NKHANI YAKUSAMBIRA YA NAMBALA 32
Muyendengi Mwakujiyuyuwa ndi Chiuta Winu
“Uyendengi mwakujiyuyuwa ndi Chiuta waku!”—MIKA 6:8.
SUMU 31 Yendani ndi Chiuta
VO TISAMBIRENGI MU NKHANI IYI *
1. Kumbi Davidi wangukambanji vaku Yehova pa nkhani ya kujiyuyuwa?
KUMBI Yehova ngwakujiyuyuwa nadi? Hinya. Davidi wangulemba kuti: “Yimwi mutindipaska chishangu chinu cha utaski, ndipu kujiyuyuwa kwinu ndiku kutindikweza.” (2 Samu. 22:36; Sumu 18:35) Davidi wachilemba mazu yanga, panyaki wakumbukanga nyengu yo Samuele wanguziya ku nyumba kwa awisi aku Davidi kuti wazisankhi fumu yasonu ya Ayisirayeli. Davidi wenga munamana ukongwa pa ŵana 8 kweni ndiyu Yehova wangumusankha kuti waje Fumu mumalu mwaku Sauli.—1 Samu. 16:1, 10-13.
2. Kumbi mu nkhani iyi tikambiskanengenji?
2 Davidi wangukoliyana ndi vo ve pa Sumu 113 po pakamba kuti: “Iyu wakotama kuti walereski kuchanya ndi charu chapasi. Iyu wasoska munthu wakusika kutuwa mufuvu. Wakweza munthu mukavu . . . kuti waje limoza ndi ŵanthu akuzirwa.” (Sumu 113:6-8) Mu nkhani iyi, tiwonengi vo tisambira pa nkhani ya kujiyuyuwa kutuwa kwaku Yehova. Tiwonengi so vo tingasambira kwaku Sauli, mchimi Danyele kweniso Yesu pa nkhani ya kujiyuyuwa.
KUMBI TINGASAMBIRANJI KWAKU YEHOVA PA NKHANI YA KUJIYUYUWA?
3. Kumbi Yehova wachita nasi wuli vinthu, ndipu venivi vilongonji?
3 Yehova walongo kuti ngwakujiyuyuwa asani tiwona mo wachitiya vinthu ndi ateŵeti ŵaki ambula kufikapu. Iyu wazomereza kuti timusopengi kweniso watitiwona kuti ndisi mabwezi ngaki. (Sumu 25:14) Kuti tije nayu pa ubwezi, Yehova wangupereka Mwana waki sembi kuti maubudi ngidu ngagowokereki. Yapa Yehova wakutilongo lisungu likulu ukongwa.
4. Kumbi Yehova wakutipaskanji, ndipu ntchifukwa wuli?
4 Wonani so nthowa yinyaki yo Yehova walongore kuti ngwakujiyuyuwa. Pakuŵa Mlengi, Yehova watingi watipaskengi cha wanangwa wakusankha mo tingachitiya ndi umoyu widu. Iyu wakutilenga mu chikozgu chaki ndipuso wakutipaska wanangwa wakusankha vo tikhumba kuchita. Yehova wakhumba kuti isi taŵanthu ambula kufikapu, timuteŵetiyengi mwakukhumba tija chifukwa chakuti titimuyanja, kweniso chifukwa chakuti tiziŵa kuti vinthu vingatiyende umampha asani titimuvwiya. (Mara. 10:12; Yesa. 48:17, 18) Tiwonga kuti Yehova ngwakujiyuyuwa ukongwa.
