Mazu ngakuti chilangu ngangang’anamuwa kupereka ulongozgi pamwenga kusambiza. Nyengu zinyaki, ngasazgapu kuwovya mwana kuti wasinthi nkharu yaki yiheni. Kweni kanandi, ngasazgapu kuwovya mwana kuti wasambiri mo wangasankhiya vinthu mwazeru kuti waleki kunangisa.

Mu vyaka va pambula kuswera yapa, vawoneka kuti apapi anandi atiŵalanga cha ŵana ŵawu chifukwa atopa kuti ŵana wo angayamba kujikayikiya. Chinanga kuti ve viyo, apapi azeru ajalikiska marangu ngambula kusuzga kweniso asambiza ŵana ŵawu vo angachita kuti avwiyengi marangu ngeningo.

“Ŵana akhumbika kuŵakambiya vo angachita kweniso vo atenere cha kuchita kuti akuwi umampha. Asani ŵana aleka kupaskika ulongozgi, angayanana waka ndi sitima yo yilivi sigilu yo yingalanda pamwenga so kuchita ngozi.”—Pamela.

Mungasinthangasinthanga cha. Asani mwana winu wavwiya cha marangu ngo mukujalikiska, muwonesesengi kuti wapaskika chilangu. Kweni asani wavwiya, mutenere kumuwonga.

“Kanandi nditiŵawonga ŵana ŵangu chifukwa chakuti avwiya chinanga kuti ŵanthu anandi mucharu ichi avwiya cha. Kuŵawonga kutovya kuti aleki kusuzgika kuzomera ulongozgi wo ndingaŵapaska asani anangisa vinthu vinyaki.”—Christine.

FUNDU YA M’BAYIBOLU: “Chechosi cho munthu wamija, ndichu so wazamuvuna.”—Agalatiya 6:7.

Mujengi akoloŵa. Mwechendapereki chilangu, muŵanaŵaniyengi msinkhu wa mwana, vo wafiska kuchita kweniso ukulu wa chinthu cho wanangisa. Chilangu chija chakwenere asani chikoliyana ndi vo wanangisa. Mwakuyeruzgiyapu, asani mwana waleka kuvwiya marangu ngo mukumupaska nga mo wangagwiriskiya ntchitu foni, kwa kanyengu mungamulonda foni pamwenga mungamupaska nyengu yo watenere kuyigwiriskiya ntchitu. Chinanga kuti ve viyo, kanthu kamana ko mwana winu wanangisa mungakakuzganga cha kuja nkhani yikulu.

“Ndiwonesesa asani mwana wangu waleka kuvwiya mwadala pamwenga asani wanangisa nadi. Pe kupambana pakati pa kunangisa ŵaka mwangozi ndi kunangisa vinthu mwakuwerezawereza, ko kulongo kuti mwana yo wakhumbika kuwovyeka.”—Wendell.

FUNDU YA M’BAYIBOLU: “Mungakwiyisanga ŵana ŵinu cha, kuti aleki kugongowa.”—Akolose 3:21; mazu ngamumphata.

Muŵayanjengi. Ŵana asuzgika cha kuzomerezga chilangu cho apaskika ndipu atesesa kusintha asani aziŵa kuti apapi ŵawu achita viyo chifukwa chakuti atiŵayanja.

“Mwana widu wati wanangisa vinthu vinyaki, tingumusimikiziya kuti tingukondwa ukongwa chifukwa cha vinthu vosi vo wangusankha umampha nyengu yinyaki kuvuli. Tingumukonkhoske kuti vo wangunangisa pa nyengu iyi, vingamuchitiskanga cha kuti wawere vuli. M’malu mwaki wakhumbikanga kuyesesa kuti wanozgi vo wangunangisa ndipu isi tikhumbisiska kumuwovya.”—Daniel.

FUNDU YA M’BAYIBOLU: “Chanju chizizipizga ndipuso ntchalisungu.”—1 Akorinto 13:4.