NKHANI YAKUSAMBIRA YA NAMBALA 34
Namwi Mwe ndi Chigaŵa mu Mpingu!
“Nge mo liŵavu limoza liliri ndi viŵalu vinandi ndipu viŵalu vosi vipanga liŵavu limoza, chinanga kuti viŵalu venivi vilipu vinandi kweni ndi liŵavu limoza, ndimu so Khristu nayu waliri.”—1 AKORI. 12:12.
SUMU 101 Titeŵetiyengi Yehova Mwakukoliyana
VO TISAMBIRENGI MU NKHANI IYI *
1. Kumbi ndi vinthu wuli vo tikondwa navu?
VAKUKONDWESA ukongwa kuja mu mpingu! Tija mwachimangu kweniso tikondwa kuteŵete Yehova limoza ndi abali kweniso azichi. Kumbi yimwi muchita uteŵeti wuli mu mpingu?
2. Kumbi wakutumika Paulo wangugwiriskiya ntchitu chakuyeruzgiyapu wuli mumakalata ngaki?
2 Tingasambira vinandi pa nkhani iyi kutuliya mumakalata ngo wakutumika Paulo wangulemba. Mumakalata ngosi, Paulo wanguyeruzgiya mpingu ndi liŵavu la munthu. Wanguyeruzgiya so munthu weyosi mu mpingu ndi viŵalu va liŵavu.—Aro. 12:4-8; 1 Akori. 12:12-27; Aefe. 4:16.
3. Kumbi mu nkhani iyi tikambiskanengenji?
3 Mu nkhani iyi, tiwonengi vinthu vitatu vo tisambira mu chakuyeruzgiyapu cho Paulo wangukamba. Chakwamba, tiwonengi kuti weyosi we ndi chigaŵa * mu mpingu. Chachiŵi, tikambiskanengi vo tingachita asani titijiwona kuti te ambula kukhumbika mu mpingu. Chachitatu, tikambiskanengi chifukwa cho titenere kuŵikiyapu mtima kugwira ntchitu yo Yehova watipaska.
WEYOSI NGWAKUKHUMBIKA MU MPINGU
4. Kumbi lemba la Aroma 12:4, 5, lititisambizanji?
4 Chinthu chakwamba cho tisambira mu chakuyeruzgiyapu chaku Paulo ntchakuti weyosi ngwakukhumbika ukongwa mu banja laku Yehova. Paulo watamba chakuyeruzgiyapu chaki ndi mazu ngakuti: “Nge mo viliri kuti te ndi viŵalu vinandi muliŵavu limoza, kweni viŵalu vo vigwira ntchitu mwakuyanana cha, nasi chinanga kuti te anandi, te liŵavu limoza mwaku Khristu, kweni munthu weyosi pakuyija ntchiŵalu chakubatikika kuchinyaki.” (Aro. 12:4, 5) Kumbi Paulo wang’anamuwanganji? Chinanga kuti tosi tiyanana cha pakuteŵete Yehova, kweni tosi te akukhumbika.
Te ndi mphasu zakupambanapambana mu mpingu kweni weyosi ngwakukhumbika (Wonani ndimi 5-12) *
5. Kumbi Yehova wakupereka “mphasu” wuli ku mpingu?
5 Tosi te ndi chigaŵa mu mpingu. Kweni chakwamba tiyeni tikambiskana za abali wo alongozga. (1 Ate. 5:12; Ahe. 13:17) Kuziya mwaku Khristu Yehova wakupereka “anthulumi kuja nge mphasu” mu mpingu. (Aefe. 4:8) “Mphasu” zenizi, zisazgapu abali a mu Wupu Wakulongozga, abali wo atovya Wupu Wakulongozga, abali a mu Komiti ya Nthambi, akuwonere madera, abali wo asambiza mu masukulu nganyaki nga gulu laku Yehova, ŵara mu mpingu kweniso ateŵeti akovya. Abali wosi ŵenaŵa akusankhika ndi mzimu wakupaturika kuti aphweriyengi mskambu waku Yehova kweniso kuchiska mpingu.—1 Petu. 5:2, 3.
