“Mwaviyo, lutirizgani kuja masu chifukwa mutiliziŵa cha zuŵa pamwenga ora laki.”—MATEYU 25:13.

“Tcheŵani ndipu lutirizgani kuja masu, chifukwa nyengu yakuŵikika mutiyiziŵa cha.”—MARIKO 13:33.

Mwaviyo, palivi weyosi pacharu chapasi yo waziŵa nyengu chayiyu yo vinthu va mu nyengu yinu vimaliyengi. Kweni Chiuta wakuŵikiya limu “nyengu yakuŵikika,” kung’anamuwa “zuŵa ndi ora” chayilu lo umaliru uziyengi. (Mateyu 24:36) Kumbi venivi ving’anamuwa kuti palivi nthowa yeyosi yakuziŵiya asani umaliru wepafupi? Awa. Yesu wangukambiya akusambira ŵaki kuti azamuwona vinthu vo vazamulongo kuti umaliru we pafupi ukongwa.

Vinthu venivi vo Yesu wangukamba vatingi viŵengi chisimikizu cha “kumala kwa nyengu yinu.” Yesu wanguti: “Mtundu wazamuyukiyana ndi mtundu unyaki, ufumu ndi ufumu unyaki, ndipu kwazamuja nja ndi vidilirisi mumalu ngakupambanapambana.” (Mateyu 24:3, 7) Iyu wangukamba so kuti kwazamuja “milili.” (Luka 21:11) Kumbi mutiviwona vinthu vo Yesu wangukambiya limu?

Mazuŵa nganu, ŵanthu asuzgika chifukwa cha nkhondu, nja ndipuso vidilirisi kweniso matenda ngakuchita kundondozana. Mwakuyeruzgiyapu, mu 2004 chidilirisi chikulu cho chinguchitika munyanja ya Indian Ocean chinguchitiska tsunami yo wangubaya ŵanthu pafufupi 225,000. Kujumpha chaka chimoza, mulili wa COVID-19 wabaya ŵanthu pafufupi 2.6 miliyoni. Yesu wangukamba kuti vinthu venivi kweniso vinyaki, vazamulongo kuti umaliru wa nyengu yinu wepafupi.

Bayibolu likamba kuti nyengu yo tilimu sonu ndi “mazuŵa ngakumaliya.” (2 Peturo 3:3, 4) Lemba la 2 Timote 3:1-5, likamba kuti mu mazuŵa ngakumaliya ŵanthu azamukana kulondo fundu za mijalidu yamampha. (Wonani bokosi lakuti, “ Charu Chechendamali.”) Kumbi namwi mutiŵawona ŵanthu wo mbakujiyanja, ambunu, akofya, kweniso ambula chanju mazuŵa nganu? Wenuwu so mbukaboni wakuti tija kukumaliya chayiku kwa umaliru wa charu ichi.

Kumbi mazuŵa ngakumaliya ngatongi utali wuli? Mwakukoliyana ndi vo Bayibolu likamba, ngaŵengepu kwa “kanyengu kamanavi.” Pavuli paki, Chiuta wazamunanga “wo ananga charu chapasi.”—Chivumbuzi 11:15-18; 12:12.

Chiuta wakuŵikiya limu zuŵa ndi ora lo wazamutuzgiyapu vinthu viheni va mu nyengu yinu. (Mateyu 24:36) Kweni pe so uthenga wamampha. Ndipu uthenga waki ngwakuti, Chiuta “wakhumba cha kuti weyosi wanangiki.” (2 Peturo 3:9) Iyu watiŵapaska mwaŵi ŵanthu wakuti avwiyengi fundu zaki. Chifukwa wuli? Chifukwa wakhumba kuti tizitaskiki po charu ichi chazamumaliya ndi kuzija mucharu chaki chifya, pa nyengu yo charu chazamujaliya paradayisu.

Chiuta wakunozga kuti pacharu chosi pachitikengi ntchitu yakusambiza ŵanthu, kuti asambiri vo angachita kuti nawu azije mucharu chifya cho chazamulamulika ndi Ufumu waki. Yesu wangukamba kuti uthenga wamampha wa Ufumu waku Chiuta wazamupharazgika “pacharu chosi chapasi.” (Mateyu 24:14) Mu 2019, Akaboni aku Yehova pacharu chosi angumaliya maora ngakujumpha 2 biliyoni pa kupharazga ndi kusambiza ŵanthu uthenga wa mu Bayibolu wakupaska ŵanthu chilindizga. Yesu wangukamba kuti ntchitu yakupharazga yeniyi, yazamuchitika pacharu chosi umaliru wechendazi.

Nyengu yakuti ŵanthu alamuliyi ye pafupi kumala. Kweni uthenga wamampha ngwakuti mungazitaskika po charu chazamumaliya ndi kuzija mucharu chapasi cha Paradayisu cho Chiuta wakulayizga. Nkhani yakulondopu yikonkhoskengi vo mungachita kuti muzije mucharu chifya chenichi.