Yesu wangukamba ntharika yakukonkhoska vo ŵana achita kuti wawovyi akusambira ŵaki kuja akujiyuyuwa. Yiwu akhumbikanga kuja nge ŵana anamana, wo aja akujiyuyuwa kweniso atijiwona kuti mbapachanya cha kuluska weyosi. Asani akusambira aku Yesu ‘alonde tiŵana chifukwa cha zina laki, ajanga nge kuti alonde Yesu.’—Mateyu 18:5.

Pa nyengu iyi, ndipu akutumika apindana ŵaka pankhani yakuti mura ukongwa ndiyani. Mwaviyo, Yesu wati wakamba mazu ngenanga yiwu anguwona nge kuti waŵachenya. Sonu, wakutumika Yohane wangwambisa nkhani yinyaki yo yinguchitika ŵaka. Iyu wanguti: “Msambizi, tawona munthu munyaki wachituzga viŵanda mu zina linu, sonu tamukaniza chifukwa we mugulu lidu cha.”—Luka 9:49.

Kumbi Yohane wawonanga kuti mbakutumika pe wo ŵenga akwenere kuchizga ŵanthu kweniso kutuzga viŵanda? Asani ndi viyo, ntchifukwa wuli Myuda mwenuyu wafiskanga kutuzga mizimu yiheni? Yohane wawonanga kuti munthu mwenuyu wenga wakwenere cha kuchita vakuziziswa vanthazi chifukwa wayendanga limoza ndi Yesu cha pamwenga akutumika.

Yohane wanguzizwa ukongwa Yesu wachimukambiya kuti: “Mungamukanizanga cha chifukwa palivi munthu yo wachita vakuziziswa mu zina langu, yo wangakamba mwaliŵi chiheni chechosi chakukwaskana ndi ini. Chifukwa weyosi yo waleka kususkana nasi, we kuchigaŵa chidu. Ndipu weyosi yo watikupaskani kapu ya maji kuti mumwi chifukwa chakuti mwe aku Khristu, nditikuneneskiyani kuti wazakuyitayapu cha mphotu yaki.”—Mariko 9:39-41.

Pa nyengu iyi, munthu uyu wakhumbikanga kwenda ndi Yesu cha kuti walongo kuti we kuchigaŵa chaki. Tikamba viyo chifukwa chakuti mpingu wachikhristu ndipu waja kamanavi kuti ujalikiskiki. Mwaviyo, munthu uyu wasuskanga Yesu cha pamwenga kwambisa chisopa chaboza chinanga kuti iyu wayendanga ndi Yesu cha. Vo munthu uyu wachitanga, vilongore limu kuti wenga ndi chivwanu mwaku Yesu. Ndipu vo Yesu wangukamba vingulongore limu kuti munthu mwenuyu wazamutondeka cha kulonde mphotu yaki.

Vatingi vijengi vakofya ukongwa asani munthu mwenuyu wanguguŵa ndi vo akutumika akambanga pamwenga kuchita. Yesu wangukamba kuti: “Weyosi yo waguŵiska kamoza mwa tiŵana teniti to te ndi chivwanu, vingaŵa umampha kumumangiliya mukhosi chimwa chikulu chakupere nge cho bulu waguza, ndi kumubizga munyanja.” (Mariko 9:42) Pavuli paki, Yesu wangukamba kuti akusambira ŵaki atenere kutaya vinthu vo vingaŵachitiska kuti aguŵi. Yiwu atenere kuchita viyo chinanga kuti vinthu vo vingaja vakukhumbika ukongwa nge janja, phazi pamwenga jisu. Kwe umampha kuja kwambula vinthu venivi ndi kuchisere mu Ufumu waku Chiuta kuluska kuja navu ndi kuchibayika ku Gehena (Chidika cha Hinomu). Akutumika atenere kuti achiziŵanga umampha chidika chenichi cho chenga kufupi ndi Yerusalemu ndipu kwenuku awotchiyangaku vimalala. Mwaviyo, akutumika ŵenaŵa anguvwisa vo Yesu wang’anamuwanga kuti asani munthu yo wafwa wazamuyuskika so cha.