6. Mwakukoliyana ndi 1 Atesalonika 2:6-8, kumbi abali wo akusankhika ndi mzimu wakupaturika atesesa kuchitanji?
6 Abali asankhika ndi mzimu wakupaturika kuti achitengi mauteŵeti ngakupambanapambana. Viŵalu nge manja ndi malundi vigwiriya ntchitu limoza kuti viwovyi liŵavu losi. Abali wo akusankhika ndi mzimu wakupaturika nawu, afwiyapu kugwira ntchitu kuti mpingu wosi uyanduwi. Yiwu achita vinthu kuti ŵanthu aŵalumbengi cha. Mumalu mwaki, atesesa kuchiska abali ndi azichi. (Ŵerengani 1 Atesalonika 2:6-8.) Titimuwonga ukongwa Yehova chifukwa chakutipaska abali wo atesesa kutiteŵete.
7. Kumbi abali kweniso azichi wo achita uteŵeti wa nyengu zosi atumbikika wuli?
7 Abali kweniso azichi anyaki mu mpingu ateŵete nge amishonale, apayiniya apade pamwenga apayiniya a nyengu zosi. Ndipu abali kweniso azichi anandi pacharu chosi chapasi atijipereka kupharazga kweniso kusambiza ŵanthu Bayibolu. Venivi vawovya ŵanthu anandi kuja akusambira aku Yesu. Chinanga kuti wo achita uteŵeti wa nyengu zosi alivi vinthu vinandi vakuliŵavu, kweni Yehova watiŵapaska vinthu vinandi vamampha. (Mariko 10:29, 30) Titiŵayanja ukongwa abali ndi azichi ŵenaŵa ndipu tikondwa ukongwa chifukwa chakuti titeŵete nawu limoza mu mpingu!
8. Ntchifukwa wuli mupharazgi weyosi wa uthenga wamampha ngwakuzirwa kwaku Yehova?
8 Kumbi abali wo ŵe ndi maudindu mu mpingu kweniso wo achita uteŵeti wa nyengu zosi ndiwu pe akuzirwa mu mpingu? Awa! Mupharazgi weyosi ngwakuzirwa kwaku Chiuta kweniso mu mpingu. (Aro. 10:15; 1 Akori. 3:6-9) Ve viyo chifukwa chakuti chilatu chidu chikulu ukongwa mu mpingu nkhuwovya ŵanthu kuti aje akusambira Ambuyafwi Yesu Khristu. (Mate. 28:19, 20; 1 Timo. 2:4) Apharazgi wosi, kwali mbakubatizika pamwenga ambula kubatizika, awona kuti ntchitu yakupharazga njakukhumbika ukongwa pa umoyu wawu.—Mate. 24:14.
9. Ntchifukwa wuli tiwona kuti anthukazi Achikhristu mbakuzirwa?
9 Yehova watiŵatumbika azichi ndipu watiŵapaska ntchitu yakukhumbika ukongwa mu mpingu. Iyu wawona kuti anyinafwi, vyoko kweniso azichi ambula kuyirwa wo atimuteŵete mwakugomezgeka mbakuzirwa. Malemba ngazumbuwa anthukazi anandi wo angukondwesa Chiuta. Yiwu ntchakuwoniyapu chamampha pa nkhani ya zeru, chivwanu, phamphu, chiganga, kupaska ndipuso ntchitu zamampha. (Luka 8:2, 3; Machi. 16:14, 15; Aro. 16:3, 6; Afi. 4:3; Ahe. 11:11, 31, 35) Titimuwonga ukongwa Yehova chifukwa cha anthukazi Achikhristu wo te nawu mu mpingu ndipu nawu ŵe ndi mijalidu nge yeniyi.
10. Ntchifukwa wuli tiwona kuti Akhristu akukota mbakukhumbika?
10 Akhristu akukota nawu mbakukhumbika ukongwa mu mpingu. Mu mipingu yinyaki mwe Akhristu akukota wo ateŵete Yehova mwakugomezgeka kwa vyaka vinandi. Akhristu anyaki akukota angaŵa kuti asambira uneneska pambula kuswera. Anandi mwa Akhristu ŵenaŵa atamatama chifukwa cha kukota. Venivi vichitiska kuti aleki kuchita vinandi mu mpingu kweniso pa ntchitu yakupharazga. Kweni yiwu ayesesa kuchita vo angafiska mu uteŵeti, ndipu agwiriskiya ntchitu nthazi zawu kuti achiski kweniso kusambiza anyawu mu mpingu. Ndipu tiyanduwa ukongwa ndi vo asambira mu gulu laku Yehova kweniso vo vaŵachitikiya pa umoyu. Yiwu mbakuzirwa ukongwa kwaku Yehova kweniso kwaku isi.—Nthanthi 16:31.
