Ŵanthu anandi akamba kuti agomezga Chiuta. Kweni asani mungaŵafumba kuti Chiuta ndiyani, musaniyengi kuti amuka vakupambana. Ŵanthu anyaki akamba kuti Chiuta wayeruzga mwankhaza ukongwa ndipu nyengu zosi walanga ŵanthu chifukwa cha vinthu viheni vo achita. Anyaki akamba kuti nyengu zosi Chiuta wachita vinthu mwachanju kweniso wagowoke, chinanga anganangisa wuli. Penipo anyaki agomezga kuti Chiuta we kutali ukongwa ndi isi ndipu watoliyaku kanthu cha vinthu vo vititichitikiya. Mwaviyo, chifukwa cha maŵanaŵanu ngakupambanapambana ngenanga, ŵanthu anandi angawona kuti vingachitika cha kuti amuziŵi Chiuta.

Kumbi kuziŵa Chiuta nkhwakukhumbika? Hinya nkhwakukhumbika. Kumuziŵa umampha Chiuta kungakuwovyani kuti muziŵi chilatu cha umoyu. (Machitidu 17:26-28) Asani mundere kufupi ndi Chiuta, nayu wakuyanjeningi ukongwa kweniso wakuwovyeningi. (Yakobe 4:8) Kukamba uneneska, kumuziŵa umampha Chiuta kungakuwovyani kuti muzisaniyi umoyu wamuyaya.​—Yohane 17:3.

Kumbi mungachita wuli kuti mumuziŵi Chiuta? Ŵanaŵaniyani za munthu munyaki yo mutimuziŵa umampha. Munthu mwenuyu wangaŵa mubwezi winu wa pa mtima. Kumbi munguchita wuli kuti muje pa ubwezi? Tikayika cha kuti mungwamba kuziŵa zina laki, mijalidu yaki, vo watanja ndipuso vo watinkha, vinthu vo wakuchitapu, vilatu vaki kweniso vinthu vinyaki. Venivi ndivu vingukuchitiskani kuti muje nayu pa ubwezi. Munthowa yinyaki, tingakamba kuti mungusambira vakukwaskana ndi iyu.

Mwakuyanana waka, kuti timuziŵi umampha Chiuta, tikhumbika kuziŵa kwamuka kwa mafumbu yanga:

• KUMBI ZINA LAKU CHIUTA NDIYANI?

• KUMBI CHIUTA NDI MUNTHU WA MTUNDU WULI?

• KUMBI NDI VINTHU WULI VO CHIUTA WAKUCHITA?

• KUMBI CHIUTA WAZAMUCHITANJI KUNTHAZI?

• KUMBI KUZIŴA CHIUTA KUNGAKUWOVYANI WULI?

Magazini iyi yikuwovyeningi kusaniya kwamuka kwa mafumbu ngenanga kutuliya m’Bayibolu. Nkhani zo ze m’magazini iyi, zikuwovyeningi kuti mumuziŵi umampha Chiuta kweniso kuti muziŵi vinthu vamampha vo iyu wazakukuchitiyani kunthazi asani mujengi nayu pa ubwezi.