1. Kumbi ndi pempheru nili lakuziŵika ukongwa lo tikambisanengi?

ŴANTHU mamiliyoni nganandi atiliziŵa pempheru lakuziŵika ukongwa lakuti, Ada Ŵidu akuchanya pamwenga kuti, Pempheru la Ambuya. Yesu wangugwirisiya ntchitu pempheru lenili pakusambiza akusambira ŵaki mo angapemphere. Kumbi wangukambanji mu pempheru lenili? Nanga ndakukhumbika wuli kwaku isi?

2. Ndi vinthu vitatu nivi vo Yesu wakutisambiza kuti tipempheriyengi?

² Yesu wanguti: “Imwi mutenere kupemphera viyo: ‘Ada ŵidu akuchanya, zina linu lipaturiki [pamwenga kuti litoweseki]. Ufumu winu uzi. Khumbu linu lichitiki, kuchanya kweniso pacharu chapasi.’” (Ŵerengani Mateyu 6:9-13.) Ntchifukwa wuli Yesu wakutikambiya kuti tipempheriyengi vinthu vitatu venivi?—Wonani Fundu Yakukumaliya ya nambala 20.

3. Kumbi tisambirengi vinthu nivi vakukwasana ndi Ufumu waku Chiuta?

³ Tikusambira kuti zina laku Chiuta ndi Yehova. Takambisana so vo Chiuta wakhumba kuzichitiya ŵanthu ndipuso vo wazamuchita ndi charu chapasi. Kumbi Yesu wang’anamuwanganji pakukamba kuti: “Ufumu winu uzi”? Tisambirengi vo Ufumu waku Chiuta ung’anamuwa, vo wazamuchita ndipuso mo wazamutowese zina laku Chiuta.

4. Kumbi Ufumu waku Chiuta ntchinthu wuli, nanga Fumu ya Ufumu wenuwu ndiyani?

⁴ Yehova wakujalikisa boma kuchanya ndipu wakusankha Yesu kuti waje Fumu. Bayibolu likamba kuti boma  lenili ndi Ufumu waku Chiuta. Yesu ndi “Fumu yaku wo alamuliya nge mafumu ndipuso Mbuya waku wo alamuliya nge ambuya.” (1 Timote 6:15) Iyu wachita vinthu umampha ukongwa ndipu ngwanthazi kuphara mafumu ngosi ngo nge pacharu chapasi.

5. Kumbi boma laku Chiuta le pani, nanga lazamulamuliyanji?

⁵ Yesu wanguwere kuchanya pati pajumpha mazuŵa 40 kutuliya po wanguyusikiya. Pavuli paki, Yehova wangumuŵika kuti waje Fumu ya Ufumu waki. (Machitidu 2:33) Boma laku Chiuta le kuchanya ndipu lazamulamuliya charu chapasi. (Chivumbuzi 11:15) Ndichu chifukwa chaki Bayibolu likamba kuti ndi “Ufumu wakuchanya.”—2 Timote 4:18.

6, 7. Kumbi Yesu wapambana wuli ndi mafumu nganyaki ngosi?

⁶ Bayibolu likamba kuti Yesu wapambana ndi mafumu ngosi nga pacharu chapasi chifukwa “ndiyu yija yo wangafwa cha.” (1 Timote 6:16) Mafumu ngosi nga pacharu chapasi ngatufwa, kweni Yesu wazamukufwa cha. Iyu wazakutichitiya vinthu vamampha mpaka muyaya.

⁷ Bayibolu likukambiya limu kuti Yesu wazamuja Fumu yambula kwanjiya ndipuso yalisungu. Ilu likamba kuti: “Mzimu waku Yehova wazamukuŵa paku iyu, mzimu wa zeru ndi wakuvwisa vinthu, mzimu wakuchenya ndi wanthazi, mzimu wakuziŵa vinthu ndi wakopa Yehova. Iyu wazamukondwa ndi kopa Yehova. Wazamuyeruza chifukwa cha vo wawona ndi masu ngaki cha, pamwenga kuchenya chifukwa cha vo wavwa ndi makutu ngaki. Wazamuyeruza ŵanthu akusika [pamwenga kuti, akavu] mwaurunji.” (Yesaya 11:2-4) Kumbi mungayanja kuja ndi fumu yaviyo?

8. Kumbi tiziŵa wuli kuti Yesu wazamulamuliya yija cha?

⁸ Chiuta wakusankha so ŵanthu anyaki kuti akalamuliyi limoza ndi Yesu mu boma la kuchanya. Mwakuyeruziyapu, wakutumika Paulo wangukambiya Timote kuti: “Asani  tilutirizengi kukunthiyapu, tazamulamuliya limoza ndi iyu nge mafumu.” (2 Timote 2:12) Kumbi mbalinga wo azamulamuliya limoza ndi Yesu?

