1-3. (a) Kumbi ndi maubudi nanga ngo ngangatisuza kusintha asani tabatizika? (b) Asani tiwona kuti tisuzika kusintha, kumbi tingajifumba mafumbu nanga? (Wonani chithuzi cho che pachanya.)

KEVIN ^[1] wati wasambira unenesa, wakhumbisisanga kuja pa ubwezi wakukho ndi Yehova. Kweni kwa vyaka vinandi, watchovanga juga, wakweŵanga foja, wamwanga ukongwa moŵa ndipuso wamwanga munkhwala wakutimbanyiza wongu. Kuti Chiuta wakondwengi nayu, Kevin wakhumbikanga kuleka mijalidu iyi. Ndivu wanguchita. Kweni kuti wasinthi wanguthemba Yehova ndi Mazu ngaki, ngo nge ndi nthazi yakusintha munthu.​—Ŵah. 4:12.

² Kumbi Kevin wanguleka kusintha wati wabatizika? Awa, chifukwa penga vinandi vo wakhumbikanga kusintha pa umoyu waki. (Ŵaef. 4:31, 32) Mwakuyeruziyapu, wasuzikanga kuti waleki kukwiya liŵi. Kevin wangukamba kuti, “Kujiko asani munthu  wandikwiyisa kwenga kwakusuza ukongwa kuluska kuleka vinthu vinyaki viheni vo ndachitanga.” Kevin wangusintha. Pempheru ndi kusambira Bayibolu pakuyija ndivu vingumuwovya kuti wasinthi.

³ Nge Kevin, tanandi takhumbikanga kusintha techendabatiziki kuti umoyu widu ukoliyani ndi vo Bayibolu likamba. Tati tabatizika, tinguwona kuti takhumbikanga kulutiriza kusintha alinga kuti tilondongi Chiuta ndi Khristu mwakuphwere. (Ŵaef. 5:1, 2; 1 Pet. 2:21) Mwakuyeruziyapu, tinguwona kuti tenga ndi mzimu wakusaniya vifukwa anyidu, kopa ŵanthu, kukamba vinthu viheni va anyidu pamwenga maubudi nganyaki. Kumbi tiwona kuti kusintha vinthu ivi nkhwakusuza ukongwa kuphara mo taŵanaŵaniyanga? Asani ndi viyo, mungajifumba kuti: ‘Pakuti ndikusintha vinthu vikuluvikulu, ntchifukwa wuli ndisuzika kusintha vinthu vimanavimana? Kumbi ndingachita wuli kuti Bayibolu lilutirizi kusintha umoyu wangu?’

4. Ntchifukwa wuli nyengu zinyaki titondeka kuchita vinthu vo vikondwesa Yehova?

⁴ Pakuti tamuziŵa Yehova ndi kumuyanja, tikhumbisisa kuchita vinthu vo vitimukondwesa. Kweni nyengu zinyaki titondeka kumukondwesa chifukwa te akubuda. Nasi tingakamba nge mo Paulo wangukambiya kuti: “Ndikhumba kuchita vinthu vamampha, kweni nditondeka kuvichita.”​—Ŵar. 7:18; Yak. 3:2.

5. Kumbi ndi vinthu wuli vo tikuleka techendabatiziki, kweni ndi vinthu wuli vo vingajaliriya pavuli pakuti tabatizika?

⁵ Tikuleka maubudi ngo ngatingi ngatitondekesengi kuja mumpingu wachikhristu. (1 Ŵakor. 6:9, 10) Kweni teche akubuda. (Ŵakol. 3:9, 10) Mwaviyo, chingaŵa chambula kwenere kuŵanaŵana kuti asani tabatizika pamwenga taja mu unenesa nyengu yitali, tibudengi cha, kuwere vuli pamwenga kuŵanaŵana vinthu viheni. Vinthu vinyaki vingajaliriya kwa vyaka vinandi.

