Mu visopa vosi musanirika ŵanthu anyaki amtima wamampha. Ndi nkhani yakukondwesa ukongwa kuziŵa kuti Chiuta watiŵawona ŵanthu ŵenaŵa ndipu watiŵaŵanaŵaniya. Kweni chakupaska chitima ntchakuti ŵanthu anandi agwiriskiya ntchitu chisopa pakuchita vinthu viheni. (2 Akorinto 4:3, 4; 11:13-15) Malipoti nganandi ngalongo kuti visopa vinyaki vichitaku vinthu vauchigeŵenga, kubaya ŵanthu, nkhondu ndipuso kuchitiya nkhaza ŵana. Ŵanthu wo agomezga nadi Chiuta adandawula ukongwa ndi vakuchitika venivi.​—Ŵerengani Mateyu 24:3-5, 11, 12.

Chisopa chauneneska chitumbika Chiuta kweni chisopa chaboza chitimukondwesa cha. Chisopa chaboza chisambiza ŵanthu vinthu vo mu Bayibolu mulivi. Chisambiza vinthu vaboza vakukwaskana ndi Chiuta kweniso akufwa. Kweni Yehova wakhumba kuti ŵanthu aziŵi uneneska wakukwaskana ndi iyu.​—Ŵerengani Ezekiyeli 18:4; 1 Timote 2:3-5.

Fundu yakukondwesa njakuti Chiuta wanyengeka cha ndi visopa vo vikamba ŵaka pamulomu kuti vitimuyanja uku vitanja charu chaku Satana. (Yakobe 4:4) Mazu ngaku Chiuta ngakamba kuti visopa vosi vaboza ndi “Babiloni Mukulu.” Babiloni yenga tawuni yakali yo kungwambiya chisopa chaboza pavuli pa Chigumula cha mu nyengu yaku Nowa. Pambula kuswera yapa, Chiuta wavituzgengepu visopa vosi vaboza vo viryiya ŵanthu masuku pamutu.​—Ŵerengani Chivumbuzi 17:1, 2, 5, 16, 17; 18:8.

Kweni pe so uthenga unyaki wamampha. Yehova watiŵaluwa cha ŵanthu anyaki amtima wamampha wo ŵe mu visopa vaboza pacharu chosi chapasi. Iyu watiŵasambiza uneneska ŵanthu ŵenaŵa kuti aje ŵaki.​—Ŵerengani Mika 4:2, 5.

Yehova waŵanaŵaniya ŵanthu wo atanja vinthu vauneneska ndipuso vamampha. Iyu watiŵapempha kuti atuwemu mu chisopa chaboza. Ŵanthu wo atanja Chiuta akhumbisiska kusintha umoyu wawu kuti amukondwesi.​—Ŵerengani Chivumbuzi 18:4.

Mu nyengu ya akutumika, ŵanthu amtima wamampha ŵati avwa uthenga wamampha, anguwulonde mwalikondwa. Yehova wanguŵasambiza vinthu vamampha kuti akondwengi pa umoyu wawu kweniso alindizganga vinthu vamampha. Vo anguchita vingatiwovya so isi mazuŵa nganu. Yiwu anguvwiya uthenga wamampha ndipu angulongo kuti kwanja Yehova ndichu chenga chinthu chakwamba pa umoyu wawu.​—Ŵerengani 1 Atesalonika 1:8, 9; 2:13.

Yehova walonde ŵanthu wo atuwamu mu chisopa chaboza kuti aje mu banja laki la ŵanthu wo atimusopa. Asani muzomera kuchita vo Yehova wakhumba, iyu wakuyanjeningi, mujengi mu banja lachanju la ŵanthu wo atimusopa kweniso mwazamulonde umoyu wambula kumala.​—Ŵerengani Mariko 10:29, 30; 2 Akorinto 6:17, 18.

Nkhani yakuti Chiuta watuzgengepu chisopa chaboza njakukondwesa ukongwa. Cheruzgu ichi chazamuchitiska kuti ŵanthu pacharu chosi chapasi aleki kukandirizgika. Chisopa chaboza chazamulandizga so ŵanthu cha pamwenga kuŵagaŵaniska. Ŵanthu wosi azamusopa Chiuta wauneneska mwakukoliyana.​—Ŵerengani Chivumbuzi 18:20, 21; 21:3, 4.