Kumbi chilengedu kweniso vinthu vamoyu vo ve mwenimo vikulengeka ndi Chiuta pamwenga vikuŵaku ŵaka vija? Mazu ngo asayansi ŵaŵi wo taŵazumbuwa pachanya yapa angukamba kweniso vo Bayibolu likamba pa Genezesi 1:1, vimuka fumbu lenili mwakupambana. Pe ŵanthu anyaki wo akoliyana ndi fundu yinyaki penipo anyaki akoliyana ndi fundu yinyaki. Chinanga kuti ve viyo, ŵanthu anandi aziŵa cha kuti uneneska ndi nuwu. Ŵanthu asuskana va nkhani yeniyi mu mabuku ngakuziŵika ukongwa kweniso pa TV.

Asambizi winu atenere kuti angukusambizani kuti kulivi Mlengi ndipuso kuti chilengedu ndi vinthu vamoyu vo ve mwenimo vikujaku waka vija. Kweni kumbi asambizi winu angupereka ukaboni wakuti kulivi Mlengi? Kweniso vingaŵa kuti mukuvwapu alongozgi avisopa achikamba kuti kwe Mlengi. Kweni kumbi yiwu angupereka ukaboni wanthazi pa nkhani yeniyi? Pamwenga angukukambiyani kuti mukhumbika waka kugomezga chifukwa chakuti yiwu agomezga kuti Mlengi waliku?

Akhumba mukuŵanaŵaniyapu fumbu lenili ndipu panyaki muwona kuti palivi munthu yo wangapereka ukaboni wanthazi wakuti kwe Mlengi. Ndipu mungaŵa ndi fumbu linyaki lakuti: Kumbi kuziŵa uneneska nkhwakukhumbika ukongwa?

Magazini ya Jani Masu! iyi, chakwamba yikonkhoskengi fundu zo zawovyapu ŵanthu anandi kuti agomezgengi kuti kwe Mlengi. Ndipu pavuli paki, yikonkhoskengi chifukwa cho tikhumbikiya kuziŵiya mo chilengedu kweniso umoyu ukwambiya pacharu chapasi.