Yesu we kuchanya ndipu wama pafupi ndi anyaki mwa ŵanthu wo wamulamuliya nawu. Yiwu awona mzinda ukulu wa angelu. Angelu anyaki asikiya pacharu chapasi kuti akateŵete. Wosi wo ŵe pa chithuzi ichi Yehova wakuŵapaska vakuchita (Wonani ndimi 5)
5. Kumbi Yehova watitisambiza wuli kuti tijengi akujiyuyuwa? (Wonani chithuzi cho che pachikonkhombi.)
5 Yehova watitisambiza kuti tijiyuyuwengi asani tiwona mo wachitiya nasi vinthu. Iyu ndiyu we ndi zeru ukongwa kuchanya ndi pacharu chapasi. Chinanga kuti ve viyo, wagwira ntchitu ndi ŵanthu ndipuso wavwiya masachizgu ngawu. Mwakuyeruzgiyapu, Yehova wanguzomereza Mwana waki kuti wamuwovyi kulenga vinthu vosi. (Nthanthi 8:27-30; Ako. 1:15, 16) Chinanga kuti Yehova ngwanthazi zosi, kweni wapaskaku anyaki mazaza. Mwakuyeruzgiyapu, wakusankha Yesu kuti waje Fumu ya Ufumu waki ndipu pambula kuswera yapa waperekengi mazaza nganyaki kwa a 144,000 wo azamulamuliya ndi Yesu. (Luka 12:32) Yehova wakusambiza so Yesu kuti waje Fumu kweniso Wasembi Mura. (Ahe. 5:8, 9) Wasambiza so wo amulamuliya ndi Yesu mo azamuchitiya uteŵeti wawu kweni watiŵakambiya vosi cha vakukwaskana ndi mo azamuchitiya uteŵeti wawu. Mumalu mwaki watiŵathemba kuti azamuchita umampha khumbu laki.—Chivu. 5:10.
Tiyezga Yehova asani tisambiza kweniso kuŵapaska vakuchita anyidu (Wonani ndimi 6-7) *
6-7. Kumbi tisambiranji kwaku Yehova pa nkhani yakupaska anyidu vakuchita?
6 Chifukwa chakuti Yehova wapaskaku anyaki vakuchita, nasi tikhumbika kumuyezga. Mwakuyeruzgiyapu, kumbi yimwi ndimwi mutu wa banja pamwenga mura mu mpingu? Asani ndi viyo, muyezgengi Yehova mwakupaskaku anyinu vakuchita ndipu mungaŵakayikiyanga cha kuti atondekengi kufiska. Asani tiyezga Yehova, ntchitu yigwirikengi kweniso tisambizengi ŵanthu anyaki ndipu tiŵawovyengi kuti agwirengi ntchitu ndi mtima wosi. (Yesa. 41:10) Kumbi ndi vinthu wuli vinyaki vo ŵanthu wo ŵe ndi mazaza angasambira kwaku Yehova?
7 Bayibolu lilongo kuti Yehova wavwisiya maŵanaŵanu nga angelu. (1 Ŵakaro. 22:19-22) Apapi, kumbi mungamuyezga wuli Yehova? Asani mphakwenere mufumbengi ŵana ŵinu mo mungagwiriya ntchitu yinyaki. Ndipu asani vo akamba vakovya, mungavigwiriskiya ntchitu.
8. Kumbi Yehova wanguchita wuli vinthu mwakuzikira ndi Abrahamu kweniso Sara?
8 Yehova walongo kuti ngwakujiyuyuwa chifukwa ngwakuzikira. Mwakuyeruzgiyapu, wazikira asani ateŵeti ŵaki akayikiya vo wasankha. Iyu wanguvwisiya pa nyengu yo Abrahamu wakambanga maŵanaŵanu ngaki pa nkhani ya kunanga Sodomu ndi Gomora. (Chiya. 18:22-33) Ndipuso kumbukani mo Yehova wanguchitiya vinthu ndi Sara, muwolu waku Abrahamu. Yehova wanguguŵa cha pamwenga kukwiya Sara wati waseka chifukwa cha vo wangumulayizga kuti wamengi nthumbu, chinanga kuti wenga wakukota. (Chiya. 18:10-14) Mumalu mwaki wanguchita nayu vinthu mwaulemu.
