SAMBIRU 46
Ntchifukwa Wuli Tikhumbika Kujipereka Kwaku Yehova ndi Kubatizika?
Munthu watijipereka kwaku Yehova mupempheru ndipu watimulayizga kuti wasopengi iyu pe kweniso waŵikengi panthazi vakukhumba vaku Yehova pa umoyu waki. (Salimo 40:8) Pavuli paki, wabatizika. Pa nyengu yo wabatizika walongo pakweru ku ŵanthu wosi kuti iyu wakujipereka kwaku Yehova. Kusankha kujipereka kwaku Yehova ntchinthu chakukhumbika ukongwa kuluska chinthu chechosi cho munthu wangasankha pa umoyu waki. Ntchifukwa wuli mukhumbika kusankha chinthu chakukhumbika ukongwa chenichi?
1. Ntchifukwa wuli munthu wakhumbika kujipereka kwaku Yehova?
Titijipereka kwaku Yehova chifukwa chakuti titimuyanja. (1 Yohane 4:10, 19) Bayibolu likamba kuti: “Uyanjengi Yehova Chiuta waku ndi mtima waku wosi, ndi umoyu waku wosi, ndi maŵanaŵanu ngaku ngosi, ndi nthazi zaku zosi.” (Mariko 12:30) Tilongo kuti titanja Chiuta kuziya mu vo tikamba kweniso kuziya mu vo tichita. Nge mo vijaliya kuti ŵanthu wo atanjana ukongwa atorana, nasi titijipereka kwaku Yehova ndi kubatizika chifukwa chakuti titimuyanja ukongwa.
2. Kumbi Yehova watiŵatumbika wuli Akaboni ŵaki akubatizika?
Asani mungabatizika muserengi mu banja lakukondwa laku Yehova. Pavuli paki, mujiwoniyengi mo Yehova walongoliyengi mu nthowa zinandi kuti watikuyanjani ndipu muŵengi nayu paubwezi wakukho ukongwa kuluska mo viliri sonu. (Ŵerengani Malaki 3:16-18.) Asani mwabatizika, Yehova waŵengi Awusemwi kweniso muŵengi mu banja lauzimu la abali ndi azichi pacharu chosi wo atanja Yehova ndipuso wo atikuyanjani. (Ŵerengani Mariko 10:29, 30.) Kweni pe vinthu vinyaki vo mukhumbika kuchita mwechendabatiziki. Mukhumbika kusambira vakukwaskana ndi Yehova, kumuyanja ndipuso kugomezga Mwana waki. Pakumaliya, mutenere kujipereka kwaku Yehova. Asani mwachita ivi ndi kubatizika, muyambengi kukondwa ndipuso mwazamusaniya umoyu wamuyaya. Mazu ngaku Chiuta ngakamba kuti: “Ubatizu . . . nawu so utikutaskani sonu.”—1 Peturo 3:21.
SAMBIRANI VINANDI
Wonani chifukwa cho mukhumbikiya kujipereka kwaku Yehova ndi kubatizika.
3. Weyosi wakhumbika kusankha yo wateŵetiyengi
Kali mu nyengu ya Ayisirayeli, ŵanthu anyaki aŵanaŵananga kuti angasopa Yehova kweniso Bala yo wenga chiuta waboza. Kweni Yehova wangutuma mchimi waki Eliya kuti wawovyi ŵanthu kuziŵa kuti kuchita viyo nkhuheni. Ŵerengani 1 Mafumu 18:21, pavuli paki kambiskanani fumbu ili:
-
Kumbi Ayisirayeli akhumbikanga kusankhanji?
Nge mo ve nge ndi Ayisirayeli, nasi tikhumbika kusankha yo titeŵetiyengi. Ŵerengani Luka 16:13, pavuli paki kambiskanani mafumbu yanga:
-
Ntchifukwa wuli tikhumbika cha kuteŵete Yehova ndi munthu munyaki pamwenga chinthu chinyaki nyengu yimoza?
-
Kumbi tingamulongo wuli Yehova kuti tasankha nadi kuteŵete iyu?
4. Muŵanaŵaniyengi mo Yehova watikuyanjiyani
Yehova watipaska mphasu zinandi zakuzirwa. Nanga isi tingamupaskanji? Woneriyani VIDIYO.
Kumbi Yehova walongo wuli kuti watikuyanjani ukongwa? Ŵerengani Salimo 104:14, 15 ndipuso 1 Yohane 4:9, 10, pavuli paki kambiskanani mafumbu yanga:
-
Kumbi ndi mphasu nizi zakutuliya kwaku Yehova zo yimwi muwonga ukongwa?
