Asani mwakumana ndi masuzgu, mukayika cha kuti mubwezi winu wakuwovyeningi. Kweni ŵanthu anyaki akamba kuti Chiuta ndi mubwezi wawu cha chifukwa chakuti watiŵawovya cha asani akumana ndi masuzgu. Chinanga kuti ve viyo, uneneska ngwakuti, Chiuta watichitiya kali vinthu vinandi vamampha, kweniso kunthazi wazamutuzgapu masuzgu ngosi ngo tikumana nangu. Kumbi Chiuta wazamuchitanji kunthazi?

Kuti vinthu vosi viheni vizimali, Chiuta wazamutuzgapu dankha yo wativiyambisa. Bayibolu lizumbuwa yo wachitiska kuti tikumanengi ndi masuzgu. Likamba kuti: “Charu chosi che mu nthazi ya muheni yo.” (1 Yohane 5:19) “Muheni” yo wakambika yapa ndi Satana Dyaboli, yo Yesu wangumukamba kuti “wakuwusa wa charu ichi.” (Yohane 12:31) Satana ndiyu wachitiska kuti pacharu chapasi pachitikengi vinthu viheni. Kumbi Chiuta wazamuchitanji kunthazi?

Pambula kuswera, Yehova Chiuta wachitengepu kanthu, ndipu wagwiriskiyengi ntchitu Mwana waki Yesu Khristu kuti “wanangi Dyaboli, yo we ndi nthowa yakuchitiskiya nyifwa.” (Aheberi 2:14; 1 Yohane 3:8) Bayibolu lilongo kuti Dyaboli mweneku waziŵa kuti “waja ndi kanyengu kamanavi” kuti wabayiki. (Chivumbuzi 12:12) Kweniso Chiuta wazamutuzgapu ŵanthu wosi wo achita vinthu viheni.​—Salimo 37:9; Nthanthi 2:22.

Asani wazituzgapu vinthu vosi viheni pacharu chapasi, Mlengi widu wazamuchitapu kanthu kuti wafiski chilatu chaki, chakuti ŵanthu akufikapu aje mu paradayisu kwamuyaya. Kumbi ndi vinthu wuli vo titenere kulindizga?

Kwazamukuŵa chimangu ndi kuvikilirika. “Akufwasa azamulonde charu chapasi ndipu azamukondwa ndi chimangu chikulu.”​—Salimo 37:11.

Kwazamukuŵa vakurya vinandi kweniso vamampha. “Pacharu chapasi pazamukuŵa vakurya vinandi. Ndipu vazamuzala pachanya pa mapiri.”​—Salimo 72:16.

Kwazamukuŵa nyumba zamampha ndipuso ntchitu zakukhorweska. “Azamuzenga nyumba ndi kujamu, ndipuso azamupanda minda ya mphereska ndi kurya vipasu vaki. . . . Akusankhika ŵangu azamukondwa ukongwa ndi ntchitu ya manja ngawu.”​—Yesaya 65:21, 22.

Kumbi namwi mutivikhumbira vinthu venivi? Vinthu venivi vichitikengi pambula kuswera, ndipu weyosi wazamukondwanga navu.

Mazuŵa nganu, weyosi watama, ndipuso ŵanthu atufwa. Kweni venivi vazamuchitika so cha kunthazi. Pambula kuswera, Chiuta waperekengi vitumbiku ku ŵanthu mwakugwiriskiya ntchitu sembi yaku Yesu. Chiuta wachitengi ivi kuti “weyosi wakuvwana mwaku iyu waleki kunangika, kweni waje ndi umoyu wamuyaya.” (Yohane 3:16) Kumbi ndi vinthu wuli vo vazamuchitika pavuli paki?

Wazamutuzgapu matenda. “Palivi wakuja mu charu cho yo wazamukamba kuti: ‘Ndatama.’ Ŵanthu wo azamuja mu charu cho azamugowokereka maubudi ngawu.”​—Yesaya 33:24.

Wazamutuzgapu nyifwa. “Iyu wazamumeza nyifwa kwamuyaya, ndipu Yehova Ambuya Fumu Yikulu wazamuleska masozi ngosi ku masu ngawu.”​—Yesaya 25:8.

Ŵanthu azamuja kwamuyaya. “Mphasu yo Chiuta wapereka mbumoyu wamuyaya kuporote mwa Ambuyafwi Khristu Yesu.”​—Aroma 6:23.

Ŵanthu wo akufwa azamuyuskika. “Kwazamuja chiyuka cha ŵanthu arunji ndi ambula urunji.” (Machitidu 24:15) Yiwu azamuyuskika chifukwa cha mphasu ya sembi yo Chiuta wakupereka.

Kumbi Chiuta wazamuchita wuli kuti wafiski venivi?

Kuti Chiuta wafiski chilatu chaki, wazamugwiriskiya ntchitu boma lakuchanya, ndipu Yesu Khristu ndiyu wakusankhika kuti walamuliyengi boma lenili. (Salimo 110:1, 2) Lenili ndi boma pamwenga kuti ufumu, wo Yesu wangusambiza akusambira ŵaki kuti awupempheriyengi. Iyu wanguti: “Awusefwi akuchanya, . . . Ufumu winu uzi.”​—Mateyu 6:9, 10.

Ufumu waku Chiuta wazamulamuliya charu chosi chapasi, ndipu wazamutuzgapu masuzgu ngosi ngo ŵanthu akumana nangu. Ufumu wenuwu ndi boma lamampha ukongwa kuphara maboma nga ŵanthu. Ndichu chifukwa chaki, Yesu wangujipereka kupharazga “uthenga wamampha wa Ufumu” pa nyengu yo wachitanga uteŵeti waki pacharu chapasi. Ndipu iyu wangukambiya akusambira ŵaki kuti nawu achitengi so viyo.​—Mateyu 4:23; 24:14.

Chifukwa chakuti Yehova Chiuta watiŵayanja ukongwa ŵanthu, walayizga kuti wazakuŵachitiya vinthu vamampha vosi venivi. Kumbi venivi vitikuchitiskani cha kuti mumuziŵi kweniso kuti muje nayu pa ubwezi? Asani mungasankha kuchita viyo, kumbi mungayanduwanji? Nkhani yakulondopu yimukengi mafumbu ngenanga.