9. Kumbi apapi ndipuso ŵara angasambiranji kwaku Yehova pa nkhani ya kujiyuyuwa?
9 Kumbi apapi ndipuso ŵara mungasambiranji kwaku Yehova pa nkhani ya kujiyuyuwa? Kumbi muchita wuli asani ŵana ŵinu pamwenga abali ndi azichi anyaki mu mpingu akayikiya vo mwasankha? Kumbi muthaŵiriya kukamba kuti mbakunanga? Pamwenga muvwisa chifukwa cho akambiya viyo? Mabanja kweniso abali ndi azichi mu mpingu ayanduwa asani wo ŵe ndi mazaza atesesa kuyezga Yehova. Kufika yapa, takambiskana vo tingasambira kwaku Yehova pa nkhani ya kujiyuyuwa. Sonu tiyeni tikambiskani va ŵanthu anyaki wo azumbulika mu Bayibolu. Ndipu venivi vitiwovyengi kuja akujiyuyuwa.
VO TINGASAMBIRA KU ŴANTHU ANYAKI PA NKHANI YA KUJIYUYUWA
10. Kumbi Yehova watitisambiza wuli kuziya mu vo vinguchitikiya ŵanthu anyaki?
10 Pakuŵa ‘Msambizi widu Mura,’ Yehova wakutipaska vakuwoniyapu mu Mazu ngaki kuti watisambizi. (Yesa. 30:20, 21) Mu Bayibolu tisambiramu nkhani za ŵanthu anyaki wo ŵenga ndi mijalidu yamampha yo yikondwesa Yehova, nge kujiyuyuwa. Tiwonamu so vo vinguchitikiya ŵanthu wo angutondeka kulongo mijalidu yamampha.—Sumu 37:37; 1 Akori. 10:11.
11. Kumbi tingasambiranji kwaku Sauli?
11 Kumbukani vo vinguchitikiya Fumu Sauli. Pakwamba wenga wakujiyuyuwa. Iyu waziŵanga kuti wangafiska cha kuchita vinthu vinyaki mwakuti wakananga kuja fumu. (1 Samu. 9:21; 10:20-22) Kweni pati pajumpha nyengu, Sauli wangwamba kujikuzga. Venivi vinguziŵika pati pajumpha nyengu yimanavi kutuliya po wangujaliya fumu. Nyengu yinyaki wangutondeka kuzikira po walindizganga mchimi Samuyeli. Mumalu mwakuthemba Yehova kuti ndiyu wawovyi ŵanthu, Sauli wangupereka sembi chinanga kuti wenga udindu waki cha. Venivi vinguchitiska kuti Yehova waleki kumuyanja ndipu wangumulonda ufumu. (1 Samu. 13:8-14) Tingachita umampha kusambirapu kanthu kuti tileki kuchita vinthu mwakujikuzga nge Sauli.
12. Kumbi Danyele wangulongo wuli kuti ngwakujiyuyuwa?
12 Mwakupambana ndi Sauli yo wanguchita vinthu viheni, mchimi Danyele wangulongo kuti wenga wakujiyuyuwa. Kwa umoyu waki wosi, Danyele wenga wakujiyuyuwa ndipu nyengu zosi wapemphanga Yehova kuti wamupaski ulongozgi. Mwakuyeruzgiyapu, Yehova wati wamugwiriskiya ntchitu kufwatuliya malotu ngaku Nebukadinezara, Danyele wangukambapu cha kuti wafwatuliya malotu chifukwa cha zeru zaki. Kweni wangukamba kuti Yehova ndiyu wachitiska. (Danye. 2:26-28) Kumbi tisambiranjipu? Asani abali atitilumba chifukwa chakuti tikamba umampha nkhani pamwenga asani vititiyende umampha mu uteŵeti, tikankhuskengi Yehova. Titenere kuziŵa kuti tatingi tifiskengi cha tija kwambula kuwovyeka ndi Yehova. (Afi. 4:13) Asani tichita viyo, ndikwesa tiyezga so Yesu. Kumbi tingamuyezga mu nthowa wuli?