11-12. Kumbi achinyamata atikuchiskani wuli mu mpingu winu?
11 Achinyamata nawu mbakukhumbika ukongwa mu mpingu. Kweni asani akuwa yiwu akumana ndi masuzgu mucharu cho chilamulika ndi Satana Dyaboli kweniso cho chitende maŵanaŵanu ngaki. (1 Yoha. 5:19) Tichiskika ukongwa asani achinyamata amuka pa maunganu, apharazga ndipuso asani achita chiganga kuvikiliya vo agomezga. Achinyamata agwira ntchitu yakukhumbika ukongwa mu mpingu!—Sumu 8:2.
12 Kweni abali ndi azichi anyaki atijiwona kuti mbambula kukhumbika mu mpingu. Kumbi ntchinthu wuli cho chingatiwovya kuti tijiwonengi kuti vo tichita mu mpingu vakukhumbika? Tiyeni tiwoni.
MUJIWONENGI KUTI MWE AKUZIRWA MU MPINGU
13-14. Ntchifukwa wuli anyaki angawona kuti mbakukhumbika cha mu mpingu?
13 Tiyeni tikambiskani chinthu chachiŵi cho tisambira mu chakuyeruzgiyapu chaku Paulo. Iyu wangukamba suzgu yo ŵanthu anandi ŵe nayu mazuŵa nganu. Ndipu suzgu yaki njakuti ŵanthu anandi atijiwona kuti mbambula kukhumbika mu mpingu. Paulo wangulemba kuti: “Asani phazi lingakamba kuti, ‘Chifukwa chakuti nde janja cha, ndikuti nde chiŵalu cha liŵavu cha,’ venivi vitilichitiska kuti lileki kuja chiŵalu chaliŵavu cha. Ndipu asani gutu lingakamba kuti, ‘Chifukwa chakuti nde jisu cha, ndikuti nde chiŵalu cha liŵavu cha,’ venivi vitilichitiska kuti lileki kuja chiŵalu cha liŵavu cha.” (1 Akori. 12:15, 16) Kumbi Paulo wang’anamuwanganji?
14 Asani mutijiyeruzgiya ndi anyinu mu mpingu mungawona cha kuti mwe akuzirwa. Anyaki angaŵa asambizi alusu, akuchita vinthu mwandondomeku pamwenga akuziŵa kuchita maulendu nga uliska. Panyaki muwona kuti mungakwanisa cha kuchita nge mo anyinu achitiya. Venivi vilongo kuti mwe akujiyuyuwa. (Afi. 2:3) Kweni mukhumbika kuphwere. Asani mulutirizga kujiyeruzgiya ndi anyinu wo ŵe ndi lusu, muwonengi nge kuti palivi cho muchita. Nge mo Paulo wangukambiya mungaŵanaŵana kuti palivi cho muchita mu mpingu. Kumbi ntchinthu wuli cho chingakuwovyani kuti mumalani ndi maŵanaŵanu ngenanga?
15. Mwakukoliyana ndi 1 Akorinto 12:4-11, kumbi titenere kukumbuka fundu niyi chifukwa cha mphasu yeyosi yo tenayu?
15 Ŵanaŵaniyani fundu iyi: Mu nyengu ya akutumika Yehova wangupereka mphasu yakuchita vakuziziswa kwa Akhristu kweni Mbakhristu wosi cha wo angupaskika mphasu iyi. (Ŵerengani 1 Akorinto 12:4-11.) Chinanga kuti Yehova wanguŵapaska mphasu zakupambanapambana kweni Mkhristu weyosi wenga wakuzirwa. Mazuŵa nganu tilivi mphasu yakuchita vakuziziswa. Kweni fundu yo yingatiwovya njakuti: Tingayanana cha lusu kweni tosi te akuzirwa kwaku Yehova.
