Banja laku Yosefi, abali ŵaki ndipuso anyawu angunyamuka kuluta ku Yerusalemu. Ulendu uwu wachitikanga chaka chechosi kuti akachiti nawu phwandu la Pasika, mwakukoliyana ndi vo Dangu lakambanga. (Marangu 16:16) Kutuwa ku Nazareti kuchifika ku Yerusalemu wenga ulendu wa makilomita pafufupi 120. Asani nyengu iyi yepafupi, ŵanthu atangwanikanga ndipuso akondwanga ukongwa. Pa nyengu iyi, Yesu wenga ndi vyaka 12, ndipu wakhumbisiskanga kuti wakasaniriki pa phwandu lenili kweniso kunyumba yakusopiyamu.

Phwandu la Pasika lachitikanga zuŵa limoza. Kweni Yesu ndi apapi ŵaki, ajanga mbwenu ku Yerusalemu kwa mazuŵa ngamanavi. Asani zuŵa la Pasika lajumphapu, zuŵa lakulondopu ayambanga kuchita Phwandu la Viŵandi Vambula Chakutupisa lo lachitikanga kwa mazuŵa 7. (Mariko 14:1) Phwandu ili aliwonanga kuti ntchigaŵa cha Pasika. Ulendu wosi wakuluta ku Yerusalemu ndi kuwere kwawu ku Nazareti, watonga masabata pafufupi ngaŵi. Kweni pa nyengu iyi, ulendu wawu unguŵatole mazuŵa nganandi chifukwa cha suzgu lo angukumana nalu pakuwere kwawu ku Nazareti.

Achiwere kwawu, Yosefi ndi Mariya awonanga kuti Yesu we limoza ndi abali ŵawu ndipuso anyawu wo ayendanga nawu limoza. Kweni usiku ŵati ŵama pamalu nganyaki kuti agoni, angubuchira kuti Yesu palivi. Mwaviyo, angwamba kumupenjapenja kwa abali ŵawu kweniso kwa anyawu, kweni angumusaniya cha. Yosefi ndi Mariya anguwere so ku Yerusalemu kuti akamupenji.

Ŵati afika ku Yerusalemu, angumupenja kwa zuŵa lamphumphu, kweni angumusaniya cha. Pa zuŵa lachiŵi napu, angumusaniya so cha. Pavuli paki, pa zuŵa lachitatu, angumusaniya munyumba yakusopiyamu pakati pa asambizi Achiyuda. Iyu waŵavwisiyanga ndi kuŵafumba mafumbu, ndipu yiwu anguzizwa ukongwa ndi zeru zaki.

Mariya wangumufumba kuti: “Wamwana, watisuzgiyanji viyo? Ini ndi awusu, tasuzgika ukongwa kukupenja.”—Luka 2:48.

Yesu wanguzizwa ukongwa kuti apapi ŵaki anguziŵa cha ko iyu wenga, mwakuti wanguŵafumba kuti: “Ntchifukwa wuli mutindipenja? Kumbi muziŵa cha kuti nditenere kuja munyumba ya Ada?”—Luka 2:49.

Yesu ndi apapi ŵaki anguwere kwawu ku Nazareti ndipu iyu wangulutirizga kuŵavwiya. Iyu wangulutirizga kukuwa mu zeru ndipuso msinkhu. Chinanga kuti wenga mwana, Chiuta ndi ŵanthu amuyanjanga ukongwa. Mwaviyo, kutuwa pa unamana waki, Yesu wenga chakuwoniyapu chamampha pa nkhani yakwanja Chiuta kweniso kutumbika apapi ŵaki.