13. Mwakukoliyana ndi Yohane 5:19, 30, kumbi tisambiranji kwaku Yesu?
13 Chinanga kuti Yesu wenga Mwana waku Chiuta kweniso munthu wakufikapu, wathembanga Yehova. (Ŵerengani Yohane 5:19, 30.) Iyu wanguphangapu cha udindu wa Awisi. Lemba la Afilipi 2:6 likamba kuti, “wanguŵanaŵanapu cha kuphanga udindu wakuti waje wakuyanana ndi Chiuta.” Yesu waziŵanga kuti wangachita cha vinthu vinyaki ndipu watumbikanga mazaza nga Awisi.
Yesu waziŵanga kuti pe vinthu vinyaki vo wangachita cha (Wonani ndimi 14)
14. Kumbi Yesu wanguchita wuli wati wapempheka kuti wapereki chinthu cho wenga udindu waki cha kuchipereka?
14 Ŵanaŵaniyani vo Yesu wanguchita pa nyengu yo Yakobe, Yohane kweniso anyinawu angupempha Yesu kuti waŵapaski chinthu chinyaki, cho wenga udindu waki cha kuti wachipereki. Nyengu yeniyo, Yesu wanguŵamuka kuti Awisi pe ndiwu ŵe ndi udindu wakusankha yo wangachija kujanja lamaryi laku Yesu ndipuso lamazge. (Mate. 20:20-23) Yesu waziŵanga kuti mazaza ngaki nge ndi mphaka. Wenga wakujiyuyuwa. Wachitanga cha chinthu chechosi cho Yehova wanguleka kumukambiya. (Yoha. 12:49) Kumbi tingaja wuli akujiyuyuwa nge Yesu?
Kumbi tingaja wuli akujiyuyuwa nge Yesu? (Wonani ndimi 15-16) *
15-16. Kumbi tingagwiriskiya wuli ntchitu ulongozgi wa pa 1 Akorinto 4:6?
15 Tiyezga Yesu asani tigwiriskiya ntchitu ulongozgi wa pa 1 Akorinto 4:6. Lemba ili likamba kuti: “Mungachitanga vinthu mwakujumpha vo vikulembeka cha.” Mwaviyo, asani ŵanthu atitifumba ulongozgi tikhumbika cha kukamba maŵanaŵanu ngidu pamwenga kukamba ŵaka chechosi cho chaza mu mutu. Mumalu mwaki, titenere kukamba fundu zo zisanirika mu Bayibolu kweniso mu mabuku ngidu. Asani tichita viyo, tilongo kuti tiziŵa vosi cha. Kujiyuyuwa kutitiwovya kuziŵa kuti ‘marangu ngaurunji’ ngaku Chiuta Wanthazizosi ndingu ngamampha kuphara ngidu.—Chivu. 15:3, 4.
16 Kupatuwaku kupaska ulemu Yehova, pe so vifukwa vinyaki vo titenere kujaliya akujiyuyuwa. Sonu tiwonengi mo kujiyuyuwa kungatiwovye kuti tikondwengi kweniso kuti tikoliyanengi ndi anyidu.
NTCHIFUKWA WULI TITENERE KUJA AKUJIYUYUWA?
17. Ntchifukwa wuli ŵanthu akujiyuyuwa akondwa?
17 Asani te akujiyuyuwa tikondwa ukongwa. Chifukwa wuli? Chifukwa asani tiziŵa kuti pe vinthu vinyaki vo tingachita cha, tiwongengi chovyu chosi cho anyidu angatipaska. Mwakuyeruzgiyapu, ŵanaŵaniyani vo vinguchitika Yesu wati wachizga ŵanthu 10 wo ŵenga ndi makhati. Munthu yumoza pe ndiyu wanguza kwaku Yesu kuti waziwongi chifukwa wanguziŵa kuti watingi wajichizgengi cha yija. Ndipu munthu uyu wangukankhuska Chiuta chifukwa chakuti wanguchira.—Luka 17:11-19.