16. Kumbi Paulo wangukamba ulongozgi nuwu wo titenere kugwiriskiya ntchitu?
16 Mumalu mwakujiyeruzgiya ndi Akhristu anyidu, tikhumbika kugwiriskiya ntchitu fundu yo Paulo wangukamba. Iyu wanguti: “Weyosi wasandi vakuchita vaki, ndipu pavuli paki waŵengi ndi chifukwa chakukondwe pa vo iyu mweneku wachita, kweni mwakujiyeruzgiya ndi munthu munyaki cha.”—Aga. 6:4.
17. Kumbi tingayanduwa wuli asani tingagwiriskiya ntchitu ulongozgi wo Paulo wangukamba?
17 Asani tingagwiriskiya ntchitu ulongozgi wo Paulo wangukamba ndi kusanda vo tichita, tingayamba kuwona kuti nasi te ndi lusu lo anyidu alivi. Mwakuyeruzgiyapu, mura wangaŵa kuti walivi lusu lakukamba nkhani kweni wakuziŵa kuwovya ŵanthu kuti aje akusambira aku Yesu. Pamwenga wangaŵa kuti wachita vinthu mwandondomeku cha nge ŵara anyaki mu mpingu, kweni waziŵika kuti wachita umampha maulendu nga uliska ndipu apharazgi afwatuka kumufumba ulongozgi wa mu Malemba. Pamwenga wangaŵa ndi mbiri yamampha yakulonde alendu. (Ahe. 13:2, 16) Asani tiwonengi mwakwenere mphasu zo te nazu, tiwonengi kuti vo tichita mu mpingu vakukhumbika ukongwa. Venivi vitiwovyengi kuti tileki kuchitiya sanji abali ŵidu wo ŵe ndi lusu lakupambana ndi lidu.
18. Kumbi tingaja wuli asambizi alusu?
18 Kwali tichita uteŵeti wuli mu mpingu, tosi tikhumbika kuyesesa kuti tisazgiyeku lusu pakusambiza ŵanthu mu uteŵeti. Yehova watitisambiza kuziya mu gulu laki kuti tije ndi lusu. Mwakuyeruzgiyapu, pa unganu wa Umoyu Widu Wachikhristu, tisambira mo tingasambiziya ŵanthu mwalusu mu uteŵeti. Kumbi yimwi mugwiriskiya ntchitu vo musambira pa unganu wenuwu?
19. Kumbi mungachita wuli kuti mukasere Sukulu ya Apharazgi a Ufumu?
19 Yehova wagwiriskiya so ntchitu Sukulu ya Apharazgi a Ufumu kuti watisambizi. Abali ndi azichi wo achita uteŵeti wa nyengu zosi kweniso wo ŵe ndi vyaka va pakati pa 23 ndi 65 ndiwu asere sukulu iyi. Panyaki mutijikayikiya kuti mungachisere cha sukulu iyi. Mumalu mwakuŵanaŵaniya vifukwa vo vingakutondekesani kusere sukulu yeniyi, muŵanaŵaniyengi vifukwa vo mukhumbiya kuchisere sukulu iyi. Pavuli paki, nozgani kuti mukasere. Yehova wakuwovyeningi kumalana ndi vo vingakutondekesani asani namwi muyesesengi kuŵikapu mtima.
MUCHISKENGI MPINGU NDI MPHASU ZO MWE NAZU
20. Kumbi tingasambiranji pa Aroma 12:6-8?
20 Chinthu chachitatu cho tisambira mu chakuyeruzgiyapu chaku Paulo chisanirika pa Aroma 12:6-8. (Ŵerengani.) Pa lemba ili, Paulo wangukamba so kuti munthu weyosi mu mpingu we ndi mphasu yakupambana ndi munyaki. Kweni wangusazgiyapu kuti tigwiriskiyengi ntchitu mphasu zo te nazu kuti tichiski mpingu.
21-22. Kumbi tingasambiranji kwaku Robert ndi Felice?
