Dauda wakonkhoska kuti: “Ndikukuliya mu muzi unyaki umana wa kunkhondi kwa boma linyaki mu charu cha Sierra Leone. Pa nyengu yo ndenga mwanamana, banja lidu lingupindana ndi banja linyaki pa nkhani ya malu. Wosi alimbirananga malu ngamoza. Kuti mphindanu iyi yimali, angudana ng’anga. Ng’anga iyi yingupaska munthu munyaki gilasi, pavuli paki yingumudika salu yituŵa. Pati papita kanyengu kamanavi, munthu yo angumudika salu wangwamba kunjenjeme ndi kutuwa vuchi. Wati walereska pa gilasi wangukambula kuti: ‘Ndiwona munthu wakukota watuza kunu! Wavwala malaya ngatuŵa. Munthu uyu ndi mtali kweniso wakukota, sisi laki losi ndi mbuha pe, ndipu watenda mwakukotamaku kamanavi.’”

“Munthu uyu wakambanga Ambuya anthurumi! Wangutimbanyizika maŵanaŵanu ndipu wangudanirizga kuti: ‘Asani muvwana cha, zani muzijiwone mwija!’ Kweni pengavi yo wenga ndi chiganga kuti wawoni vo munthu uyu wakambanga! Munthu uyu wanguleka vakulaŵantha ng’anga yati yamumijiya munkhwala wa masenga wakusaza mani ndi maji ngo wanguŵika mujomela.

“Ambuya anthurumi angulongoro kuziya mwa munthu yo wenga ndi gilasi kuti malu ngo ngenga nga banja lidu. Yiwu angukambiya ambuya anthukazi kuti agwiriskiyi nchitu malu yanga kwambula kopa munthu weyosi. Mphindanu iyi yingumaliya penipo.”

 Vakuchitika vangeti ivi vachilendu cha kunu ku Zambwi kwa Africa. Nge mo viliri ku Zambwi kwa Africa, mu vigaŵa vinandi va charu chapasi ŵanthu mamiliyoni nganandi agomezga kuti ŵanthu akufwa atachija so ndi umoyu ku charu cha mizimu, ko awona ndipuso kukambiskana ndi ŵanthu amoyu wo ŵe pacharu chapasi. Kumbi chigomezgu ichi nchauneneska? Kumbi ŵanthu akufwa mbamoyu nadi? Asani mbamoyu cha, nanga mbayani wo akamba kuti ndi mizimu ya ŵanthu akufwa? Kuziŵa uneneska wa mafumbu yanga nkhwakukhumbika ukongwa. Nkhani iyi njakukwaskana ndi umoyu kweniso nyifwa.