Vo Akuŵerenga Afumba
Kumbi “munthukazi” yo wazumbulika pa Yesaya 60:1 ndiyani, nanga ‘wayuka’ kweniso ‘kuŵala’ mu nthowa wuli?
Lemba la Yesaya 60:1 likamba kuti: “Yuka, yiwi munthukazi, ŵala, pakuti ukweru waku waza. Unkhankhu waku Yehova utikuŵaliya.” Nkhani yosi yilongo kuti “munthukazi” wenga Ziyoni pamwenga kuti Yerusalemu yo kali yenga tawuni yikulu ya ku Yuda. a (Yesa. 60:14; 62:1, 2) Tawuni yeniyi yimiya mtundu wosi wa Isirayeli. Mu nkhani iyi tikambiskanengi mafumbu ngaŵi yanga: Lakwamba ndakuti, kumbi Yerusalemu ‘wanguyuka’ kweniso ‘kuŵala’ zuŵanji, nanga mu nthowa wuli? Lachiŵi, kumbi uchimi waku Yesaya ufiskika ukongwa mu nyengu yidu yinu?
Kumbi Yerusalemu ‘wanguyuka’ kweniso ‘kuŵala’ zuŵanji, nanga mu nthowa wuli? Pa nyengu yo Ayuda ŵenga ku ukapolu ku Babiloni kwa vyaka 70, Yerusalemu kweniso nyumba yakusopiyamu venga mahami. Kweni charu cha Babiloni chati chathereskeka ndi ufumu wa Amedi ndi Aperisiya, Ayisirayeli wo ŵenga ku Babiloni anguzomerezeka kuti awere kwawu kuti akaweziyepu kusopa kwauneneska. (Ezara 1:1-4) Kwambiya mu 537 B.C.E., Ayuda akugomezgeka akutuwa mu mafuku ngosi 12 anguwere ku Yerusalemu. (Yesa. 60:4) Yiwu angwamba kupereka sembi kwaku Yehova, kuchita so maphwandu ndi kuzenga so nyumba yakusopiyamu. (Ezara 3:1-4, 7-11; 6:16-22) Yapa, ukweru waku Yehova ungwamba so kuŵaliya Yerusalemu kung’anamuwa kuŵaliya pa ŵanthu ŵaki. Yiwu anguja nge ukweru wakuyeruzgiya ku ŵanthu amitundu yinyaki wo ŵenga mu mdima wauzimu.
Kweni mauchimi ngakukwaskana ndi kuweziyapu vinthu ngo Yesaya wangukamba ngangufiskika kamanavi ŵaka pa Yerusalemu wa mu nyengu yakali. Ayisirayeli angulutirizga viŵi cha kuvwiya Chiuta. (Nehe. 13:27; Mala. 1:6-8; 2:13, 14; Mate. 15:7-9) Ndipu pati pajumpha angukana Yesu Khristu yo wenga Mesiya. (Mate. 27:1, 2) Yerusalemu kweniso nyumba yakusopiyamu vingubwangandulika kachiŵi mu chaka cha 70 C.E.
Yehova wangukambiya limu kuti venivi vazamuchitika. (Dani. 9:24-27) Kukamba uneneska, chenga chilatu chaku Yehova cha kuti Yerusalemu wapacharu chapasi wafiski vigaŵa vosi va mauchimi ngakukwaskana ndi kuweziyapu vinthu, ngo ngakulembeka mu Yesaya chaputala 60.
Kumbi uchimi waku Yesaya ufiskika ukongwa mu nyengu yidu yinu? Hinya. Kweni ufiskika pa munthukazi munyaki wakuyeruzgiya yo ndi “Yerusalemu wakuchanya.” Wakutumika Paulo wangulemba vakukwaskana ndi iyu kuti: “Iyu ndiyu nyinafwi.” (Aga. 4:26) Yerusalemu wakuchanya ntchigaŵa cha gulu laku Yehova lakuchanya la vakulengeka vauzimu vakugomezgeka. Ŵana ŵaki ndi Yesu kweniso Akhristu akusankhika 144,000 ndipu ŵe ndi chilindizga cha kuluta kuchanya nge mo venge ndi Paulo. Akhristu akusankhika ndi “mtundu wakupaturika” kung’anamuwa “Isirayeli waku Chiuta.”—1 Petu. 2:9; Aga. 6:16.
Kumbi Yerusalemu wakuchanya ‘wanguyuka’ ndi ‘kuŵala’ mu nthowa wuli? Iyu wanguchita viyo kuziya mu ŵana ŵaki akusankhika a pacharu chapasi. Wonani kukoliyana ko kulipu pakati pa vo vitiŵachitikiya ndi vo vikukambika mu uchimi wa mu Yesaya chaputala 60.
