Vo Akuŵerenga Afumba
Kumbi nkhani ya mu Chigongwi cha Mlinda cha June 2020 yakuti “Zina Linu Litoweseki” yikonkhoska wuli mwakuvwika umampha vakukwaskana ndi zina laku Yehova kweniso kuti iyu ngwakwenere kulamuliya?
Mu nkhani yeniyi tingusambira kuti pe nkhani yimoza yakukhumbika ukongwa yo yikwaska angelu kweniso ŵanthu. Nkhani yaki njakukwaskana ndi kutoweseka kwa zina likulu laku Yehova. Nkhani yakuti Yehova ndiyu ngwakwenere kulamuliya ntchigaŵa cha nkhani yakukhumbika ukongwa ya kutoweseka kwa zina laku Yehova. Mwakuyana ŵaka, nkhani yakuti munthu wakhumbika kuja wakugomezgeka kwaku Chiuta, nayu ntchigaŵa chinyaki cha nkhani yakukhumbika ukongwa yeniyi.
Ntchifukwa wuli sonu tididimizga kuti nkhani yakukhumbika ukongwa njakukwaskana ndi zina laku Yehova kweniso kulitowesa? Tiyeni tikambiskani vifukwa vitatu.
Kwambiya pa nyengu yo Adamu ndi Heva angugarukiya mumunda wa Edeni Satana wafipiska zina laku Chiuta
Chifukwa chakwamba ntchakuti, Satana wangunyoza zina laku Yehova pamwenga wangunanga mbiri Yaki mumunda wa Edeni. Fumbu lauryarya lo Satana wangufumba Heva lingulongo nge kuti Yehova ngwakupaska cha kweniso ulongozgi wo Yehova wangupaska Adamu ndi Heva wenga wamampha cha. Pavuli paki, Satana wangususka vo Yehova wangukamba. Yapa Satana wang’anamuwanga kuti Chiuta ngwaboza. Mwaviyo, wangufipiska zina laku Yehova. Iyu wanguja “Dyaboli,” kung’anamuwa “waboza.” (Yoha. 8:44) Chifukwa chakuti Heva wangugomezga boza laku Satana, wanguleka kuvwiya Chiuta ndipu wangukana kuti Yehova ngwakwenere kulamuliya. (Gene. 3:1-6) Mpaka sonu, Satana wafipiska zina laku Chiuta ndipu walutirizga kuwandisa maboza ngakukwaskana ndi Yehova. Ŵanthu wo agomezga maboza ngenanga angamuvwiya cha Yehova. Mwaviyo, ŵanthu aku Chiuta awona kuti kufipiska zina lakupaturika laku Yehova ntchinthu chiheni ukongwa. Venivi ndivu vichitiska kuti ŵanthu asuzgikengi kweniso kuti pacharu pachitikengi vinthu viheni ukongwa.
Chifukwa chachiŵi ntchakuti, kuti vinthu vosi vo Chiuta wakulenga viyanduwi, kung’anamuwa ŵanthu ndi angelu, Yehova wazamutowesa zina laki kuti lileke limu kunyozeka. Chenichi ntchinthu chakukhumbika ukongwa kwaku Yehova. Ndichu chifukwa chaki wakamba kuti: “Kwambula kutondeka, ndazamutowesa zina langu likulu.” (Ezeki. 36:23) Yesu wangukamba mwakuvwika umampha chinthu cho chitenere kuja chakwamba mu mapempheru nga ateŵeti wosi akugomezgeka aku Yehova. Iyu wanguti: “Zina linu litoweseki.” (Mate. 6:9) Mwakuwerezawereza Bayibolu lididimizga kukhumbika kwa kukankhuska zina laku Yehova. Mwakuyeruzgiyapu, likamba kuti: “Perekani kwaku Yehova unkhankhu wakwenere zina laki.” (1 Mbiri 16:29; Salimo 96:8) “Mbani sumu zakuthamika zina laki launkhankhu.” (Salimo 66:2) “Ndikankhuskengi zina linu mpaka muyaya.” (Salimo 86:12) Nyengu yinyaki Yehova wangulongoro yija kutuliya kuchanya pa nyumba yakusopiyamu ku Yerusalemu, Yesu wati wakamba kuti: “Ada, kankhuskani zina linu.” Ndipu Yehova wangumuka kuti: “Ndalikankhuska ndipu ndilikankhuskengi so.”—Yoha. 12:28. a