-
Kumbi mphasu zenizi zitikuchitiskani kuti mumuwonengi wuli Yehova?
Asani talonde mphasu yo takondwa nayu ukongwa, tiyesesa kumuwonga munthu yo watipaska. Ŵerengani Dotoronome 16:17, pavuli paki kambiskanani fumbu ili:
-
Asani muŵanaŵaniya vosi vo Yehova wakuchitiyani pa umoyu winu, kumbi mungayanja kumupaskanji?
5. Mutumbikikengi ukongwa asani mungajipereka kwaku Yehova
Ŵanthu anandi agomezga kuti kutchuka, kugwira ntchitu yamampha ndipuso ndalama, ndivu vingaŵawovya kuti akondwengi. Kumbi venivi vauneneska? Woneriyani VIDIYO, pavuli paki kambiskanani mafumbu yanga:
-
Chinanga kuti munthu yo tawona mu vidiyo wayiyanjanga ukongwa bola, ntchifukwa wuli wanguleka ntchitu yaki?
-
Iyu wangusankha kujipereka kwaku Yehova mumalu mwakujipereka ku bola. Kumbi muwona kuti wangusankha umampha? Ntchifukwa wuli muwona viyo?
Wakutumika Paulo wechendaje Mkhristu, watingi wasaniyengi ntchitu yapachanya. Iyu wangusambizika marangu nga Ayuda ndi msambizi wakutchuka ukongwa. Kweni wanguleka vosi ivi kuti waje Mkhristu. Kumbi Paulo wakudandawulapu chifukwa chakuleka venivi? Ŵerengani Afilipi 3:8, pavuli paki kambiskanani mafumbu yanga:
-
Ntchifukwa wuli Paulo wangukamba kuti vinthu vosi vo wangutaya wechendaje Mkhristu waviwonanga “nge vakunkhandu,” pamwenga kuti vimalala?
-
Nanga iyu wangusaniyanji?
-
Kumbi chilipu chinthu chinyaki cho mungachiyeruzgiya ndi kuteŵete Yehova pa umoyu winu?
Paulo wati waja Mkhristu wangusaniya chinthu chakukhumbika ukongwa kuluska vosi vo wangutaya
ŴANTHU ANYAKI AKAMBA KUTI: “Nkhutaya waka nyengu kujipereka kwaku Chiuta.”
-
Ntchifukwa wuli yimwi muwona kuti kujipereka kwaku Yehova nkhwamampha?
KUMBI MWASAMBIRANJI?
Titijipereka kwaku Yehova ndi kubatizika chifukwa chakuti titimuyanja.
Kuweriyamu
-
Ntchifukwa wuli tikhumbika kwanja kweniso kusopa Yehova ndi mtima widu wosi?
-
Kumbi Yehova watiŵatumbika wuli Akaboni ŵaki akubatizika?
-
Kumbi yimwi mungayanja kujipereka kwaku Yehova?
FUFUZANI
Wonani chifukwa cho munthukazi munyaki yo wambanga sumu kweniso munthulumi munyaki yo wayanjanga ukongwa bola angusankhiya kujipereka kwaku Yehova.
Vo Achinyamata Afumba—Kumbi Ndichitengenji pa Umoyu Wangu?—Kukumbuka Vakuvuli (6:54)
Wonani vifukwa vinyaki vo mungasankhiya kujipereka kwaku Yehova.
“Ntchifukwa Wuli Mukhumbika Kujipereka kwaku Yehova” (Chigongwi cha Alinda, January 15, 2010)
Mu sumu iyi wonani mo ŵanthu wo asankha kujipereka kwaku Yehova akondwe.
Mu nkhani yamutu wakuti “Kwa Vyaka Vinandi Ndajifumbanga Kuti, ‘Ntchifukwa Wuli Chiuta Wakutilenga?’” wonani vo vinguchitiska munthukazi munyaki kuti waŵanaŵaniyepu so pa vo wawonanga kuti vakukhumbika ukongwa.
“Bayibolu Lisintha Ŵanthu” (Chigongwi cha Alinda, November 1, 2012)
Mungayanja Kuŵerenga so Nkhani Izi
MAFUMBU NGO ŴANTHU AFUMBA KAŴIKAŴI
Kumbi Sambiru la Bayibolu lo Akaboni aku Yehova Achitiska Ntchinthu Wuli?
Kuziya mu pulogilamu yawezi ya kusambira Bayibolu ndi Akaboni aku Yehova, mungagwiriskiya ntchitu Bayibolu lelosi. Mungadaniyaku banja linu losi pamwenga mabwezi nginu pa sambiru.
