YERUZGIYANI kuti muwonere filimu ya munthu wakutchuka yo watumba sumu, mweniyo mutimuyanja ukongwa. Filimu yo yitamba kulongo vo wachitanga weche munamana, mo wangusambiriya kumba sumu kweniso mo wayeseriyanga kumba. Pavuli paki, mutimuwona watumba pagulu la ŵanthu, waluta ku vyaru vinyaki kuchimba ndipu waja wakutchuka pacharu chosi. Kweni mukuluta kwa nyengu, wakota ndipu pavuli paki watufwa.

Filimu yeniyi yilongo vinthu chayivu vo vinguchitikiya munthu munyaki yo pasonu panu wakufwa. Kwali munthu yo wenga wakumba sumu, wasayansi, wakuchita masaza ngakutchimbiya pamwenga munthu munyaki weyosi wakutchuka, vakuchitika vaki vingayanana waka. Vingachitika kuti munthu waviyo wachita vinandi pa umoyu waki, kweni kumbi muwona kuti watingi wachitengi vinthu vinandi wuli asani wanguleka kukota kweniso kufwa?

Ntchachitima kuti venivi ndivu vichitikiyengi weyosi. (Wakutaula 9:5) Kwali tingayesesa wuli, kweni palivi yo wangathaŵa ukoti ndi nyifwa. Tingafwa so mwamabuchibuchi asani titama pamwenga asani tachita ngozi. Bayibolu likamba kuti taŵanthu te nge nyankhuŵinda yo “wabuka kwa kanyengu kamanavi mbwenu wasoŵa.”—Yakobe 4:14.

Ŵanthu anyaki awona kuti nyengu yeyosi angafwa kweniso kuti umoyu ngwambula phindu. Mwaviyo, atende fundu yakuti, “tiyeni tiryi ndi kumwa, pakuti mawa tifwengi.” (1 Akorinto 15:32) Ŵanthu anandi aja umoyu waviyo chifukwa aziŵa kuti nyengu yeyosi angafwa ndipu awona kuti angaziyuka so cha. Chifukwa chakukumana ndi masuzgu, nyengu zinyaki mungajifumba kuti, ‘Kumbi umoyu uwu ngwenuwu pe wo ulipu?’ Kumbi ndi nunkhu ko mungasaniya kwamuka?

Ŵanthu anandi mazuŵa nganu awona kuti asayansi ndiwu angamuka mafumbu ngawu. Asayansi kweniso madokotala akusaniya nthowa zo zingawovya ŵanthu kuja ndi umoyu utaliku. Ndipu asayansi anyaki alutirizga kufufuza nthowa zo zingawovya ŵanthu kuja ndi umoyu utali ukongwa. Chinanga kuti ŵanthu ŵenaŵa angayesesa wuli kutalikisa umoyu, kweni titijifumba mbwenu kuti: Ntchifukwa wuli tikota ndi kufwa? Kumbi pe chilindizga chechosi chakuti nyifwa yo ndi murwani widu yazamuthereskeka? Mu nkhani zinyaki zo ze m’magazini iyi, zikonkhoska nkhani yeniyi ndipu zimuka fumbu lakuti: Kumbi umoyu uwu ngwenuwu pe wo ulipu?