Kumbi mukuŵerenga magazini nga Chigongwi cha Alinda ngo ngatuwa pambula kuswera yapa? Asani ndi viyo, wonani asani mungamuka mafumbu yanga:

Ntchifukwa wuli apapi wo aja mucharu chinyaki akhumbika kuziŵa chineneru cho chingawovya ŵana ŵawu kuja paubwezi wakukho ndi Yehova?

Ŵana ŵinu angasambira ku sukulu ndi kwa anyawu chineneru cha muchigaŵa cho muja. Vingaja vakovya asani mwana winu wangaziŵa vineneru vinandi. Apapi atenere kuŵanaŵaniya chineneru cho ŵana ŵawu angavwisa umampha uneneska kuti aluti panthazi mwauzimu. Chineneru ichi chingaŵa chaku yiwu apapi pamwenga cha mucharu cho alimu. Apapi Achikhristu adanjiza vakukhumba vawu cha chifukwa akhumba kuti ŵana ŵawu aje pa ubwezi wakukho ndi Yehova.—w17.05, papeji 9-11.

Pa nyengu yo Yesu wafumbanga Peturo kuti: “Kumbi utindiyanja kuluska izi?” kumbi mazu ngakuti “izi” ngamiyanganji? (Yoha. 21:15)

Viwoneka kuti Yesu wakambanga somba zo zenga pafupi pamwenga ulovi wo Peturo wachitanga. Yesu wati wafwa, Peturo wanguwere so kuntchitu yaki ya ulovi. Akhristu akhumbika kujifufuza kuti aziŵi mo awone ntchitu yakuliŵavu.—w17.05, papeji 22-23.

Ntchifukwa wuli Abrahamu wangupempha Sara kuti wakakambi kuti ndi mzichi waki? (Chiya. 12:10-13)

Mbuneneska kuti Sara wenga mzichi waki chifukwa awisewu ŵenga amoza. Asani Sara wangukamba kuti wenga muwolu waki, Abrahamu watingi wabayikengi ndipu watingi wabalengi cha mphapu yo Chiuta wangumulayizga.—wp17.3, papeji 14-15.

Kumbi Elias Hutter wangugwiriskiya ntchitu nthowa wuli kuti wawovyi wo akhumbanga kusambira Chiheberi?

Iyu wakhumbanga kuwovya wo asambiranga kupambanisa pakati pa mazu nga Chiheberi mu Bayibolu ndi vilembu vo asazgiyangaku kunthazi pamwenga kuvuli kwa mazu yanga. Kuti wachiti ivi, mazu nga Chiheberi wangafipiskanga kweni ngo wasazgiyangaku kunthazi pamwenga kuvuli kwa mazu yanga wangafipiskanga cha. Mazu ngamumphata m’Bayibolu la New World Translation of the Holy Scriptures—With References ngakulembeka so munthowa yeniyi.—wp17.4, papeji 11-12.

Kumbi ndi fundu nizi zo Mkhristu wakhumbika kuŵanaŵaniya pa nkhani ya kuja ndi futi kuti wajivikiliyi ku ŵanthu?

Fundu zinyaki ndi izi: Chiuta wawona kuti umoyu ngwakupaturika. Yesu wanguŵachiskapu cha akusambira ŵaki kuti ajengi ndi malipanga kuti ajivikiliyi. (Luka 22:36, 38) Tikhumbika kusula malipanga kuja vakulimiya. Umoyu ngwakuzirwa ukongwa kuluska vinthu vakuliŵavu. Titumbika njuŵi ya ŵanthu anyaki ndipu tikhumba kuja chakuwoniyapu chamampha. (2 Akori. 4:2)—w17.07, papeji 31-32.

Ntchifukwa wuli vo Mateyu ndi Luka akulemba vakukwaskana ndi Yesu weche mwana vipambana?

Nkhani yaku Mateyu yikonkhoska ukongwa vaku Yosefi, nge vo wanguchita wati wavwa waka kuti Mariya we ndi nthumbu kweniso vo mungelu wangumukambiya mu malotu kuti wathaŵiyi ku Egipiti. Nkhani yaku Luka yikonkhoska ukongwa vaku Mariya. Mwakuyeruzgiyapu, yikonkhoska kuti Mariya wanguluta kwaku Elizabeti kweniso mo wanguchitiya, Yesu wati wajaliya ku nyumba yakusopiyamu.—w17.08, peji 32.

Kumbi ndi vinthu wuli vinyaki vo Bayibolu lakunthiyapu?

Mazu ngo nge m’Bayibolu ngasintha vo ngang’anamuwa asani pajumpha nyengu. Kusintha kwa ndali mucharu, kuchitiska kuti chineneru chisinthi. Bayibolu lakanizgikanga kufwatulika mu vineneru vo ŵanthu anandi akambanga.—w17.09, papeji 19-21.

Kumbi mwe ndi mungelu yo watikuvikiliyani?

Awa. Yesu wangukambiya akusambira ŵaki kuti angelu ŵawu alereska chisku chaku Chiuta. (Mate. 18:10) Yapa Yesu wang’anamuwanga kuti angelu angawovya Akhristu, kweni avikiliya mwakuziziswa cha Mkhristu weyosi pakuyija.—wp17.5, peji 5.

Kumbi chanju chakukhumbika ukongwa ndi nichi?

Chanju cho chituliya pa fundu za m’Malemba (a·gaʹpe) ndichu chakukhumbika ukongwa. Chanju ichi chisazgapu mo munthu wavwiya mu mtima mwaki. Kweni munthu wangalongo chanju ichi asani wachita vinthu vamampha kuti wawovyi anyaki.—w17.10, peji 7.