Yesu ndi akusambira ŵaki angufika ku Betisayida. Pavuli paki, ŵanthu anguza kwaku Yesu ndi munthu wachibulumutiya ndipu angupempha Yesu kuti wamukwaski kuti iyu wachizgiki.

Yesu wangumuko pajanja munthu mwenuyu ndipu wanguluta nayu kubwalu kwa muzi. Yesu wati wamufunyiya mata mumasu, wangumufumba kuti: “Kumbi uwonanji?” Iyu wangumuka kuti: “Ndiwona ŵanthu wo awoneka nge vimiti kweni atendatenda.” (Mariko 8:23, 24) Yesu wangumukwaska so mumasu, ndipu iyu wangwamba kulereska umampha. Pavuli paki, Yesu wangumukambiya kuti wakengi kwawu ndipu wangumukambiya kuti wangalutanga mumuzi uwu cha.

Pavuli paki, Yesu ndi akusambira ŵaki anguluta kuchigaŵa cha Kayisareya wa ku Filipi. Yiwu angwenda ulendu wakujumpha mumapiri wa makilomita pafufupi 40. Muzi wa Kayisareya wenga pa malu ngakukwera pa mtunda wa mamita pafufupi 350 ndipu kunkhondi chakuvuma kwenga Phiri la Herimoni lo pasanirikanga ma ayisi. Viwoneka kuti yiwu angwenda mazuŵa ngaŵi pamwenga kujumpha kuti akafiki kumuzi wenuwu.

Ŵe munthowa pa ulendu wenuwu, Yesu wanguluta kwaku yija kuchipemphera. Kwati kwaja myezi pafufupi 9 pamwenga 10 kuti Yesu wabayiki, iyu wafipiyanga mtima akusambira ŵaki. Yapa, ndipu akusambira ŵaki anandi aleka kumulondo ndipu anyaki atenere kuti angutimbanyizgika maŵanaŵanu pamwenga anguguŵa. Panyaki akusambira ŵaki azizwanga kuti ntchifukwa wuli wangukana kuti ŵanthu amuvwaliki ufumu pamwenga ntchifukwa wuli wangukana kuŵapaska chisimikizu chakulongo kuti iyu ndiyani.

Akusambira aku Yesu ŵati aluta ko iyu wapempheranga, Yesu wanguŵafumba kuti: “Kumbi ŵanthu akamba kuti Mwana wa munthu ndiyani?” Yiwu angumuka kuti: “Anyaki akamba kuti ndi Yohane Mubatizi, anyaki atiti ndi Eliya ndipu anyaki akamba kuti ndi Yeremiya pamwenga yumoza wa achimi.” Ŵanthu aŵanaŵananga kuti Yesu wenga yumoza mwa ŵanthu ŵenaŵa ndipu wayuka kwa akufwa. Kuti Yesu waziŵi vo akusambira ŵaki aŵanaŵananga, iyu wanguŵafumba kuti: “Sonu nanga yimwi, mutiti ndini yani?” Peturo wangumuka mwaliŵiliŵi kuti: “Ndimwi Khristu Mwana waku Chiuta wamoyu.”—Mateyu 16:13-16.

Yesu wangukambiya Peturo kuti wenga wakutumbikika chifukwa Chiuta ndiyu wangumuvumbuliya venivi. Yesu wangukamba so kuti: “Nditikukambiya kuti: Yiwi ndiwi Peturo, pajalawi ili ndizengengepu mpingu wangu, ndipu nthazi ya nyifwa yazakuwuthereska cha.” Yesu wang’anamuwanga kuti iyu wazengengi mpingu ndipu nthazi ya nyifwa yazamuthereska cha ŵanthu wo ajengi mumpingu wenuwu asani alutirizga kugomezgeka pacharu chapasi. Yesu wangulayizga Peturo kuti: “Ndikupaskengi maki nga Ufumu wakuchanya.”—Mateyu 16:18, 19.

