Angelu wosi wo Yehova wangulenga ŵenga amampha. Pavuli paki mungelu yumoza wangusambuka muheni. Iyu ndi Satana Diabolo. Satana wakhumbanga kuti ŵanthu pacharu chapasi asopengi iyu m’malu mwaku Yehova. Vo vinguchitika ndi ivi:

Mu munda wa Edene, mwenga vimiti vinandi vo venga ndi vipasu vakunowa. Yehova wangukambiya Adamu ndi muwolu waki Eva kuti aryengi vipasu ivi mwawanangwa. Kweni penga chimiti chimoza cho Chiuta wanguŵakaniza kurya. Iyu wanguŵakambiya kuti asani ŵarya afwengi.—Chiyambo 2:9, 16, 17.

Zuŵa linyaki Eva wenga yija pa nyengu yo njoka yingulongoro nayu. Kweni yo yaŵereŵetanga yenga njoka chayiyu cha; wenga Satana Diabolo yo wanguchitiska kuti njoka yije nge kuti yiŵereŵeta. Satana wangukambiya Eva kuti asani wangarya chipasu cha m’chimiti cho angukanizika, wajengi ndi zeru nge Chiuta. Iyu wangumukambiya so kuti wafwengi cha. Fundu zosi ziŵi izi zenga zaboza. Kweni Eva wanguvwiya Satana ndi kurya chipasu. Pavuli paki wangupaskaku Adamu, ndipu nayu so wangurya.—Chiyambo 3:1-6

Nkhani iyi yititisambiza kuti Satana ngwakugaruka ndipuso ngwaboza. Iyu wangukambiya Eva kuti asani waleka kuvwiya Chiuta wafwengi cha. Ili lenga boza likulu. Eva wangufwa ndipu Adamu nayu so wangufwa. Satana wangufwa nyengu yeniyo cha, kweni wazamukufwa kunthazi chifukwa wakubuda. Kweni pasonupanu, iyu ngwamoyu ndipu walutirizga kulandizga ŵanthu. Iyu weche waboza, ndipu watesesa kuchitiska kuti ŵanthu aswengi marangu ngaku Chiuta.—Yoha. 8:44.

Pavuli paki, angelu anyaki nawu anguja aheni. Angelu yaŵa anguwona anthukazi akutowa pacharu chapasi ndipu akhumbanga kugona nawu. Mwaviyo, anguza pacharu chapasi ndi kuvwala maliŵavu nga ŵanthu anthurumi. Pavuli paki angujitole anthukazi. Ivi venga vakususkana ndi khumbu laku Chiuta.—Chiyambo 6:1, 2; Yuda 6.

Vingwambiska so masuzgu nganandi ku mtundu wa ŵanthu. Anthukazi wo angutorana ndi angelu yaŵa angubala ŵana, kweni ŵenga nge ŵana anyaki cha. Yiwu angukuwa ndi kuja vinkhara vachiwawa kweniso vankhaza. Mukuluta kwa nyengu charu chinguzaza ndi vinthu vachiwawa mwakuti Yehova wangusankha kuti wanangi ŵanthu aheni ndi zandi mukulu. Munthu murunji Nowa ndi banja laki ndiwu angupozomoka Zandi uyu.—Chiyambo 6:4, 11; 7:23.

Angelu aheni anguwere kuchanya; yiwu angufwa cha. Kweni angupaskika chilangu. Yiwu anguzomerezgeka cha kuti akaje so ndi banja laku Chiuta la angelu arunji. Ndipuso Yehova wanguŵazomerezga so cha kuvwala maliŵavu nga ŵanthu. Ndipu mukuluta kwanyengu azamukufwa pa cheruzgu chikulu.—2 Petro 2:4; Yuda 6.

Mu 1914, nkhondu yingwamba kuchitika kuchanya. Buku la m’Bayibolo la Chivumbuzi likonkhoska vo vinguchitika kuti: “Ndipu yengaku nkhondu kuchanya: Mikaele [Yesu Khristu yo wanguyuskika] ndi angelu ŵaki [amampha] ŵangurwa nchalinda yo [Satana]; ndipu wangurwa nchalinda, ndi angelu ŵaki [aheni]. Kweni angupundika; ndipu kuti ngangusanirika so cha malu ngawu kuchanya. Ndipu wanguponyeka pasi nchalinda yo mukuru, njoka yo yamwaka, wakuzumbulika Diabolo ndi Satana, murandizgi wa pasi iyu ndi ŵangelu ŵaki [aheni] pamoza nayu.”

Kumbi vakutuwapu vaki venga vakuti wuli? Nkhani iyi yilutirizga kuti: “Kondwereni pa chifukwa chenichi, mwamachanya mwe, ndi mwaŵakuja mwenimo!” Angelu amampha akhumbikanga kukondwa chifukwa chakuti kuchanya kwengavi so Satana ndi angelu ŵaki aheni pamwenga kuti mizimu. Kweni nanga ŵanthu a pacharu chapasi? Bayibolo likamba kuti: “Kweni owe [soka], charu ndi nyanja; pakuti Diabolo yo wasikiya kwaku imwi, wakuŵa ndi kandundu kakuru, pakuziŵa kuti nyengu yaki njimanavi.”—Chivumbuzi 12:7-9, 12.

Satana ndi angelu ŵaki aheni alandizga ŵanthu pacharu ndi kuŵachitiska kuti akumanengi ndi masoka ngakulu. Angelu aheni yaŵa adanika kuti viŵanda. Yiwu mbarwani aku Chiuta. Ndipu wosi mbaheni.