Chifukwa chachitatu ntchakuti, nyengu zosi khumbu laku Yehova likoliyana ndi zina laki pamwenga mbiri yaki. Ŵanaŵaniyani ivi: Kumbi ntchinthu wuli cho chazamuchitika pavuli pa kuyeseka kakumaliya asani Ulamuliru wa Vyaka 1000 waku Khristu wamala? Kumbi angelu wosi kweniso ŵanthu azakuliwona wuli zina laku Yehova pa nyengu yo? Kuti timuki fumbu lenili, tiyeni tikumbuki vigaŵa viŵi vakukhumbika pa nkhani iyi, kugomezgeka kwa ŵanthu kweniso kuti Yehova ndiyu ngwakwenere kulamuliya. Kumbi ŵanthu wo alongo kuti mbakugomezgeka azamukhumbika kulutirizga kuchita vinthu vakulongo kuti mbakugomezgeka? Awa. Yiwu azamuja akufikapu ndipuso azamuja kuti ayeseka mwakukwana. Yiwu azamuja kuti alonde umoyu wamuyaya. Kumbi ŵanthu kweniso angelu azamulutirizga kukambiskana pamwenga kugaŵikana pa nkhani yakuti ndiyani wakwenere kulamuliya chilengedu chosi? Awa. Pa nyengu yeniyi, wosi kuchanya kweniso pacharu chapasi azamukoliyana ndipu azamuzomera ulamuliru waku Yehova. Kweni ntchinthu wuli cho chazamuchitikiya zina laku Yehova?
Pa nyengu yo, weyosi wazamuziŵa uneneska wakukwaskana ndi Yehova ndipu zina laki lazamutoweseke limu. Kweni zina laku Chiuta lazamulutirizga kuja chinthu chakukhumbika ukongwa kwa ateŵeti ŵaki wosi, kuchanya ndi pacharu chapasi. Ntchifukwa wuli tikamba viyo? Chifukwa azamuwona Yehova wachilutirizga kuchita vinthu vakukondwesa. Ŵanaŵaniyani ivi: Chifukwa chakuti mwakujiyuyuwa Yesu wazamuweze ufumu kwaku Yehova, Chiuta ‘wazamuja vinthu vosi kwaku weyosi.’ (1 Akori. 15:28) Pavuli paki, ŵanthu pacharu chapasi azamukondwa ndi “wanangwa waunkhankhu wa ŵana aku Chiuta.” (Aro. 8:21) Ndipu Yehova wazamufiska khumbu laki kuti ŵana ŵaki a kuchanya ndi a pacharu chapasi aje banja limoza lakukoliyana.—Aefe. 1:10.
Kumbi venivi vazamukwaska wuli banja laku Yehova, kuchanya ndi charu chapasi? Kukamba uneneska, tazamulutirizga kukhumbisiska kuthamika zina lamampha laku Yehova. Wamasalimo Davidi wangukambirika kulemba kuti: “Yehova Chiuta wathamikiki . . . Zina laki launkhankhu lithamikiki kwamuyaya.” (Salimo 72:18, 19) Tazamulutirizga kusaniya vifukwa vasonu kweniso vakukondwesa vakulutirizgiya kuchita venivi mpaka muyaya.
Kukamba uneneska, zina laku Yehova limiya chechosi chakukwaskana ndi iyu. Asani tiŵanaŵaniya vakukwaskana ndi zina laku Yehova, tikumbuka kuti iyu watitiyanja. (1 Yoha. 4:8) Nyengu zosi tazamukumbukanga kuti Yehova wakutilenga kweniso wakupereka sembi yaku Yesu chifukwa chakuti watitiyanja. Kusazgapu yapa, tazamukumbukanga so kuti iyu walamuliya mwaurunji kweniso mwachanju. Ndipuso tazamulutirizga kuwona mo Yehova watitiyanjiya. Tazamulutirizga kuja pa ubwezi wakukho ndi iyu nge Awusefwi ndipuso tazamukumba sumu zakuthamika zina laki launkhankhu kwamuyaya.—Salimo 73:28.