9. Kumbi mbanthu alinga wo amulamuliya ndi Yesu, nanga Chiuta wakwamba zukwanji kuŵasankha?

⁹ Nge mo tingusambiriya mu Mutu 7, wakutumika Yohane wanguwona Yesu wachilamuliya nge Fumu kuchanya ndipu wenga limoza ndi mafumu nganyaki 144,000. Kumbi a 144,000 mbayani? Yohane wangukonkhosa kuti yiwu “akulembeka zina [laku Yesu] ndipuso la Awisi pavisu vawu.” Wangukamba so kuti: “Yaŵa mbeniwo alondo Mwana wambereri [yo ndi Yesu] kwekosi ko waluta. Yiwu akugulika kutuwa mu ŵanthu.” (Ŵerengani Chivumbuzi 14:1, 4.) Ŵanthu yaŵa mbakhristu akugomezeka wo Chiuta wakusankha kuti ‘azilamuliyi charu chapasi nge mafumu’ limoza ndi Yesu. Asani yiwu ŵafwa, ayusika ndipu aluta kuchanya. (Chivumbuzi 5:10) Kwambiya mu nyengu ya akutumika, Yehova waja wachisankha Akhristu akugomezeka kuti aje mukagulu ka mafumu 144,000.

10. Ntchifukwa wuli tingakamba kuti Yehova watitiyanja pakusankha Yesu ndi ŵanthu 144,000 kuti azitilamuliyi?

¹⁰ Yehova watitiyanja ukongwa ndichu chifukwa chaki wasankha ŵanthu kuti akalamuliyi limoza ndi Yesu. Yesu wazakutilamuliya umampha chifukwa waziŵa vo vititichitikiya kweniso masuzu ngo tikumana nangu. Paulo wangukamba kuti Yesu ‘watitilenge lisungu pa vinthu vo titondeka kufiska,’ ndipu iyu “wakuyeseka mu vinthu vosi nge isi.” (Ŵahebere 4:15; 5:8) Akhristu a 144,000 nawu so aziŵa masuzu ngo ŵanthu akumana nangu. Nawu akusuzikapu chifukwa cha ubudi kweniso matenda. Mwaviyo, te ndi chigomezu kuti Yesu ndi a 144,000 azamuvwisa mo tazamuchitiya chifukwa cha masuzu ngo tazamukumana nangu ndipuso maŵanaŵanu ngo tazamuja nangu chifukwa chakuti ubudi wazamumala kamanakamana.

11. Ntchifukwa wuli Yesu wangukambiya akusambira ŵaki kuti apempheriyengi khumbu laku Chiuta kuti lichitiki kuchanya?

¹¹ Ntchifukwa wuli Yesu wangukambiya akusambira ŵaki kuti apempheriyengi khumbu laku Chiuta kuti lichitiki kuchanya? Mu Mutu 3, tingusambira kuti Satana Dyaboli wakugalukiya Yehova. Yehova wangumudikisa dankha cha Satana limoza ndi angelu ŵaki ndipu angulutiriza kuja kuchanya kwa kanyengu. Mwaviyo, mbangelu wosi cha kuchanya wo achitanga khumbu laku Chiuta. Mu Mutu 10, tazamusambira vinandi vakukwasana ndi Satana ndipuso angelu anyaki aheni.

12. Ndi vinthu viŵi nivi vakukhumbika ukongwa vo vikonkhoseka pa lemba la Chivumbuzi 12:10?

¹² Bayibolu lingukambiya limu kuti asani Yesu wazija ŵaka Fumu ya Ufumu waku Chiuta, wazamuchita nkhondu ndi Satana. (Ŵerengani Chivumbuzi 12:7-10.) Vesi 10 likonkhosa vinthu viŵi vakukhumbika ukongwa. Chakwamba Yesu Khristu watamba kulamuliya mu Ufumu waku Chiuta ndipu chachiŵi Satana wadikisika kuchanya ndi kuponyeka pacharu chapasi. Nge mo tisambiriyengi, vinthu venivi vikuchitika kali.

