M’Bayibolu mwe uthenga wakutuliya kwaku Chiuta. Awusefwi akuchanya akupereka buku ili kuti tisaniyengemu ulongozgi wakovya. Tiyeni tiwoni mauthenga ngaŵi ngapade ngo nganguperekeka vyaka 2,000 vo vajumpha. Mauthenga ngenanga nganguperekeka ndi mungelu Gabiriyeli yo ‘watuma pa masu paku Chiuta.’ (Luka 1:19) Kumbi vinthu venga wuli pa nyengu yo mungelu mwenuyu waperekanga mauthenga ngapade ngenanga?

Uthenga wakwamba unguperekeka cha m’ma 3 B.C.E., ndipu unguperekeka kwaku Zekariya yo wenga wasembi waku Yehova. Zekariya wajanga kuchigaŵa cha mapiri nga ku Yudeya, panyaki kufupi ndi tawuni ya Yerusalemu. Iyu ndi muwolu waki Elizabeti ŵenga arara ukongwa ndipu ŵengavi mwana. Nyengu yaku Zekariya yingukwana kuti wakateŵete nge wasembi kunyumba yakusopiyamu yaku Chiuta ku Yerusalemu. Pa nyengu yo wenga munyumba yakusopiyamu, mwamabuchibuchi Gabiriyeli wanguza kwaku iyu ndipu wanguma pafupi ndi malu ngakuperekiyapu sembi za vakununkhira.

Zekariya watenere kuti wanguchita mantha ukongwa. Kweni mungelu wangumuzikisa mtima, ndipu wangumukambiya kuti: “Ungawopanga cha Zekariya chifukwa pempheru laku lakuŵeyere lavwika ndipu muwolu waku Elizabeti wazakukubaliya mwana munthulumi ndipu uzimupaski zina lakuti Yohane.” Gabiriyeli wangukamba so kuti Yohane “wazamuja wakuzirwa pa masu paku Yehova” ndipu ‘wazamuwunganisiya Yehova ŵanthu akunozgeka.’—Luka 1:13-17.

Zekariya wangugomezga cha vo mungelu wangumukambiya. Chifukwa wuli? Chifukwa iyu ndi Elizabeti ŵenga akukota. Mwaviyo, Gabiriyeli wangumukambiya kuti: “Ujengi mbuwu ndipu uŵereŵetengi cha mpaka pa zuŵa lo vinthu venivi vazamuchitikiya chifukwa waleka kugomezga mazu ngangu ngo ngazamufiskika pa nyengu yakuŵikika.”—Luka 1:20.

Ŵanthu wo ŵenga kubwalu kwa nyumba yakusopiyamu anguzizwa kuwona kuti Zekariya wangujamu kwa nyengu yitali. Pakumaliya, iyu wangutuliya kubwalu kweni waŵereŵetanga cha. Zekariya wagwiriskiyanga waka ntchitu manja pakulongoro. Ivi vingulongo kuti iyu wanguwona chinthu chinyaki chakuziziswa pa nyengu yo wenga munyumba yakusopiyamu.

Zekariya wati wamaliza kupereka sembi kunyumba yakusopiyamu, wanguwere kunyumba kwaki. Pati pajumpha mazuŵa, Elizabeti wangume nthumbu! Iyu wakhumbanga cha kuti ŵanthu amuwonengi. Mwaviyo, wanguja munyumba kwa myezi yinkhondi wachilindizga kuti mwana waweku.

Pavuli paki, Gabiriyeli wanguza so kachiŵi. Kumbi wanguza kwaku yani? Iyu wanguza kwaku Mariya yo wenga wambula kuyirwa. Iyu wajanga muchigaŵa cha Galileya, mutawuni ya Nazareti, kunkhondi kwa Yerusalemu. Kumbi mungelu wangumukambiyanji? Wangumukambiya kuti: “Chiuta wakutumbika.” Gabiriyeli wangulutirizga kukambiya Mariya kuti: “Awona! wazamuja ndi nthumbu ndipu wazamubala mwana munthulumi ndipu uzimupaski zina lakuti Yesu.” Gabiriyeli wangukamba so kuti: “Iyu wazamuja wakuzirwa ndipu wazamudanika kuti Mwana wa Wapachanya Limu. . . . Iyu wazamuwusa nge Fumu kwamuyaya panyumba yaku Yakobe, ndipu Ufumu waki wazamumala cha.”—Luka 1:30-33.

Mungawona kuti Gabiriyeli wenga ndi mwaŵi ukulu wakupereka mauthenga ngaŵi ngenanga. Asani tilutirizga kusambira vakukwaskana ndi Yohane ndipuso Yesu, tiziŵengi kukhumbika kwa mauthenga ngakutuliya kuchanya ngenanga.