Akhristu akusankhika ‘anguyuka’ chifukwa ŵenga mu mdima wauzimu pa nyengu yo mpatuku wo ungukambikiya limu ungukuwa ukongwa akutumika wosi ŵati ŵafwa. (Mate. 13:37-43) Pa nyengu yeniyi yiwu ŵenga akapolu mu Babiloni Mukulu yo wamiya visopa vosi vaboza. Akhristu akusankhika anguja akapolu mpaka kwamba kwa “umaliru wa nyengu yinu,” ndipu nyengu yeniyi yingwamba mu 1914. (Mate. 13:39, 40) Pati pajumpha nyengu yimanavi, yiwu angufwatulika mu 1919, ndipu angwamba kuŵala mwauzimu po angwamba kugwira ntchitu yakupharazga. b Kwa vyaka vinandi, ŵanthu amitundu yosi atuza mu ukweru wenuwu kusazgapu akujaliya aku Isirayeli waku Chiuta wo ndi “mafumu” ngo ngazumbulika pa Yesaya 60:3.—Chivu. 5:9, 10.
Kunthazi, Akhristu akusankhika azamuŵala ukongwa. Mu nthowa wuli? Asani amaliza uteŵeti wawu wapacharu chapasi, yiwu aja chigaŵa cha “Yerusalemu Mufya,” pamwenga muwolu waku Khristu kung’anamuwa a 144,000 wo amuja mafumu kweniso asembi limoza ndi Khristu.—Chivu. 14:1; 21:1, 2, 24; 22:3-5.
Yerusalemu Mufya wazamuja chigaŵa chakukhumbika ukongwa pakufiska uchimi wa pa Yesaya 60:1. (Yeruzgiyani Yesaya 60:1, 3, 5, 11, 19, 20 ndi Chivumbuzi 21:2, 9-11, 22-26.) Nge mo Yerusalemu wenge tawuni yikulu ya Ufumu wa Isirayeli wakali, Yerusalemu Mufya nayu ndipuso Khristu, wazamuja boma la charu chifya. Kumbi Yerusalemu Mufya “[wasika wuli] kutuwa kuchanya kwaku Chiuta”? Mwakuchita vinthu vo vikwaska ŵanthu pacharu chapasi. Ŵanthu akopa Chiuta a mumitundu yosi ‘azamukwenda mwakugwiriskiya ntchitu ukweru wa tawuni yo.’ Yiwu azamufwatulika ku ubudi kweniso nyifwa. (Chivu. 21:3, 4, 24) Pavuli paki, ‘vinthu vosi vazamuwezekiyapu,’ nge mo mchimi Yesaya kweniso achimi anyaki angukambiya limu. (Machi. 3:21) Kuweziyapu vinthu vosi kwenuku kungwamba pa nyengu yo Khristu wakujaliya Fumu ndipu kwazamumala kukumaliya kwa Ulamuliru Waki wa Vyaka 1,000.
a Pa Yesaya 60:1 mu Bayibolu la Charu Chifya pe mazu ngakuti “munthukazi” mumalu mwakuti “Ziyoni,” pamwenga “Yerusalemu,” chifukwa chakuti mazu nga Chiheberi ngakuti “yuka” kweniso “ŵala” ngakamba va chinthu chinthukazi. Mwaviyo mazu ngakuti “munthukazi” ngatovya ŵanthu wo alongoro Chingelezi kuziŵa kuti munthu yo wazumbulika pa lemba ili ndi munthukazi wakuyeruzgiya.
b Kuwezekiyapu so kwa kusopa kwauneneska ko kunguchitika mu 1919 kukonkhoskeka pa Ezekiyeli 37:1-14 ndipuso Chivumbuzi 11:7-12. Ezekiyeli wangukambiya limu za kuwezekiyapu so kwa kusopa kwa uneneska kwa Akhristu wosi akusankhika pati pajumpha nyengu yitali kutuliya po angukoreke ukapolu. Uchimi wa mu Chivumbuzi ukamba za kubalika so mwauzimu kwa kagulu kamanavi ka Akhristu akusankhika wo alongozganga ndipu kwa kanyengu kamanavi anguleka dankha kuteŵete Yehova mwakufwatuka chifukwa chakuti angumangika. Mu chaka cha 1919, yiwu angusankhika kuja “kapolu wakugomezgeka ndi wazeru.”—Mate. 24:45; wonani buku lakuti Yehova Waweziyapu Kusopa Kwauneneska!, peji 118.
