1. Kumbi kopa Chiuta kung’anamuwanji, nanga ntchifukwa wuli nkhwakukhumbika ku ŵanthu wo atanja Yehova?

AKHRISTU auneneska atanja Chiuta kweniso atimuwopa. Mu nkhani iyi tikambiskanengi mo tingawope Chiuta mwakwenere. Kumbi kopa Chiuta kung’anamuwanji? Kopa Chiuta kung’anamuwa kumutumbika. Akhristu auneneska akhumba cha kuguŵiska Awusewu akuchanya chifukwa akhumba kuja nawu pa ubwezi wamampha.—Sali. 111:10; Nthanthi 8:13.

2. Mwakukoliyana ndi vo Davidi wangukamba pa Masalimo 86:11, kumbi tikambiskanengenji?

² Ŵerengani Masalimo 86:11. Asani muŵanaŵaniya vo lemba ili likamba, mungawona kuti Davidi waziŵanga kukhumbika kwa kopa Chiuta. Tiyeni tiwoni mo tingagwiriskiya ntchitu vo Davidi wangukamba mupempheru laki. Chakwamba, tikambiskanengi vifukwa vo titenere kuwope zina laku Chiuta. Chachiŵi, tiwonengi mo tingalongore kuti titopa zina laku Chiuta zuŵa lelosi.

3. Kumbi ndi vinthu wuli vo vinguwovya Mozesi kuti wawopengi zina laku Chiuta?

³ Ŵanaŵaniyani mo Mozesi wanguvwiya pa nyengu yo wenga kumphanji ya jalawi wati wawona unkhankhu waku Yehova uchijumpha. Ichi chenga chakuziziswa chikulu ukongwa cho chenga chechendachitikepu Yesu wechendazi pacharu chapasi. Mozesi wanguvwa mazu ngakuti: “Yehova, Yehova, Chiuta walisungu kweniso wawezi, wambula kukwiya liŵi ndipuso wakuzaza ndi chanju chambula kumala kweniso uneneska, walongo chanju chambula kumala ku ŵanthu masawuzandi,  wagowoke ŵanthu wo ananga, wo achita vinthu viheni ndipuso wo abuda.” Mungelu ndiyu watenere kuti wangukamba mazu yanga. (Eki. 33:17-23; 34:5-7) Mozesi watenere kuti wakumbukanga mazu ngenanga asani wazumbuwa zina laku Chiuta. Vakuziziswa cha kuti nyengu yinyaki Mozesi wangutcheŵeska Ayisirayeli kuti ‘awopengi zina launkhankhu kweniso lakuchitiska mantha.’—Doto. 28:58.

4. Kumbi ndi vinthu wuli vo vingatiwovya kuti timutumbikengi ukongwa Yehova?

⁴ Asani tigwiriskiya ntchitu zina lakuti Yehova tikhumbika so kuŵanaŵaniya mo iyu waliri. Titenere kuŵanaŵaniya mijalidu yaki nge nthazi, zeru, urunji ndi chanju. Kuŵanaŵaniya mijalidu yeniyi kweniso yinyaki kungatiwovya kuti timutumbikengi ukongwa Yehova.—Sali. 77:11-15.

5-6. (a) Kumbi zina laku Chiuta ling’anamuwanji? (b) Mwakukoliyana ndi Ekisodo 3:13, 14 ndi Yesaya 64:8, kumbi Yehova wachitiska wuli vinthu kuti vichitiki?

⁵ Kumbi zina laku Chiuta ling’anamuwanji? Akaswiri anandi akamba kuti zina lakuti Yehova ling’anamuwa kuti “Wachitiska Kuja.” Venivi ving’anamuwa kuti palivi cho chingatondekesa Yehova kuchita vo wakhumba ndipu wangachitiska kuti vinthu vichitiki. Kumbi wangachita wuli venivi?

⁶ Yehova wachitiska kuti vinthu vichitiki chifukwa waja chechosi cho wakhumba kuja kuti wafiski khumbu laki. (Ŵerengani Ekisodo 3:13, 14.) Kanandi mabuku ngidu ngatitichiska kuti tiŵanaŵaniyengi venivi. Yehova wangachitiska so ateŵeti ŵaki ambula kufikapu kuti aje chechosi cho wakhumba kuti amuteŵete ndi kufiska khumbu laki. (Ŵerengani Yesaya 64:8.) Venivi vitovya kuti Yehova wafiski khumbu laki. Palivi cho chingatondekesa kuti khumbu laki lichitiki.—Yesa. 46:10, 11.