21 Tiyeni tikambiskani vo vinguchitikiya mubali yo tamudana kuti Robert. Wati wateŵete kucharu chinyaki, angumukambiya kuti wakateŵetiyengi ku Beteli ya mucharu chaki. Chinanga kuti angumusimikiziya kuti palivi cho wananga kuti uteŵeti usinthi, iyu wangukamba kuti: “Kwa myezi yinandi ndakondwanga cha chifukwa ndaŵanaŵananga kuti ndatondeka kuchita uteŵeti wangu. Nyengu zinyaki ndaŵanaŵananga kuti ndileki ŵaka uteŵeti wa pa Beteli.” Kumbi wanguchita wuli kuti wayambi so kukondwa? Mura munyaki wangumukumbusa kuti Yehova watitisambiza pa uteŵeti wewosi wo tinguchitapu kuvuli, kuti tije akwenere kuchita uteŵeti wasonu wo tingapaskika. Robert wanguwona kuti wakhumbika kuleka kuŵanaŵaniya vakuvuli ndi kwamba kuŵanaŵaniya vo wangachita sonu.
22 Mubali Felice Episcopo nayu wangukumana ndi suzgu. Iyu ndi muwolu waki angumaliza masambiru nga Sukulu ya Giliyadi mu 1956, ndipu anguluta ku Bolivia ko achitanga uteŵeti wakuwonere dera. Mu 1964 angubala mwana. Felice wangukamba kuti: “Venga vakusuzga ukongwa kuleka uteŵeti wo tawuyanjanga. Mwakuti kwa chaka champhumphu ndingujaliya ŵaka kudandawula. Kweni Yehova wangundiwovya ndipu ndingusintha maŵanaŵanu ngangu ndi kwamba kuŵanaŵaniya kuti ndiphwere mwana.” Kumbi mukumana ndi masuzgu nge ngaku Robert pamwenga Felice? Kumbi mudandawula kuti uteŵeti wo mwachitanga kali mukuleka? Asani ndimu viliri, mungayamba kukondwa asani mungasintha maŵanaŵanu nginu ndi kuŵika mtima pa vo mungachita sonu kuti muteŵete Yehova kweniso abali ndi azichi. Mutangwanikengi ndi kuteŵete Yehova, mugwiriskiyengi ntchitu lusu lo mwe nalu pakuteŵete abali ndipu mukondwengi po muchiska mpingu.
23. Kumbi tikhumbika kusaniya nyengu yakuchitanji, ndipu tazamukambiskananji mu nkhani ya sabata ya mawa?
23 Weyosi ngwakuzirwa kwaku Yehova. Iyu wakhumba kuti tijiwonengi kuti te mubanja laki. Asani tisaniya nyengu yakuŵanaŵaniya vo tingachita kuti tichiski abali kweniso azichi ndi kuyesesa kuchita venivo, tilekengi kuŵanaŵana kuti te ambula kukhumbika mu mpingu. Kweni kumbi abali ndi azichi titiŵawona wuli mu mpingu? Kumbi tingalongo wuli kuti titiŵayanja kweniso kuŵapaska ulemu? Mu nkhani ya sabata ya mawa, tazamumuka mafumbu ngenanga.
SUMU 24 Zani ku Phiri Laku Yehova
^ ndimi 5 Tosi tikhumba kuti Yehova watiwonengi kuti te akuzirwa. Kweni nyengu zinyaki tingajiwona kuti te akukhumbika cha. Nkhani iyi yitiwovyengi kuziŵa kuti weyosi ngwakukhumbika ukongwa mu mpingu.
^ ndimi 3 VO MAZU NGANYAKI NGANG’ANAMUWA: Chigaŵa cho tenachu mumpingu chimiya vo tichita pakuchiska abali ndi azichi. Tichiska abali ndi azichi mwambula kutole kanthu va mtundu wawu, mudawuku wawu, mbakavu pamwenga mbakukhupuka, mbakusambira pamwenga cha.
^ ndimi 62 VITHUZI: Vithuzi vosi vitatu vilongo vo vichitika asani maunganu ngechendayambi, ngayamba ndipuso asani ngamala. Chithuzi 1: Mura mu mpingu watawuzga mulendu yo waza ku Nyumba ya Ufumu, mubali wachinyamata wanozga vipangizu vakukweze mazu ndipu mzichi walongoro ndi mzichi wakukota. Chithuzi 2: Ŵana kweniso ara asoska manja kuti amuki pa sambiru la Chigongwi cha Alinda. Chithuzi 3: Mubali ndi muwolu waki atowesa Nyumba ya Ufumu. Mzichi watovya mwana waki kuti waŵiki ndalama mu bokosi. Mubali wachinyamata wayanisa mabuku ndipu mubali munyaki wachiska mzichi wakukota.
