Josiya wangwamba kulamuliya Yuda we ndi vyaka 8. Munyengu yeniyi, ŵanthu achitanga vinthu vamizimu ndi kusopa angoza. Pa nyengu yo Josiya wenga ndi vyaka 16, wanguyesesa kusambira mo wangasope Yehova mu nthowa yakwenere. Po wenga ndi vyaka 20, wangwamba kuphwanya angoza ndi maguŵa nga sembi mucharu chosi cha Yuda. Pa nyengu yo Josiya wenga ndi vyaka 26, wanguŵanaŵana kuti nyumba yaku Yehova yinozgeki.

Wasembi mura Hilkiya wangusaniya mpukutu wa Marangu ngaku Yehova munyumba yakusopiyamu. Panyaki mpukutu wenuwu wenga wo wangulemba Mozesi. Shafani yo wenga mulembi wa fumu wangupereka mpukutu wo kwaku Josiya. Pavuli paki, Shafani wangwamba kuŵerenga Marangu ngo mwakukweza. Pa nyengu yo Josiya wavwisiyanga, wanguziŵa kuti ŵanthu anguleka kuvwiya Yehova kwa vyaka vinandi. Fumu Josiya yingukambiya Hilkiya kuti: ‘Yehova wakwiya nasi ukongwa. Luta ukakambisani nayu. Yehova wamukamba vakuti tichiti.’ Yehova wangumuka kuporote mwa muchimi munthukazi Hulda kuti: ‘Ayuda andileka. Yiwu azamulangika pa nyengu yo Josiya wazituwapu pa ufumu chifukwa wangujiyuyuwa.’

Fumu Josiya yati yavwa mazu yanga, yinguluta ku nyumba yakusopiyamu ndipu yingudana ŵanthu a ku Yuda. Pavuli paki, yinguŵerenga Marangu ngaku Yehova mwakukweza ku mtundu wosi. Josiya ndi ŵanthu wosi, angulayizga kuti avwiyengi Yehova ndi mtima wawu wosi.

 Ayuda anguja vyaka vinandi kwambula kuchita mwambu wa Phaska. Josiya wati waŵerenga mu Marangu kuti akhumbikanga kuchita Phaska chaka chechosi, wangukambiya mtundu wenuwu kuti: ‘Tichitengi Phaska kwaku Yehova.’ Josiya wangunozga kuti wapereki sembi zinandi kweniso kuti panyumba yakusopiyamu paŵi ŵanthu akumba sumu. Ayisraele anguchita Phaska. Pavuli paki anguchita Phwandu la Chiŵandi Chambula Kufufuma kwa mazuŵa 7. Pengavi Phaska laviyo lo linguchitikapu kutuliya mu mazuŵa ngaku Samuele. Josiya wangungayanja ndi mtima wosi marangu ngaku Chiuta. Kumbi utanja kusambira zaku Yehova?