6, 7. (a) Kumbi ntchinthu wuli cho chititiwovya kuja pa ubwezi ndi Yehova chinanga kuti te akubuda? (b) Ntchifukwa wuli titenere cha kuleka kupempha Yehova kuti watigowoke?

⁶ Ubudi wo tikuhara kwaku Adamu utenere cha kutitondekesa kuja pa ubwezi ndi Yehova pamwenga kulutiriza kumuteŵete. Ŵanaŵaniyani fundu iyi: Pa nyengu yo Yehova watiguzanga kuti tije nayu pa ubwezi, waziŵanga kuti nyengu zinyaki tinangisengi. (Yoh. 6:44) Pakuti Chiuta waziŵa nkharu yidu ndipuso vo ve mumtima widu, watenere kuti waziŵanga maubudi ngo tisuzikengi nangu. Waziŵanga so kuti nyengu zinyaki tibudengi. Kweni Yehova wanguleka cha kutiguza kuti tije nayu pa ubwezi.

⁷ Chifukwa chakuti Chiuta watitiyanja, wakutipasa sembi yakutiwombo ya Mwana waki wakwanjiwa. Iyi ndi mphasu yapade ukongwa. (Yoh. 3:16) Asani tabuda, tingapempha Yehova kuti watigowoke. Ndipu chifukwa cha sembi iyi, tingaja ndi chigomezu chakuti watigowokiyengi ndipuso kuti ubwezi widu wechendamali. (Ŵar. 7:24, 25; 1 Yoh. 2:1, 2) Asani tiwona kuti te akubuda, tingalekanga cha kupempha Yehova kuti watigowoke. Pa tingaleka kumupempha, tingayanana waka ndi munthu yo wakana kusamba mu manja asani mwabinkha. Sembi yitovya ŵanthu akubuda wo alapa. Chifukwa cha sembi yaku Yesu, tingaja pa ubwezi ndi Yehova chinanga kuti te akubuda.​—Ŵerengani 1 Timote 1:15.

8. Ntchifukwa wuli titenere cha kungalekere maubudi ngidu?

 ⁸ Ivi ving’anamuwa kuti tingalekeriyengi waka cha maubudi ngidu. Kuti tije pa ubwezi ndi Yehova tikhumbika kuyesesa kuyeza Chiuta ndi Khristu ndipuso kuchita vinthu vo yiwu akhumba. (Sumu 15:1-5) Tikhumbika so kuyesesa kujiko pamwenga kuleke limu maubudi ngidu. Kaya tabatizika pambula kuswera pamwenga taja mu unenesa kwa vyaka vinandi, titenere ‘kulutiriza . . . kusintha.’​—2 Ŵakor. 13:11.

9. Kumbi tiziŵa wuli kuti kuvwala wunthu wufya kumala cha?

⁹ Kuti ‘tilutirizi kusintha’ ndi kulongo “wunthu ufya,” tikhumbika kulutiriza kufwiyapu. Paulo wangukambiya Akhristu anyaki kuti: “Mungusambizika kuti muzuwi wunthu wakali wo ukoliyana ndi nkharu yinu yakali ndipuso wo uchita vinthu viheni mwakukoliyana ndi malikhumbira ngaki. Ndipu mulutirizi kuja ŵafya mumaŵanaŵanu nginu, ndi kuvwala wunthu wufya wo ukulengeka mwakukoliyana ndi khumbu laku Chiuta mu urunji weneku ndi mu kugomezeka.” (Ŵaef. 4:22-24) Mazu ngakuti “mulutirizi kuja ŵafya” ngalongo kuti kuvwala wunthu wufya kumala cha. Fundu iyi njakuchiska, chifukwa yilongo kuti kaya munthu wangateŵete Yehova kwa nyengu yitali wuli, wangalutiriza kusintha kuti waje ndi mijalidu ya Chikhristu yo yitovya kuti waje ndi wunthu wufya. Kukamba unenesa, Bayibolu lingalutiriza kusintha umoyu widu.

