵa kuti munthu munyaki wangumukwaska. Kumbi munthu yo wenga yani? Iyu wenga munthukazi yo watamanga ukongwa kwa vyaka 12. Iyu wanguza ndi kuzikwaska chakuvwala chaku Yesu ndipu wanguchira.

Ivi vingumukondweska Yairo chifukwa iyu wanguwona kuti kwenga kwambula kusuzga kuti Yesu wachizgi munthu. Kweni pavuli paki kunguza munthu ndipu wangumukambiya Yairo kuti: ‘Ungamusuzganga cha Yesu, mwana waku wafwa.’ Kweni Yesu wanguvwa vo munthu yo wangukamba ndipu wangumukambiya Yairo kuti: ‘Kudandawula cha mwana waku wajengi umampha.’

Ŵati afika ku nyumba yaku Yairo, angusaniya ŵanthu achiliya ndipu ŵenga ndi chitima chikulu ukongwa. Kweni Yesu wanguŵakambiya kuti: ‘Lekani kuliya. Mwana uyu wafwa cha. Iyu wagona waka tulu.’ Kweni yiwu angumuseka Yesu, chifukwa anguziŵa kuti mwana yo wafwa.

Pavuli paki, Yesu wangudana awiski ndi anyina a mwana yo kweniso akutumika ŵaki ŵatatu ndipu wangusere nawu m’chipinda mo angumugoneka mwana yo. Yesu wanguko janja la mwana yo ndipu wanguti: ‘Yuka!’ Ndipu wanguja so ndi umoyu nge po uwone pachithuthuzi yapa. Iyu wanguyuka ndipu wangwamba kwenda. Ichi ndichu chifukwa chaki anyina ndi awiski awoneka kuti mbakukondwa ukongwa.

Uyu wenga munthu wakwamba cha yo Yesu wanguyuska. Munthu wakwamba yo Bayibolo likamba, wenga mwana wa choko cho chajanga mu msumba wa Naini. Pavuli paki, Yesu wanguyuska Lazaro yo wenga mzichi waku Mariya ndi Marta. Panyengu yo Yesu wazamuwusa nge fumu yaku Chiuta, iyu wazamuyuska ŵanthu anandi wo akufwa kuti azije so ndi umoyu. Kumbi isi tingakondwa cha ndi vinthu venivi?