7. Kumbi tingalongo wuli kuti tiwonga Awusefwi akuchanya?

⁷ Tingalongo kuti tiwonga Awusefwi akuchanya asani tiŵanaŵaniya vo achita kweniso vo atitiwovya kuchita. Mwakuyeruzgiyapu, asani tiŵanaŵaniya vosi vo Yehova wakulenga, titimutumbika ukongwa. (Sali. 8:3, 4) Asani tiŵanaŵaniya mo Yehova watiwovye kuti  tichiti khumbu laki, titimupaska ulemu. Kukamba uneneska titenere kutumbika zina laku Chiuta. Zina laki lisazgapu mijalidu Yaki yosi, vosi vo wachita kweniso vosi vo wachitengi.—Sali. 89:7, 8.

8. Mwakukoliyana ndi Dotoronome 32:2, 3, kumbi Yehova wakhumba kuti ateŵeti ŵaki achitengi nalu wuli zina laki?

⁸ Kwati kwaja kamanavi kuti Ayisirayeli asere mucharu cho angulayizgika, Yehova wangumusambiza sumu Mozesi. (Doto. 31:19) Pavuli paki Mozesi wangusambiza ŵanthu sumu yeniyi. (Ŵerengani Dotoronome 32:2, 3.) Asani tiwona vo vesi 2 ndi 3 likamba, Yehova wakhumba cha kuti ŵanthu aleki kuziŵa zina laki pamwenga kuti aliwonengi kuti ndakupaturika ukongwa mwakuti angalizumbuwa cha. Iyu wakhumba kuti ŵanthu wosi aziŵi zina laki. Ŵanthu angukondwa ukongwa kuti Mozesi wanguŵasambiza vakukwaskana ndi Yehova ndi zina Laki launkhankhu. Vo Mozesi wanguŵasambiza, vinguŵawovya kuti aje ndi chivwanu chakukho kweniso vinguŵachiska nge mo vuwa yichitiya ndi vakume. Kumbi tingachita wuli kuti tisambizengi mu nthowa yeniyi?

9. Kumbi tingawovya wuli kuti zina laku Chiuta litoweseki?

⁹ Asani tipharazga kunyumba ndi nyumba pamwenga ku malu ngo kusanirika ŵanthu anandi, tingagwiriskiya ntchitu Bayibolu kuti ŵanthu aziŵi zina laku Chiuta lakuti Yehova. Tingaŵapaska mabuku, kuŵawonesa mavidiyo kweniso kuŵalongo vinthu vinyaki pa webusayiti yidu. Tingakambiskana so ndi ŵanthu vakukwaskana ndi Chiuta kweniso mijalidu yaki asani te kuntchitu, kusukulu pamwenga asani te pa ulendu. Tingaŵakambiya vinthu vamampha vo Yehova wazamuchita pacharu chapasi. Asani nkhakwamba kuziŵa venivi, angawona kuti Yehova watitiyanja ukongwa. Po tikambiya ŵanthu uneneska wakukwaskana ndi Awusefwi achanju, titovya kuti zina lawu litoweseki. Tisuska maboza nganandi ngo ŵanthu akusambizika ngakukwaskana ndi Yehova. Titiŵasambiza fundu zakuchiska zakutuliya mu Bayibolu.​—Yesa. 65:13, 14.

10. Asani tichitiska masambiru nga Bayibolu, ntchifukwa wuli titenere kuchita vinandi mumalu mwakusambiza ŵaka marangu?

¹⁰ Asani tichitiska masambiru nga Bayibolu, tikhumbika kovya ŵanthu kuti aziŵi zina laku Chiuta ndi kuligwiriskiya ntchitu. Tikhumbika so kuŵawovya kuti aziŵi vo zina laki ling’anamuwa. Kweni angavwisisa cha asani tingaŵakambiya ŵaka ulongozgi waki, marangu kweniso mijalidu. Munthu yo wavwisisa fundu za mu Bayibolu, wangaziŵa marangu ngaku Chiuta. Kweni kumbi wavwiyengi Yehova chifukwa chakuti watimwanja? Kumbukani kuti Adamu ndi Heva angaziŵanga marangu ngaku Chiuta kweni amuyanjanga cha. (Gene. 3:1-6) Mwaviyo, titenere kuchita vinandi mumalu mwakusambiza ŵaka marangu ngaku Chiuta.