Yesu wangutcheŵeska so kuti: “Wonesesani kuti mungayuyuwanga yumoza wa tiŵana iti cha, chifukwa nditikukambiyani kuti angelu ŵawu wo ŵe kuchanya, nyengu zosi alereska chisku cha Ada wo ŵe kuchanya.” Kumbi ŵanthu wo adanika kuti “tiŵana iti” mbapade  wuli kwa Awisi? Yesu wangukamba ntharika ya munthu yo wenga ndi mbereri 100 kweni yimoza yingusoŵa. Munthu mwenuyu wanguleka mbereri 99 ndi kuluta kuchipenja yimoza yo yingusoŵa. Wati wayisaniya wangukondwa ukongwa chinanga kuti mbereri 99 zingusoŵa cha. Yesu wangukamba so kuti: “Ada wo ŵe kuchanya akhumba cha kuti chinanga nkhamoza mwa tiŵana iti kanangiki.”—Mateyu 18:10, 14.

Panyaki chifukwa chakuti Yesu waŵanaŵaniyanga akutumika ŵaki wo apindananga kuti mura ndiyani, iyu wanguŵachiska kuti: “Jani ndi mche mwaku mwaŵeni ndipu jani mwachimangu ndi anyinu.” (Mariko 9:50) Mche uchitiska kuti chakurya chinowi. Mwaviyo, mazu ngamampha ngo ngaja nge kuti munthu wadaku mche, ngachitiska kuti ŵanthu anyaki aleki kuguŵa ndi vo munthu munyaki wakamba. Ndipu venivi vitovya kuti ŵanthu ajengi mwachimangu kwambula kupindana.—Akolose 4:6.

Nyengu zinyaki ŵanthu angaguŵiskana pa nkhani zinyaki zikuluzikulu ndipu Yesu wangukamba vo tingachita asani venivi vachitika. Iyu wanguti: “Asani mubali waku wakunangiya, luta kuti ukamukambiyi cho wanangisa mwe ŵaŵi, yiwi ndi iyu. Ndipu asani iyu wakuvwiya ndikuti wamuweza mubali waku.” Nanga wuli asani waleka kukuvwiya? Yesu wangukamba so kuti: “To yumoza pamwenga ŵaŵi kuti nkhani yosi yisimikizikengi pa masu pa akaboni ŵaŵi pamwenga atatu.” Kweni asani munthu yo waleka kuvwiya pe ŵanthu ŵaŵi pamwenga atatu, munthu yo watenere kuchikambiya ŵara ku “mpingu” kuti ayeruzgi nkhani yo. Nanga wuli asani munthu yo wananga watiŵavwiya mbwenu cha ŵara? Yesu wanguti: “Umuwonengi nge munthu wamitundu ndipuso wakusonkhesa msonkhu.” Ndipu Ayuda achezanga nawu cha ŵanthu aviyo.—Mateyu 18:15-17.

Ŵara wo awonere mpingu atenere kugwiriskiya ntchitu ukongwa Mazu ngaku Chiuta. Asani munthu wabuda ndipu wakhumbika ulongozgi, cheruzgu cho yiwu apereka ‘chituŵa kuti chamangika kali kuchanya.’ Kweni asani munthu amusaniya ndi mlandu cha, cheruzgu cho yiwu apereka chituŵa kuti “chafwatulika kali kuchanya.” Ulongozgi wenuwu unguziwovya ukongwa mpingu wachikhristu wati wajalikiskika. Pa nkhani yakukhumbika ukongwa yeniyi, Yesu wangukamba kuti: “Po ŵanthu ŵaŵi pamwenga atatu awungana mu zina langu, nani nde nawu penipo.”—Mateyu 18:18-20.