Chiuta wangusankha mphapu yaku Abrahamu kuti uje mtundu ukulu ndipu wanguwupaska marangu ngakupambanapambana. Mtundu wenuwu wanguwudana kuti “Isirayeli” ndipu wanguwusankha kuti umusopengi mwauneneska ndi kuvwiya mazu ngaki. (Masalimo 147:19, 20) Mwaviyo, ŵanthu anyaki wosi atingi atumbikikengi kuziya mumtundu wa Isirayeli.​—Ŵerengani Genezesi 22:18.

Chiuta wangusankha Ayisirayeli kuti aje akaboni ŵaki. Mbiri yawu yilongo kuti vinthu vingaŵayende umampha ŵanthu pijapija asani avwiya marangu ngaku Chiuta. (Dotoronome 4:6) Mwaviyo, ŵanthu anandi atingi aziŵengi Chiuta wauneneska kuziya mumtundu wa Ayisirayeli.​—Ŵerengani Yesaya 43:10, 12.

Mukuluta kwa nyengu, Yehova wanguleka kwanja mtundu wa Yisirayeli, mumalu mwaki wangusankha mpingu wachikhristu. (Mateyu 21:43; 23:37, 38) Mazuŵa nganu, mumalu mwa mtundu wa Yisirayeli Akhristu auneneska ateŵete Yehova nge akaboni ŵaki.​—Ŵerengani Machitidu 15:14, 17.

Yesu wangusankha akusambira ŵaki kuti apharazgiyengi ŵanthu a mitundu yosi ndi kupanga akusambira. (Mateyu 10:7, 11; 24:14; 28:19, 20) Ntchitu iyi yaluta panthazi ukongwa mu nyengu yinu yakumaliya. Yaka nkhakwamba mu mbiri yosi kuti Yehova wawunganiski ŵanthu mamiliyoni nganandi viyo kutuliya mu mitundu yosi kuti amusopengi mwauneneska. (Chivumbuzi 7:9, 10) Chiuta wakusankha Akhristu auneneska kuti aje gulu laki kweniso kuti achiskanengi ndi kuwovyana. Pacharu chosi chapasi, yiwu atende pulogilamu yakuyanana yakusambiriya Bayibolu pa maunganu ngawu.​—Ŵerengani Aheberi 10:24, 25.

Mu 1870, kagulu ka akusambira Bayibolu kangwamba kusaniya uneneska wa mu Bayibolu wo ungubisika kwa nyengu yitali. Yiwu angwamba ntchitu yakupharazga Ufumu waku Chiuta pacharu chosi chifukwa aziŵanga kuti Yesu wakwambisa mpingu wachikhristu kuti upharazgengi. Mu 1931, kagulu yaka kangwamba kuziŵika ndi zina lakuti Akaboni aku Yehova.​—Ŵerengani Machitidu 1:8; 2:1, 4; 5:42.

Mu nyengu ya akutumika, vinthu vayendanga umampha ukongwa mumipingu yosi yachikhristu chifukwa cha wupu wakulongozga wo walongozgekanga ndi Yesu yo ndi Mutu wa mpingu. (Machitidu 16:4, 5) Mazuŵa nganu napu, vinthu vitenda umampha ukongwa mugulu la Akaboni aku Yehova pacharu chosi chapasi chifukwa cha kuja ndi Wupu Wakulongozga wo we ndi ŵara wo aziŵa vinthu vinandi. Wupu uwu uwonere ntchitu zo zichitika mu maofesi nga Akaboni aku Yehova ngo ngafwatuliya, kusindikiza ndi kutumiza mabuku ngakusambiriya Bayibolu mu vineneru vakujumpha 600. Mwaviyo, Wupu Wakulongozga upereka ulongozgi wa mu Malemba ku mipingu yakujumpha 100,000 pacharu chosi chapasi. Mumpingu wewosi, mwe abali akwenere wo ateŵete nge ŵara pamwenga kuti akulongozga. Yiwu aphwere mskambu waku Chiuta mwachanju.​—Ŵerengani 1 Peturo 5:2, 3.

Akaboni aku Yehova agwira ntchitu yakupharazga uthenga wamampha ndi kovya ŵanthu kuti aje akusambira. Nasi tipharazga nyumba ndi nyumba nge mo achitiyanga akutumika. (Machitidu 20:20) Tisambira so Bayibolu ndi ŵanthu amtima wamampha wo atanja uneneska. Kweni Akaboni aku Yehova ndi gulu ŵaka cha. Te ŵana a banja limoza ndipu Awusefwi mbachanju. Kweniso ndisi abali ndi azichi ndipu titanjana ndi kuphweriyana. (2 Atesalonika 1:3) Ŵanthu aku Yehova ndi banja lalikondwa chifukwa ndi gulu lo lichita vinthu mwakukoliyana pacharu chosi kuti akondwesi Chiuta ndipu atovya ŵanthu anyaki kuti nawu achitengi so viyo.​—Ŵerengani Masalimo 33:12; Machitidu 20:35.