Vo Yesu wangukamba ving’anamuwa kuti wangusankha Peturo kuti we ndi udindu wapachanya kuluska akutumika anyaki cha pamwenga kuti Yesu wangusankha Peturo kuti waje fawundeshoni ya mpingu cha. Tikamba viyo, chifukwa Yesu ndiyu Mwa wo mpingu waki unguzengekapu. (1 Akorinto 3:11; Aefeso 2:20) Kweni Peturo wangupaskika maki ngatatu. Iyu wangupaskika uteŵeti wakujuliya mwaŵi ŵanthu anandi kuti azisere mu Ufumu wakuchanya.

Peturo wangugwiriskiya ntchitu maki ngakwamba pa Pentekositi mu 33 C.E., kuti walongo Ayuda wo angulapa  kweniso ŵanthu wo anguja Ayuda vo atenere kuchita kuti azitaskiki. Iyu wangugwiriskiya ntchitu maki ngachiŵi kuti wajuliyi mwaŵi Asamariya wo angwamba kugomezga Chiuta kuti azisere mu Ufumu waku Chiuta. Pavuli paki, mu 36 C.E., Peturo wangugwiriskiya ntchitu maki ngachitatu kuti ŵanthu amitundu yinyaki wo ŵenga ambula kudumulika nge Koneliyo ndi ŵanthu a mubanja laki kweniso ŵanthu anyaki, aje ndi mwaŵi wakuzisere mu Ufumu waku Chiuta.—Machitidu 2:37, 38; 8:14-17; 10:44-48.

Akusambira aku Yesu angutimbanyizgika maŵanaŵanu Yesu wati waŵakambiya limu kuti asani iyu waluta ku Yerusalemu, wamutombozgeka ndipu pavuli paki wamubayika. Chifukwa chakuti Peturo wanguziŵa cha kuti Yesu wazamuyuskika ndipu pavuli paki wazamuluta kuchanya, iyu wangutole Yesu pamphepeti ndipu wangwamba kumuchenya. Iyu wangukambiya Yesu kuti: “Jivwiyeni lisungu Ambuya, mungazomerezanga cha kuti venivi vikuchitikiyeni.” Kweni Yesu wangung’anamuka ndi kukambiya Peturo kuti: “Luta kuvuli kwangu Satana! Ndiwi chakundiguŵiska, chifukwa maŵanaŵanu ngaku, kuti ngaku Chiuta cha kweni nga ŵanthu.”—Mateyu 16:22, 23.

Pavuli paki, Yesu wangudana ŵanthu anyaki pamoza ndi akutumika ndipu wanguŵakonkhoske kuti ntchipusu cha kuti aje akusambira ŵaki. Iyu wanguŵakambiya kuti: “Asani munthu wapenja kundilondo, wajikani yija ndipu wapingi chimiti chaki chakutombozgekiyapu ndi kulutirizga kundilondo. Chifukwa weyosi yo wapenja kutaska umoyu waki, wazakuwutaya, ndipu weyosi yo wataya umoyu waki chifukwa chaku ini ndipuso chifukwa cha uthenga wamampha, wazakuwutaska.”—Mariko 8:34, 35.

Kukamba uneneska, ŵanthu wo alondonga Yesu akhumbikanga kuja ndi chiganga kweniso kujipereka kuti Yesu waŵayanjengi. Yesu wangukamba kuti: “Weyosi yo wachita soni ndi ini kweniso mazu ngangu mu mugonezi wachigololu ndipuso wakubuda uwu, Mwana wa munthu nayu wazamuchita nayu soni asani waziza limoza ndi angelu akupaturika mu unkhankhu wa Awisi.” (Mariko 8:38) Mwaviyo, pa nyengu yo Yesu waziyengi, “wazamupereka mphotu ku munthu weyosi malinga ndi jalidu laki.”—Mateyu 16:27.