13. Ntchinthu wuli chinguchitika kuchanya Satana wati wadikisika?

¹³ Bayibolu likonkhosa mo angelu akugomezeka angukondwe Satana ndi angelu aheni ŵati adikisika kuchanya. Ilu likamba kuti: “Kondwani imwi mwamachanya ndi imwi muja kweniko!” (Chivumbuzi 12:12) Mwaviyo, sonu kuchanya kwe chimangu kweniso angelu wosi mbakukoliyana chifukwa achita khumbu laku Chiuta.

14. Kumbi ndi vinthu wuli vo vichitika pacharu chapasi chifukwa chakuti Satana wakudikisika kuchanya?

¹⁴ Kweni pacharu chapasi vinthu ve umampha cha. Ŵanthu asuzika ukongwa ‘chifukwa Dyaboli wakusikiya’ pacharu chapasi, ndipu we ndi “ukali ukulu chifukwa  waziŵa kuti waja ndi kanyengu kamanavi.” (Chivumbuzi 12:12) Satana ngwakukwiya ukongwa. Iyu wakudikisika kuchanya ndipu waziŵa kuti wabayikengi pambula kuswera yapa. Mwaviyo, iyu watesesa kwambisa masuzu ngakupambanapambana pacharu chosi chapasi.

15. Kumbi Chiuta wakhumba kuchitanji pacharu chapasi?

¹⁵ Chiuta walekengi cha kufiska vo wakhumbanga kuchita pacharu chapasi. Iyu wakhumba mbwenu kuti muparadayisu muzije ŵanthu ambula ubudi ndipu azije ndi umoyu wamuyaya. (Sumu 37:29) Kumbi Ufumu waku Chiuta ufiskengi wuli venivi?

16, 17. Kumbi lemba la Danyele 2:44 lititikambiyanji za Ufumu waku Chiuta?

¹⁶ Bayibolu likukambiya limu pa Danyele 2:44 kuti: “Mumazuŵa nga mafumu ngenanga, Chiuta wakuchanya wazamujalikisa ufumu wo wazamubwangandulika cha, ndipu ufumu waki wazamuperekeka ku mtundu wewosi cha wa ŵanthu. Kweni wazamuphwanya maufumu ngosi, ndipu wazamulamuliya mpaka muyaya.” Kumbi tisambiranji pa lemba lenili vakukwasana ndi Ufumu waku Chiuta?

¹⁷ Chakwamba, lemba lenili likamba kuti Ufumu waku Chiuta wazamukwamba kulamuliya “mumazuŵa nga mafumu ngenanga.” Ivi ving’anamuwa kuti Ufumu waku Chiuta uchiyamba kulamuliya, patingi paŵengi mbwenu maboma nganyaki pacharu chapasi. Chachiŵi, lititikambiya kuti Ufumu waku Chiuta wazamulamuliya mpaka muyaya ndipu pazamuŵavi boma linyaki lelosi lo lazamusere m’malu mwaki. Ndipu chachitatu, Ufumu waku Chiuta wazamuchita nkhondu ndi maboma nganyaki nga pacharu chapasi. Ufumu wenuwu wazamutuzapu maboma ngosi ndipu ndiwu wija wazamulamuliya charu. Ivi vazamuchitisa kuti ŵanthu azilamulikengi ndi boma lamampha ukongwa.

18. Kumbi nkhondu yakumaliya yo Ufumu waku Chiuta wazamuchita ndi maboma nga ŵanthu yidanika kuti wuli?

 ¹⁸ Kumbi Ufumu waku Chiuta wazamuchita wuli kuti uyambi kulamuliya charu? Nkhondu yakumaliya yo yidanika kuti Aramagedoni yechendayambi, angelu aheni azamupusisa “mafumu nga pacharu chosi ndi kungawunganisa pamoza ku nkhondu ya zuŵa likulu laku Chiuta Wanthazizosi.” Mwaviyo, mafumu nga pacharu pamwenga kuti maboma nga ŵanthu ngazamulimbana ndi Ufumu waku Chiuta.—Chivumbuzi 16:14, 16; wonani Fundu Yakukumaliya ya nambala 10.

19, 20. Ntchifukwa wuli tikhumbika Ufumu waku Chiuta?

¹⁹ Ntchifukwa wuli tikhumbika Ufumu waku Chiuta? Pe vifukwa vikuluvikulu vitatu. Chakwamba te akubuda, titama kweniso titufwa. Kweni Bayibolu likamba kuti asani Ufumu waku Chiuta waziyamba kulamuliya charu chapasi, tazamuja ndi umoyu wamuyaya. Lemba la Yohane 3:16 likamba kuti: “Chiuta wanguchiyanja ukongwa charu mwakuti wangupereka Mwana waki wapade, kuti weyosi yo wavwana mwaku iyu wangafwanga cha kweni waje ndi umoyu wamuyaya.”

