ANYAKI AKAMBA KUTI AWA. Dokotala munyaki wangukamba kuti kugwirisiya ntchitu ulongozgi wa m’Bayibolu kuyanana ŵaka ndi kugwirisiya ntchitu buku la chaka cha 1920 pakusambiza sayansi. Munthu yo waleka kutumbika Bayibolu wangakamba kuti kugwirisiya ntchitu fundu za m’Bayibolu, kuyanana ŵaka ndi kuto kabuku ka ulongozgi wa kompyuta yakali ukongwa ndi kukagwirisiya ntchitu pa kompyuta yamazuŵa nganu. Tingakamba kuti ŵanthu anyaki awona kuti ulongozgi wa m’Bayibolu ngwambula kovya mazuŵa nganu.

Ŵanthu anyaki awona kuti nkhuŵavi zeru kugwirisiya ntchitu ulongozgi wa mubuku lakali ukongwa chifukwa ŵanthu anandi agwirisiya ntchitu ukongwa vipangizu vamazuŵa nganu. Pamawebusayiti nganandi pasanirika ulongozgi wakupambanapambana. Pa mapulogilamu nga pa TV, pasanirika ulongozgi wakutuliya ku ŵanthu akutchuka, ŵanthu wo alemba mabuku kweniso ku ŵanthu wo aziŵa vo ŵanthu aŵanaŵana. Ndipuso mumashopu ngakugulisiyaku mabuku, musanirika mabuku ngo ngachiska ŵanthu kuja akukhupuka ukongwa.

Venivi vichitisa kuti ŵanthu anandi awonengi kuti nkhwamampha kugwirisiya ntchitu ulongozgi wakutuliya ku ŵanthu ŵenaŵa, m’malu mwakugwirisiya ntchitu ulongozgi wa m’Bayibolu wo ukulembeka pafupifupi vyaka 2,000 kuvuli. Yiwu aŵanaŵana kuti munthu yo waleka kutumbika Bayibolu waneneska asani wakamba kuti kugwirisiya ntchitu ulongozgi wa m’Bayibolu, kungayanana ŵaka ndi kugwirisiya ntchitu kabuku ka ulongozgi wa kompyuta yakali ukongwa pamwenga buku la sayansi lakali ukongwa. Kweni ivi vaboza. Chinanga kuti sayansi kweniso vipangizu vamazuŵa nganu visintha, kweni vo ŵanthu akhumba kuziŵa visintha cha. Ŵanthu akhumba kuziŵa chifukwa cho Chiuta wakutilenge, vo angachita kuti ajengi mwalikondwa kweniso mwachimangu, vo angachita kuti aje ndi banja lalikondwa kweniso kuti asaniyi mabwezi ngamampha.

Chinanga kuti Bayibolu ndakali ukongwa kweni likonkhoska umampha nkhani zenizi kweniso zinyaki zinandi. Likamba so kuti likukambirika ndi Mulengi widu. Lititipaska ulongozgi wo ungatiwovya pa umoyu widu kweniso lititiwovya kumalana ndi masuzgu ngo tingakumana nangu. (2 Timote 3:16, 17) Bayibolu lititipaska so ulongozgi wo ugwira ntchitu nyengu zosi. Bayibolu likamba kuti: “Mazu ngaku Chiuta ngamoyu.”—Aheberi 4:12.

Kumbi vo Bayibolu likamba vauneneska nadi? Kumbi fundu zaki zikuleka kugwira ntchitu pamwenga zechekovya ŵanthu mazuŵa nganu? Magazini iyi, yikuwovyeningi kusaniya kwamuka kwa mafumbu ngenanga. Iyi ndi magazini yakwamba pa magazini ngapade ngo ngayambengi kutuzgika.