Ntchifukwa Wuli Kuziŵa Kuti kwe Mlengi Nkhwakukhumbika?
Ntchifukwa wuli kuziŵa kuti kwe Mlengi nkhwakukhumbika? Asani musimikiza kuti Chiuta wanthazizosi waliku, mbwenu mungafufuza ukaboni wakuti Bayibolu likulembeka ndi iyu. Ndipu asani mugomezga vo Bayibolu likamba, mungayanduwa mu nthowa izi.
Mukondwengi ukongwa ndi umoyu
VO BAYIBOLU LIKAMBA: “[Chiuta] wachita vinthu vamampha, watikupaskani vuwa kutuliya kuchanya ndipuso nyengu za vipasu, watikupaskani so vakurya vinandi kweniso wazaza mitima yinu ndi likondwa.”—Machitidu 14:17.
VO LING’ANAMUWA: Vinthu vosi vo mukondwa navu pacharu chapasi ndi mphasu yakutuliya ku Mlengi. Mungawonga ukongwa mphasu zenizi asani mungaziŵa mo Chiuta watikuphweriyani.
Musaniyengi ulongozgi wamampha wo ungakuwovyani sonu
VO BAYIBOLU LIKAMBA: “Uvwisengi cho ntchaurunji, chakunyoloka ndipuso chakwenere, uvwisengi nthowa yosi ya cho ntchamampha.”—Nthanthi 2:9.
VO LING’ANAMUWA: Nge Mlengi winu, Chiuta waziŵa vo mukhumbika kuti mukondwengi. Asani musambira Bayibolu, mungasambira vinandi vo vingakuwovyani pa umoyu winu.
Musaniyengi kwamuka kwa mafumbu nginu
VO BAYIBOLU LIKAMBA: “Umuziŵengi Chiuta.”—Nthanthi 2:5.
VO LING’ANAMUWA: Kuziŵa kuti kwe Mlengi, kungakuwovyani kuziŵa kwamuka kwa mafumbu ngakukhumbika ukongwa, nge ngakuti: Ntchifukwa wuli te ndi umoyu? Ntchifukwa wuli pacharu pe masuzgu nganandi viyo? Ntchinthu wuli chichitika asani munthu wafwa? Mungasaniya kwamuka kwakukhorwesa kwa mafumbu ngenanga mu Bayibolu.
Mujengi ndi chilindizga cha munthazi
VO BAYIBOLU LIKAMBA: “‘Ndiziŵa umampha vo nditikuŵanaŵaniyani,’ Yehova ndiyu wakamba, ‘ndiŵanaŵana kuti ndikupaskeni chimangu, soka cha, kuti vinthu vizikuyendiyeni umampha kunthazi kweniso kuti muje ndi chilindizga chamampha.’”—Yeremiya 29:11.
VO LING’ANAMUWA: Chiuta walayizga kuti kunthazi wazamutuzgapu vinthu viheni, masuzgu ndipuso chinanga ndi nyifwa. Asani mugomezga malayizgu ngaku Chiuta, vinthu vamampha vo mulindizga vikuwovyeningi kukunthiyapu masuzgu ngo mukumana nangu.
Mungayanja Kuŵerenga so Nkhani Izi
JANI MASU!
Vo Vingatiwovya Kuti Tikondwengi—Chilatu cha Umoyu
Kusaniya kwamuka kwakukhorwesa kwa mafumbu ngakukhumbika ukongwa pa umoyu, nkhwakovya kuti tikondwengi