²⁰ Chifukwa chachiŵi cho tikhumbikiya Ufumu waku Chiuta ntchakuti, ŵanthu anandi achita vinthu viheni. Yiwu apusika, avwiya marangu cha ndipuso ŵe ndi mijalidu yiheni. Palivi cho tingachita kuti tiŵatuzepu ŵanthu ŵenaŵa kweni Chiuta wazakuŵatuzapu. Ŵanthu wo alutiriza kuchita vinthu viheni azamubayika pa nkhondu ya Aramagedoni. (Ŵerengani Sumu 37:10.) Chifukwa chachitatu ntchakuti, maboma nga ŵanthu ngatondeka kutuzapu masuzu, ngankhaza ndipuso ngachinyengu. Maboma ngenanga ngakhumba cha kuwovya ŵanthu kuti avwiyengi Chiuta. Bayibolu likamba kuti “munthu wapweteka munthu munyaki pakumulamuliya.”—Wakutaula 8:9.

21. Kumbi Chiuta wazamufiska wuli khumbu laki pacharu chapasi mwakugwirisiya ntchitu Ufumu waki?

 ²¹ Pavuli pa Aramagedoni, Chiuta wazamugwirisiya ntchitu Ufumu waki kuti wafiski khumbu laki pacharu chapasi. Mwakuyeruziyapu, Ufumu waki wazamutuzapu Satana ndi angelu aheni. (Chivumbuzi 20:1-3) Asani venivi vazichitika, palivi yo wazamutama ndi kufwa. Ŵanthu wosi akugomezeka azamuja kwamuyaya mu Paradayisu chifukwa cha sembi yaku Yesu. (Chivumbuzi 22:1-3) Ufumu wenuwu wazamutowesa zina laku Chiuta. Kumbi venivi ving’anamuwanji? Ving’anamuwa kuti asani boma laku Chiuta laziyamba kulamuliya charu chapasi, ŵanthu wosi azamutumbika zina laki.—Wonani Fundu Yakukumaliya ya nambala 21.

22. Kumbi tiziŵa wuli kuti Yesu wangupasika Ufumu pa nyengu yo wenga pacharu chapasi cha pamwenga wati wayusika ŵaka?

²² Yesu wangukambiya akusambira ŵaki kuti apempherengi kuti: “Ufumu winu uzi.” Venivi vilongore limu kuti boma laku Chiuta latingi lizengi kunthazi. Yehova wakhumbikanga dankha kujalikisa boma laki kuti Yesu waje Fumu. Kumbi Yesu wanguŵikika kuja Fumu wati wawere ŵaka kuchanya? Awa, wakhumbikanga dankha kulindiza.  Nyengu yinyaki, pavuli pakuti Yesu wayusika, Petro ndi Paulo angukamba fundu yeniyi mwakuvwika umampha achikamba zaku Yesu ndipu angugwirisiya ntchitu uchimi wa pa Sumu 110:1. Mu uchimi wenuwu, Yehova wangukamba kuti: “Ja kujanja langu lamaryi mpaka po ndiŵikiyengi arwani ŵaku nge chakukandapu marundi ngaku.” (Machitidu 2:32-35; Ŵahebere 10:12, 13) Kumbi Yesu wakhumbikanga kulindiza kwa nyengu yitali wuli kuti Yehova wamuŵiki kuja Fumu?

23. (a) Kumbi Yesu wakwamba zukwanji kulamuliya nge Fumu ya Ufumu waku Chiuta? (b) Kumbi tisambirengenji mu Mutu 9?

²³ Kwa vyaka vinandi chaka cha 1914 chechendafiki, Akhristu aunenesa anguziŵa kuti mu chaka chenichi uchimi wa m’Bayibolu wazamufiskika. Vo vinguchitika pacharu chosi kwambiya mu chaka chenichi vingulongo kuti anenesanga nadi. Yesu wangwamba kulamuliya nge Fumu mu chaka chenichi. (Sumu 110:2) Ivi vati vachitika, Satana wanguponyeka pacharu chapasi ndipu sonu “waja ndi kanyengu kamanavi.” (Chivumbuzi 12:12) Mu Mutu 9, tiwonengi maukaboni nganandi ngo ngalongo kuti tija nadi mu nyengu yeniyi. Tisambirengi so kuti pambula kuswera yapa, Chiuta wagwirisiyengi ntchitu Ufumu waki kuti wafiski khumbu laki pacharu chapasi.—Wonani Fundu Yakukumaliya ya nambala 22.