Yiwu amiya gulu la nkhondu lakuchanya lo lingulongoza pa ntchitu yakubwanganduwa Yerusalemu ndipuso lo lazamubwanganduwa charu chiheni chaku Satana pa nkhondu ya Aramagedoni. Ntchifukwa wuli kusintha uku nkhwakwenere?

Ezekiele wanguwona vinthu viheni vo vachitikanga, tawuni ya Yerusalemu yechendabwanganduliki mu 607 B.C.E. Pavuli paki, wanguwona vinthu vo vinguchitisa kuti tawuni iyi yibwanganduliki. Wanguwona anthurumi 6 wo ŵenga ndi vidya vakuphwanyiya. Wanguwona so munthu munyaki pakati pawu yo wanguvwala salu kweniso wenga ndi kachikwama ka mlembi. (Ezek. 8:6-12; 9:2, 3) Chiuta wangukambiya munthu uyu kuti: ‘Porota mu msumba Luwaluti ku Yerusalemu kuti wakalembi chisimikizu pa visku va ŵanthu wo aliyanga ndi kutamantha chifukwa cha vinthu viheni vo vachitikanga mutawuni iyi.’ Pavuli paki, Chiuta wangukambiya anthurumi wo angupinga vidya vakuphwanyiya kuti abayi ŵanthu wosi wo ŵengavi chisimikizu. (Ezek. 9:4-7) Kumbi vo Ezekiele wanguwona vititisambizanji, nanga munthu yo wenga ndi kachikwama ka mlembi ndiyani?

Uchimi uwu ungukambika mu 612 B.C.E. Ungufiskika kakwamba pa nyengu yo Yerusalemu wangubwangandulika ndi asilikali a ku Babiloni. Ivi vinguchitika pati pajumpha vyaka 5 kutuliya po uchimi uwu ungukambikiya. Chinanga kuti asilikali a ku Babiloni ndiwu angubwanganduwa Yerusalemu, kweni Yehova ndiyu wanguchitisa. (Yer. 25:9, 15-18) Tikamba viyo chifukwa Yehova wanguŵagwirisiya waka ntchitu kuti walangi ŵanthu ŵaki wo angumugarukiya. Kweni wangulanga ŵanthu wosi cha. Iyu wangubaya ŵanthu aheni pe. Yehova wangutaska Ayuda wo achitangaku cha vinthu viheni vo vachitikanga mutawuni iyi.

Ezekiele wangubwanganduwaku cha Yerusalemu pamwenga kulembaku ŵanthu chisimikizu. Kweni angelu ndiwu alongozanga. Mwaviyo, uchimi uwu utitiwovya kuziŵa vinthu vo vinguchitika kuchanya. Yehova wangutuma angelu ŵaki kuti alongozi ntchitu yakubaya ŵanthu aheni kweniso kuti apatuwi ŵanthu arunji kuti ataskiki. *

Kali m’mabuku ngidu takonkhosanga kuti munthu yo we ndi kachikwama ka mlembi wamiya Akhristu akusankhika. Taŵanaŵananga kuti wo avwiya uthenga wo tipharazga alembeka sonu chisimikizu kuti azitaskiki. Kweni pambula kuswera yapa, tawona kuti pakhumbika kusintha. Mwakukoliyana ndi vo lemba la Mateyu 25:31-33 likamba, Yesu ndiyu wazamuyeruza ŵanthu. Wazamuchita ivi pa chisuzu chikulu. Iyu wazamupatuwa ŵanthu wo ŵe nge mbereri ku ŵanthu wo ŵe nge mbuzi. Ŵanthu wo ŵe nge mbereri azamutaskika ndipu ŵanthu wo ŵe nge mbuzi azamubayika.

Mwakukoliyana ndi kusintha uku, kumbi tisambiranji pa vo Ezekiele wanguwona? Tisambirapu vinthu 5 ivi:

1.  Tawuni ya Yerusalemu yepafupi kubwangandulika, Ezekiele wenga mulonda limoza ndi Yeremiya nge mo Yesaya wachitiyanga kuvuli. Mazuŵa nganu, Yehova wagwirisiya ntchitu Akhristu akusankhika amanavi kuti aryisengi ŵanthu ŵaki ndi kutcheŵesa ŵanthu chisuzu chikulu chechendayambi. A munyumba yaku Khristu wosi agwiraku ntchitu yakutcheŵesa ŵanthu yeniyi.​—Mat. 24:45-47.

2.  Ezekiele wangulembaku cha chisimikizu pa  visku va ŵanthu kuti ataskiki. Ŵanthu aku Yehova mazuŵa nganu, nawu alembaku cha chisimikizu pa visku va ŵanthu. Kweni apharazga waka uthenga waku Yehova. Ntchitu iyi yilongozeka ndi angelu.​—Chiv. 14:6.

3.  Mu nyengu yaku Ezekiele, palivi munthu yo wangulembeka chisimikizu chayichu pa chisku. Ndimu so viliri mazuŵa nganu. Kumbi ŵanthu akhumbika kuchitanji kuti alembeki chisimikizu chambula kuwoneka kuti azitaskiki? Akhumbika kuvwiya uthenga wo upharazgika, kuvwala wunthu ufya, kujipaturiya kwaku Yehova ndi kuwovya abali aku Khristu. (Mat. 25:35-40) Ŵanthu wo achita ivi azamulembeka chisimikizu pa chisuzu chikulu kuti azitaskiki.

4.  Mazuŵa nganu munthu yo we ndi kachikwama ka mlembi wamiya Yesu Khristu. Iyu ndiyu walemba ŵanthu chisimikizu kuti azitaskiki. A mzinda ukulu azamulembeka chisimikizu ichi pa nyengu yo azamuyeruzika kuti ndi mbereri pa chisuzu chikulu. Ivi vazakuŵawovya kuti azilonde umoyu wamuyaya panu pasi.​—Mat. 25:34, 46. *

5.  Mazuŵa nganu anthurumi 6 wo angupinga vidya vakuphwanyiya amiya gulu lankhondu lakuchanya, ndipu Yesu ndiyu walongoza. Pambula kuswera, azamubwanganduwa mitundu ndi vinthu vosi viheni.​—Ezek. 9:2, 6, 7; Chiv. 19:11-21.

Kuvwisa fundu izi kutitiwovya kuziŵa kuti Yehova wananga ŵanthu arunji pamoza ndi ŵanthu aheni cha. (2 Pet. 2:9; 3:9) Kweniso tikumbusika kuzirwa kwa ntchitu yakupharazga. Weyosi wakhumbika kutcheŵeseka umaliru wechendazi.—Mat. 24:14.