Chiuta wangukambiya Adamu kuti: “Zuŵa lo wazamuryiya, wazamukufwa.” (Chiyambo 2:17) Asani Chiuta wangulenga Adamu kuti wakotengi ndipuso kufwa ndikuti patingi paŵengevi chifukwa chechosi chakupereke dangu lenili. Venivi vilongo kuti Adamu waziŵanga kuti asani wanguleka kurya chipasu cho wangukanizgika watingi wafwengi cha.

Adamu ndi Hava akhumbikanga cha kurya chipasu cho angukanizgika, chifukwa mu munda wa Edeni mwenga kali vipasu vinandi. (Chiyambo 2:9) Asani anguleka kurya chipasu chenichi, yiwu atingi alongongi kuti avwiya Yo wanguŵapaska umoyu. Atingi alongongi so kuti azomereza kuti Chiuta ndiyu waŵakambiyengi vakuchita.

Kuti tivwisi chifukwa cho Adamu ndi Hava akufwiya, tikhumbika kuziŵa dankha nkhani yinyaki yo yikwaska tosi. Satana Dyaboli wangugwiriskiya ntchitu njoka kuti wakambi boza lakofya ukongwa. Bayibolu likamba kuti: “Sonu njoka yenga yakuchenje ukongwa kuphara chamoyu chechosi cha mudondu cho Yehova Chiuta wangulenga. Ndipu yinguti ku munthukazi, ‘Kumbi mbuneneska kuti Chiuta wangukamba kuti mungaryanga cha vipasu va mu chimiti chechosi cha mu munda uwu?’”​—Chiyambo 3:1.

Hava wangumuka kuti: “Tingarya vipasu va muvimiti va mu munda. Kweni vipasu va muchimiti cho che pakati pa munda, Chiuta wakukamba kuti: ‘Mungaryanga cha vipasu va muchimiti cho, mungachikwaskanga cha; chifukwa asani muchitengi viyo, mufwengi.’” Pavuli paki njoka yingumumuka kuti: “Kufwa, mufwengi cha. Pakuti Chiuta waziŵa kuti pa zuŵa lo mwazamuryiya vipasu va muchimiti cho, masu nginu ngazamujulika ndipu mwazamuyanana ndi Chiuta, mwazamuziŵa chamampha ndi chiheni.” Satana wangukamba kuti Yehova ngwaboza ndipuso kuti wanguŵanola chinthu chinyaki chamampha apapi ŵidu akwamba.​—Chiyambo 3:2-5.

Hava wangugomezga vo njoka yingumukambiya. Iyu wanguchilereseska chimiti cho. Pakumaliya paki, wanguwona kuti vipasu va muchimiti cho venga vakutowa ndipuso vakukhumbirika! Ndipu wangupontho ndikwamba kurya. Bayibolu likamba kuti: “Ndipu wangupaskaku so murumu waki po ŵenga limoza, ndipu nayu wangurya.”​—Chiyambo 3:6.

Kumbi muŵanaŵana kuti Chiuta wanguvwa wuli mumtima wati wawona kuti ŵana ŵaki akwanjiwa  aleka kumuvwiya? Ndipu kumbi wanguchitanji pavuli paki? Kwaku Adamu, Yehova wangukamba kuti: “Yiwi uweriyengi ku dongu, pakuti ungutoleka mwenimo; Ndiwi fuvu, ndipu ukaweriyanga ku fuvu.” (Chiyambo 3:17-19) Chifukwa cha venivi, “mazuŵa ngosi nga umoyu waku Adamu ngenga vyaka 930, ndipu pavuli paki wangufwa.” (Chiyambo 5:5) Adamu wakuya kuchanya cha pamwenga kumalu nganyaki ngamizimu. Yehova wechendamulengi kutuliya ku dongu, iyu kwengavi. Ndipu wati wafwa iyu wanguwere ku dongu ko wangutuliya. Yapa, iyu kwengavi. Venga vakuchitiska chitima ukongwa!

Chifukwa chakuti anguleke dala kuvwiya, Adamu ndi Hava akutaya mwaŵi wakuja akufikapu kweniso umoyu wamuyaya. Yiwu angwamba kukumana ndi masuzgu, anguja ambula kufikapu kweniso akubuda. Kweni ubudi wawu ukukwaska ŵija cha. Yiwu akupaskiyaku ŵana ŵawu wosi ubudi wawu. Lemba la Aroma 5:12 likamba kuti: “Kuziya mwa munthu yumoza [Adamu] ubudi ukusere mucharu, ndipu nyifwa chifukwa cha ubudi, ndipu nyifwa yikusapaliya ku ŵanthu wosi chifukwa wosi akubuda.”

Bayibolu likonkhoska kuti ubudi ndi nyifwa ve nge “sanda yo yibenekere ŵanthu wosi ndipuso chisalu cho chivunga mitundu yosi ya ŵanthu.” (Yesaya 25:7) Sanda yeniyi yiyanana waka ndi nyankhuŵinda wa poyizoni yo palivi munthu wangamuthaŵa. Kukamba uneneska, “mwaku Adamu, ŵanthu wosi atufwa.” (1 Akorinto 15:22) Kweni nge mo wakutumika Paulo wangukambiya, fumbu ndakuti: “Ndiyani yo wanditaskengi ku liŵavu lo litufwa nyifwa yeniyi?” Kumbi walipu?​—Aroma 7:24.