10. Kumbi tingachita wuli kuti Bayibolu lilutirizi kutisintha, ndipu ndi mafumbu nanga ngo tingajifumba?

¹⁰ Titenere kufwiyapu asani tikhumba kuti Mazu Ngaku Chiuta ngalutirizi kutisintha. Kweni ntchifukwa wuli tikhumbika kufwiyapu? Asani Yehova watumbika vo tichita, ntchifukwa wuli tisuzika kusintha? Asi mphanyi Yehova watuzamu waka maŵanaŵanu ngaheni mu mitima yidu kuti chiŵi chipusu kusintha?

11-13. Ntchifukwa wuli Yehova wakhumba kuti tiyesesengi kulimbana ndi maubudi ngidu?

¹¹ Asani tiŵanaŵaniya vo Yehova wakulenga, tiziŵa kuti we ndi nthazi ukongwa. Mwakuyeruziyapu, lumwi le ndi nthazi ukongwa. Chinanga wuli nthazi yaki yimanavi ndiyu yifika pacharu chapasi, kweni yipereka ukweru ndi kufunda kwakukwana kuti vakume, nyama ndi taŵanthu tije ndi umoyu. (Sumu 74:16; Yes. 40:26) Yehova wapereka nthazi kwa ateŵeti ŵaki. (Yes. 40:29) Mwaviyo, Chiuta watingi watipasengi nthazi kuti tisinthi maubudi ngidu ngosi kwambula kusuzikiya. Kumbi wakulekiyanji kuchita waka viyo?

¹² Yehova wakutipasa wanangwa wakusankha tija vakuchita. Asani tasankha kuchita khumbu laki ndipuso asani tifwiyapu kuchita viyo, tilongo kuti titimuyanja ukongwa ndipu tikhumbisisa kuchita vinthu vo vitimukondwesa. Tilongo so kuti te kuchigaŵa chaki. Satana wakamba kuti Yehova ngwakwenere cha kuwusa. Mwaviyo, asani tifwiyapu kulongo kuti te kuchigaŵa cha Awusefwi akuchanya, yiwu atenere kuti awonga ukongwa. (Jobu 2:3-5; Nthanthi 27:11) Kweni asani Yehova watipasanga nthazi kuti tileki kusuzika kusintha maubudi ngidu, mphanyi vivwika cha kukamba kuti te akugomezeka kwaku iyu.

¹³ Ndichu chifukwa chaki, Yehova watitikambiya kuti ‘tiyesesengi’ kuja ndi mijalidu ya Chikhristu. (Ŵerengani 2 Petro 1:5-7; Ŵakol. 3:12.) Iyu wakhumba kuti tifwiyengepu  kujiko kuti tileki kuŵanaŵana vinthu viheni. (Ŵar. 8:5; 12:9) Asani tifwiyapu, tikondwa ukongwa chifukwa tiziŵa kuti Bayibolu leche kusintha umoyu widu.

14, 15. Kumbi tingachita wuli kuti tije ndi mijalidu yo yikondwesa Yehova? (Wonani bokosi lakuti “ Bayibolu ndi Pempheru Vingusintha Umoyu Wawu.”)

¹⁴ Kumbi tingachita wuli kuti tije ndi mijalidu ya Chikhristu ndipuso kukondwesa Yehova? M’malu mwakujithemba, titenere kulutiriza kufwiyapu ndipuso kulondo ulongozi waku Chiuta, chifukwa lemba la Ŵaroma 12:2 lititi: “Lekani kutole zeru za charu ichi, kweni sandukani mwakusintha maŵanaŵanu nginu, alinga kuti muziŵi khumbu laku Chiuta lamampha, lakuzomerezeka ndi lakufikapu.” Kuziya mu Mazu ngaki ndi mzimu wakupaturika, Yehova watitiwovya kuziŵa khumbu laki, kulichita ndi kusintha umoyu widu kuti ukoliyani ndi vo wakhumba. Titenere kufwiyapu kuŵerenga Bayibolu zuŵa lelosi, kuŵanaŵaniyapu ndi kupempha Chiuta kuti watipasi mzimu wakupaturika. (Luka 11:13; Ŵag. 5:22, 23) Asani tilongozeka ndi mzimu wakupaturika ndipuso maŵanaŵanu ngidu ngakoliyana ndi mo Yehova wawone vinthu, timuyezengi mu kaŵanaŵaniru, vakuchita ndi mu mazu. Kweni tikhumbika mbwenu kuja masu kuti tileki kwamba so mijalidu yo tinguleka.​—Nthanthi 4:23.