18. Kumbi kujiyuyuwa kutovya wuli? (Aroma 12:10)
18 Ŵanthu akujiyuyuwa akoliyana ndi anyawu ndipu asuzgika cha kusaniya mabwezi. Chifukwa wuli? Aziŵa kuti anyawu ŵe ndi mijalidu yamampha ndipu atiŵagomezga ukongwa. Ŵanthu akujiyuyuwa akondwa asani anyawu achita umampha pa uteŵeti unyaki wo apaskika ndipu atiŵawonga kweniso kuŵapaska ulemu.—Ŵerengani Aroma 12:10.
19. Ntchifukwa wuli tikhumbika cha kujikuzga?
19 Kweni ŵanthu akujikuzga awonga cha anyawu ndipu awona kuti yiwu ndiwu atenere kulumbika. Kanandi atijiyeruzgiya ndi anyawu ndipu achita vinthu mwamaphara. Yiwu asambiza cha anyawu kweniso kuŵapaska vakuchita. Ndipu aŵanaŵana kuti vinthu vingayenda umampha cha asani aleka kuchita ŵeneku. Kanandi munthu wakujikuzga wakhumba kuti wawonekengi kuti iyu ndiyu ngwakuzirwa kuphara anyaki kweniso wachita sanji asani anyaki achita umampha vinthu kuphara iyu. (Aga. 5:26) Ŵanthu aviyo aŵavi mabwezi. Asani tiwona kuti te akujikuzga, titenere kupempha Yehova ndi mtima wosi kuti watiwovyi ‘kusintha maŵanaŵanu ngidu,’ kuti jalidu liheni lenili lileki kume misisi mwaku isi.—Aro. 12:2.
20. Ntchifukwa wuli tikhumbika kujiyuyuwa?
20 Tiwonga ukongwa kuti Yehova ngwakujiyuyuwa. Yehova walongo kuti ngwakujiyuyuwa asani tiwona mo wachitiya vinthu ndi ateŵeti ŵaki, ndipu nasi tikhumba kumuyezga. Kweniso tikhumba kuyezga ŵanthu wo akulembeka mu Bayibolu wo angwenda ndi Chiuta mwakujiyuyuwa. Nyengu zosi tiperekengi ulemu ndi unkhankhu kwaku Yehova. (Chivu. 4:11) Asani tichitengi vosi ivi, tijengi mabwezi ngaku Yehova kwamuyaya chifukwa iyu watanja ŵanthu akujiyuyuwa.
SUMU 123 Mujithereskengi ku Ndondomeku Yaku Chiuta
^ ndimi 5 Munthu wakujiyuyuwa wachitiya lisungu anyaki. Mwaviyo, mphakuvwika kukamba kuti Yehova ngwakujiyuyuwa. Mu nkhani iyi tisambirengi mo tingajaliya akujiyuyuwa kutuliya kwaku Yehova. Kweniso tiwonengi vo tingasambira kwaku Sauli, mchimi Danyele kweniso Yesu pa nkhani ya kujiyuyuwa.
^ ndimi 58 VITHUZI: Mura wasambiza mubali mo wangachitiya ntchitu yakugaŵa vigaŵa vakupharazgaku va mpingu. Pavuli paki, mura yo, watimukayikiya cha mubali yo ndipu watimuleka kuti wagwirengi yija ntchitu yaki.
^ ndimi 62 VITHUZI: Mzichi wafumba mura asani pangaŵa pakwenere kuluta ku zowara zo zamuchitikiya mu tchalitchi. Mura wakamba va mu mutu mwaki cha kweni watimukambiya fundu za mu Bayibolu.
