Ŵanthu akutorana wo mbakugomezgeka ku nthengwa yawu, awona kuti akhumbika kuja munthengwa kwa umoyu wawu wosi ndipu venivi vichitiska kuti ajengi mwakuvilirika ukongwa. Weyosi wawona kuti walutirizgengi kuja munthengwa chinanga kuti angakumana ndi masuzgu.

Mabanja nganyaki ngachita kuchichizgika ŵaka kuja panthengwa chifukwa chakuti mabwezi ngawu kweniso achibali ŵawu atiŵakambiya kuti angamalisanga cha nthengwa yawu. Kweni chanju ndipuso kutumbikana ndivu vingaŵawovya kuti aje akugomezgeka.

FUNDU YA M’BAYIBOLU: “Munthulumi wangamulekanga cha muwolu waki.”—1 Akorinto 7:11.

“Asani uja wakugomezgeka munthengwa yaku, uguŵa liŵi cha asani munyaku wakunangiya. Ugowoka liŵi kweniso upepesa. Asani mwakumana ndi masuzgu, mutesesa kumalisa masuzgu ngo, m’malu mwakumalisa nthengwa.”—Micah.

Asani ŵanthu akutorana wo mbambula kugomezgeka akumana ndi masuzgu, athaŵiriya kukamba kuti, ‘Vikuchitika ŵaka kuti titorani’ ndipu atesesa kusaniya nthowa yeyosi kuti amalisi nthengwa.

“Ŵanthu anandi wo ayirwa pamwenga kuto, aja ndi maŵanaŵanu ngakuti asani nthengwa yawu yachileka kwenda umampha chipusu cho amuchita nkhuyimalisa ŵaka. Asani munthu we ndi maŵanaŵanu ngenanga kali panyengu yo wayirwa pamwenga kuto, vichitiska kuti waleki kuja wakugomezgeka.”—Jean.

MUKANI MAFUMBU YANGA PAKUMWIJA

Asani mwapambana maŵanaŵanu . . .

• Kumbi mudandawula kuti mukunangisa kutorana ndi munthulumi pamwenga munthukazi yo mwe nayu?

• Kumbi muŵanaŵaniya kuti mwatorana ndi munthu munyaki?

• Kumbi mukamba mazu ngakuti, “Ndikulekengi” pamwenga ngakuti “Ndisaniyengi munthu munyaki yo wangandiyanja”?

Asani mwamuka kuti hinya pa fumbu limoza pamwenga kujumpha pa mafumbu ngo nge pachanya yapa, ndikuti sonu ndiyu nyengu yakuti musinthi vinthu vinyaki kuti muyesesi kuja wakugomezgeka munthengwa yinu.

KAMBISKANANI NDI MUNTHU YO MUKUTORANA NAYU

• Kumbi tikuleka kugomezgeka munthengwa yidu? Asani ndi viyo, ntchifukwa wuli?

• Kumbi ndi vinthu wuli vo tingachita kuti tilutirizgi kuja akugomezgeka?

FUNDU ZAKOVYA

• Nyengu zinyaki, mulembiyengi munthu yo mukutorana nayu uthenga wakuti mutimuyanja

• Muŵikengi vithuzi va mulumu winu pamwenga muwolu winu padesiki linu ku ntchitu

• Zuŵa lelosi mumbiyengi foni munthu yo mukutorana nayu asani mwe ku ntchitu pamwenga asani mwe kumalu nganyaki ngo iyu kulivi

FUNDU YA M’BAYIBOLU: “Cho Chiuta wamanga pamoza, munthu wangapatuwanga cha.”—Mateyu 19:6.