11. Asani tisambiza ŵanthu marangu ngaku Chiuta, kumbi tingaŵawovya wuli kuti amuyanjengi?

¹¹ Marangu ngaku Yehova ngatitiwovya nyengu zosi. (Sali. 119:97, 111, 112) Kweni wo tisambira nawu Bayibolu, angaŵanaŵana viyo cha asani aleka kuvwisa kuti Yehova wakutipaska marangu chifukwa chakuti watitiyanja. Mwaviyo, tingafumba munthu yo tisambira nayu kuti: “Muŵanaŵana kuti ntchifukwa wuli Chiuta wakambiya ateŵeti ŵaki kuti achitengi ivi pamwenga kuti alekengi kuchita ivi? Kumbi venivi vilongo kuti ndi Munthu wa mtundu wuli?” Asani tiwovyengi ŵanthu wo tisambira nawu Bayibolu kuti aŵanaŵaniyengi vakukwaskana ndi Yehova ndi kwanja zina laki, tiŵafikengi pa mtima. Yiwu ayanjengi Yehova kweniso marangu ngaki. (Sali. 119:68) Aŵengi  ndi chivwanu chakukho kweniso akunthiyengepu asani akumana ndi mayeseru ngakusuzga.​—1 Akori. 3:12-15.

12. Kumbi Davidi wangutondeka wuli kuja ndi mtima wamphumphu, nanga ndi vinthu wuli vo vinguchitika?

¹² Pa Masalimo 86:11 pe mazu nganyaki ngakuti, “ndipaskeni mtima wamphumphu.” Davidi ndiyu wangulemba mazu ngenanga. Pa nyengu yinyaki wanguwona mo viŵiya vipusu kuchita chinthu chiheni asani mtima ngwakugaŵikana. Zuŵa linyaki po wayendanga pachanya pa nyumba yaki, wanguwona muwolu wamweni wachisamba. Kumbi mtima waku Davidi pa nyengu iyi, wenga wamphumphu pamwenga ungugaŵikana? Davidi waliziŵanga dangu laku Yehova lakuti: “Ungakhumbiranga muwolu wa munyaku cha.” (Eki. 20:17) Kweni wangulutirizga kumulereska muwolu wamweni. Mtima waki ungugaŵikana. Iyu wangukhumbira Betiseba kweniso wakhumbikanga kukondwesa Yehova. Chinanga kuti Davidi wawopanga Yehova kweniso wangumuteŵete kwa nyengu yitali kweni wanguchita vo liŵavu laki lakhumbanga. Chifukwa cha venivi, Davidi wanguchita vinthu viheni. Iyu wangunyozesa zina laku Yehova. Wanguchitiska so kuti ŵanthu ambula kunanga akumani ndi masuzgu, kusazgapu a mu banja laki.​—2 Samu. 11:1-5, 14-17; 12:7-12.

13. Kumbi tiziŵa wuli kuti mtima waku Davidi unguja so wamphumphu?

¹³ Yehova wangumuchenya Davidi chifukwa cha vo wanguchita. Ndipu Davidi wangunozga ubwezi waki ndi Yehova. (2 Samu. 12:13; Sali. 51:2-4, 17) Davidi wangukumbuka masuzgu ngo wangukumana nangu mtima waki wati wagaŵikana. Mazu ngo wangukamba pa Masalimo 86:11, ngangakambika so kuti: “Ndipaskeni mtima wambula kugaŵikana.” Kumbi Yehova wangumuwovya Davidi kuti mtima waki uje wamphumphu pamwenga kuti wambula kugaŵikana? Hinya, chifukwa nyengu yinyaki Yehova wangukamba kuti mtima waku Davidi “wenga wamphumphu . . . kwaku Yehova Chiuta waki.”​—1 Mafu. 11:4; 15:3.

14. Kumbi titenere kujifumba fumbu nili, ndipu ntchifukwa wuli?

¹⁴ Vo Davidi wanguchita vititichiska kweniso vitititcheŵeska. Ateŵeti aku Chiuta mazuŵa nganu atenere kusambirapu kanthu pa vo Davidi wanguchita kuti wabudi. Isi tikhumba cha kuchita vo Davidi wanguchita. Kwali tayamba sonu kuteŵete Yehova pamwenga tikwamba kali, tikhumbika kujifumba kuti, ‘Kumbi ndikana mayeseru ngaku Satana ngo ngangachitiska kuti mtima wangu ugaŵikani?’