¹⁵ Tikhumbika so kusambira Mazu Ngaku Chiuta mwakugwirisiya ntchitu mabuku ngidu kuti tije ndi mijalidu yaku Yehova. Anyaki awona kuti ntchakovya kusunga malemba ndi nkhani zinyaki za mu Chigongwi cha Alinda pamwenga Galamukani! zo zingaŵawovya kuti aje ndi mijalidu ya Chikhristu pamwenga kusintha nkharu yawu. Asunga vinthu ivi chifukwa akhumba kuti aŵerengengi kaŵikaŵi.

16. Ntchifukwa wuli titenere cha kugongowa asani tiwona kuti tiswera kukuwa mwauzimu?

¹⁶ Asani muwona kuti muswera kukuwa, mutenere kukumbuka kuti vito nyengu kuti munthu wakuwi mwauzimu. Kukuwa mwauzimu kumala cha. Titenere kuzikira penipo tizomereza Bayibolu kuti lilutirizi kusintha umoyu widu. Pakwamba tingakhumbika kujichichiza kuti tichiti vo Malemba ngakamba. Kweni asani pajumpha nyengu, chazamukuŵa chipusu kuŵanaŵana ndi kuchita vo Yehova Chiuta wakhumba.​—Sumu 37:31; Nthanthi 23:12; Ŵag. 5:16, 17.

17. Asani te akugomezeka kwaku Yehova, kumbi tilindizengi vinthu vamampha nivi kunthazi?

¹⁷ Mu charu chifya ateŵeti akugomezeka  aku Yehova azamukuŵa akufikapu ndipu azakumuteŵete kwamuyaya. Pa nyengu yo, tazamusuzika cha kuja ndi mijalidu ya Chikhristu. Ndipu nyengu zosi tazamuja akukondwa. Kweni chinanga ndi sonu po teche ambula kufikapu, Chiuta watitizomereza kumuteŵete. Asani tizomereza kuti Mazu ngaki ngalutirizi kutisintha, tingamuteŵete chinanga kuti te ambula kufikapu.

18, 19. Ntchinthu wuli chingatiwovya kuti tileki kukayika kuti Bayibolu lingalutiriza kusintha umoyu widu?

¹⁸ Kevin yo tamuzumbuwa mu ndimi yakwamba, wanguyesesa kuti wajikongi asani ŵanthu amukwiyisa. Iyu waŵanaŵaniyanga ndi kugwirisiya ntchitu fundu za m’Bayibolu. Kweniso wanguzomera ulongozi wo Akhristu anyaki amupasanga. Pati pajumpha vyaka, Kevin wangusintha ukongwa. Pavuli paki, wanguŵikika kuja muteŵeti wakovya, ndipu wateŵete nge mura kwa vyaka 20. Chinanga kuti ve viyo, iyu wawona kuti wakhumbika mbwenu kuŵa masu kuti waleki kwamba so nkharu yaki.

¹⁹ Vo vikuchitikiya Kevin vilongo kuti Bayibolu litovya ŵanthu aku Chiuta kulutiriza kusintha umoyu wawu. Mwaviyo, tingachitanga mphwayi cha kuzomereza Mazu Ngaku Chiuta kusintha umoyu widu. Asani tichitengi viyo, ubwezi widu ndi Yehova ujengi wakukho. (Sumu 25:14) Asani tiwona kuti Yehova watumbika phamphu lidu, tikayikiyengi cha kuti Bayibolu lingalutiriza kusintha umoyu widu.​—Sumu 34:8.