Kufika yapa, tasambira vinthu vo vingatiwovya kuziŵa kwamuka kwa fumbu lakuti, Kumbi Chiuta ndiyani? Tawona vo Bayibolu likamba kuti zina laki ndi Yehova kweniso kuti chanju ndilu jalidu laki lapade. Tawona so vo wakutichitiya ndipuso vinthu vamampha vo wazakutichitiya kunthazi. Chinanga kuti pe vinthu vinandi vo tingasambira vakukwaskana ndi Chiuta, panyaki mungakhumba kuziŵa vitumbiku vo mungasaniya asani mungasambira vinthu venivi.

Yehova walayizga kuti ‘asani mumupenjengi, iyu wazomerezengi kuti mumusaniyi.’ (1 Mbiri 28:9) Asani mufufuza kuti mumuziŵi umampha Chiuta, ‘mujengi nayu pa ubwezi wakukho’! Ndipu chenichi ntchinthu chakuzirwa kasaza cha. (Salimo 25:14) Kumbi kuja pa ubwezi ndi Chiuta kungakuwovyani wuli?

Likondwa chayilu. Bayibolu likamba kuti Yehova ndi “Chiuta walikondwa.” (1 Timote 1:11) Asani mungaja pa ubwezi ndi Chiuta kweniso kuchita vo iyu wakhumba, vingakuwovyani kuti muje ndi likondwa chayilu la mumtima. Venivi vingawovya kuti muje ndi umoyu wamampha, wambula kutamatama. (Salimo 33:12) Vingakuwovyani so kuti muje ndi umoyu walikondwa. Iyu wangakusambizani vo mungachita kuti muleki kuchita vinthu vo vingananga umoyu winu, muchitengi vinthu vo vingakuwovyani kuti mulekengi kutamatama kweniso kuti mujengi umampha ndi anyinu. Ndipu pakumaliya, mwazamukoliyana ndi vo wangukamba yo wakulembaku Buku la Sumu kuti: “Kundere kufupi ndi Chiuta nkhwakuzirwa kwaku ini.”​—Salimo 73:28.

Wakuphweriyeningi. Yehova wangulayizga ateŵeti ŵaki kuti: “Ndikupaskengi ulongozgi ndipu jisu langu lijengi paku yiwi.” (Salimo 32:8) Ivi ving’anamuwa kuti Yehova waphwere mteŵeti waki weyosi pakuyija, ndipu watimupaska vinthu vosi vo wakhumbikiya. (Salimo 139:1, 2) Asani namwi mungaja pa ubwezi wakukho ndi Yehova, muwonengi kuti nyengu zosi wakuwovyeningi.

Kulindizga vinthu vamampha kunthazi. Kusazgiyapu pa fundu yakuti Yehova Chiuta wakuwovyeningi kuti muje ndi umoyu wamampha sonu, iyu wakukupaskani mwaŵi wakuti mulindizgengi vinthu vamampha ukongwa kunthazi. (Yesaya 48:17, 18) Bayibolu likamba kuti: “Azamusaniya umoyu wamuyaya asani aziŵa yimwi Chiuta yija wauneneska, ndi Yesu Khristu yo mukutuma.” (Yohane 17:3) Mu nyengu yinu yakusuzga, chilindizga cho Chiuta wakutipaska che nge ndondowa ya maumoyu ngidu ndipu “tchakusimikizika kweniso ntchakukho.”​—Aheberi 6:19.

Pe vifukwa vinandi vo tikhumbika kumuziŵiya umampha Chiuta kweniso kuja nayu pa ubwezi. Kweni yapa takambiskanapu waka vimanavi. Mwaviyo, kuti muziŵi vinandi, fumbani yumoza wa Akaboni aku Yehova pamwenga lutani pa jw.org.