15. Kumbi kopa Chiuta kungativikiliya wuli asani tawona chithuzi cho chiwoneka kuti ntchakusikuwa viŵi cha?

 ¹⁵ Mwakuyeruzgiyapu, kumbi muchita wuli asani mwawona chithuzi chiheni pa TV pamwenga pa Intaneti cho chingachitiska kuti muŵi ndi maŵanaŵanu ngaheni? Vingaŵa vambula kusuzga kuŵanaŵana kuti chithuzi pamwenga filimu yo muwonere, yilongo vinthu vakusikuwa viŵi cha. Kweni yikhoza kuŵa nthowa yo Satana wagwiriskiya ntchitu kuti mtima winu ugaŵikani. (2 Akori. 2:11) Chithuzi chenichi tingachiyeruzgiya ndi weji lo munthu wangagwiriskiya ntchitu kuti wawaluwi chimiti chikulu. Pakwamba wato weji ndipu kwakusongoka ndiku wasereza pa chimiti. Asani wakhoma, weji lisere mukati ndipu chimiti chiwaluka. Chithuzi cho chiwoneka kuti ntchakusikuwa viŵi cha chingayanana ŵaka ndi kunthazi kwa weji ko kutuŵa kumana kweniso kwakusongoka. Kuwona vithuzi vo vingawoneka kuti vakofya ukongwa cha, kungachitiska kuti munthu wachiti ubudi ndipu pavuli paki wangaleka kuja wakugomezgeka kwaku Yehova. Mwaviyo, mungazomerezanga cha kuti maŵanaŵanu ngaheni ngasere mumtima winu. Mutenere kuŵa ndi mtima wamphumphu kuti muwopengi zina laku Yehova.

16. Kumbi titenere kujifumba mafumbu nanga asani takumana ndi mayeseru?

¹⁶ Kupatuwaku vithuzi vo vingawoneka nge kuti vakusikuwa cha, Satana wagwiriskiya so ntchitu mayeseru nganyaki kuti tichiti vinthu viheni. Kumbi tichita wuli? Vingaŵa vambula kusuzga kuŵanaŵana kuti vinthu ivi viheni cha. Mwakuyeruzgiyapu tingaŵanaŵana kuti: ‘Ndisezgekengi cha asani ndingachita ivi chifukwa ndi nkhani yimana.’ Maŵanaŵanu ngaviyo ngamampha cha. Tingachita umampha kujifumba mafumbu ngakuti: ‘Kumbi Satana wagwiriskiya ntchitu mayeseru yanga kuti wagaŵanisi mtima wangu? Asani ndingathera ku makhumbiru ngaheni, kumbi ndinyozesengi  zina laku Chiuta cha? Kumbi venivi vindiwovyengi kuti ndije pa ubwezi ndi Chiuta pamwenga cha?’ Muŵanaŵaniyengi mafumbu ngenanga. Mupemphengi zeru kwaku Yehova kuti mumuki mwauneneska mafumbu yanga mumalu mwakujipusika. (Yako. 1:5) Venivi vingakuwovyani kuti mujivikiliyi. Vingakuwovyani so kuti mukani mayeseru ngaku Satana nge mo Yesu wanguchitiya. Iyu wanguti: “Tuwapu yapa, Satana!”​—Mate. 4:10.

17. Ntchifukwa wuli mtima wakugaŵikana ungatiwovya cha? Kambani chakuyeruzgiyapu.

¹⁷ Mtima wakugaŵikana ungatiwovya cha. Tiyeruzgiyi kuti timu ya bola yikoliyana cha. Anyaki akhumba kutchuka, anyaki akhumba cha kulondo marangu nga bola penipo anyaki atimutumbika cha kochi. Timu yaviyo yingawina cha bola kweni yo yikoliyana ndiyu yiwina. Mtima winu ungayanana ndi timu yo yiwina bola asani maŵanaŵanu nginu, vo mukhumba kweniso mo muvwiya vikoliyana ndi marangu ngaku Yehova. Mutenere kukumbuka kuti Satana wakhumba kuti mtima winu ugaŵikani. Iyu wakhumba kuti tisuzgikengi kusankha pakati pa vo Yehova wakhumba kuti tichitengi ndi makhumbiru ngidu ngaheni. Kweni yimwi mukhumba kuti mtima winu uje wamphumphu kuti muteŵetiyengi Yehova. (Mate. 22:36-38) Mungazomerezanga cha kuti Satana wagaŵanisi mtima winu.

18. Mwakukoliyana ndi lemba la Mika 4:5, kumbi mwasimikiza kuchitanji?

¹⁸ Mupempherengi kwaku Yehova nge mo Davidi wanguchitiya. Iyu wangupempha kuti: “Ndipaskeni mtima wamphumphu kuti ndiwopengi zina linu.” Muyesesengi kuchita vinthu mwakukoliyana ndi pempheru lenili. Zuŵa lelosi muwonesesengi kuti vo musankha kuchita kwali vikulu pamwenga vimana, vilongongi kuti mutumbika zina laku Chiuta. Asani muchitengi viyo, muŵengi akwenere kudanika kuti Akaboni aku Yehova. (Nthanthi 27:11) Ndipu tosi tikambengi nge mo wangukambiya mchimi Mika kuti: “Isi tazamukwenda mu zina laku Yehova Chiuta widu muyaya mpaka muyaya.”​—Mika 4:5.