NKHANI YAKUSAMBIRA YA NAMBALA 45
Mo Tingawovye Ŵanthu Anyaki Kuti Asungengi Vinthu vo Khristu Wakulamula
“Mwaviyo, lutani mukasambizengi ŵanthu kuti aje akusambira ŵangu . . . , mukaŵasambizengi kuti asungengi vinthu vosi vo ndikukulamulani.”—MATE. 28:19, 20.
SUMU 89 Vwiyani Kuti Mutumbikiki
VO TISAMBIRENGI MU NKHANI IYI *
1. Mwakukoliyana ndi Mateyu 28:18-20, kumbi Yesu wanguŵapaska dangu wuli akusambira ŵaki?
YESU wati wayuskika, wanguwoneke kwa akusambira ŵaki wo anguwungana ku Galileya. Iyu wakhumbanga kuŵakambiya fundu yinyaki yakukhumbika ukongwa. Kumbi yenga fundu wuli? Mazu ngo wangukamba ngasanirika pa Mateyu 28:18-20.—Ŵerengani.
2. Kumbi tikambiskanengi mafumbu nanga?
2 Dangu laku Yesu lakusambiza ŵanthu kuti aje akusambira, ligwira so ntchitu ku mteŵeti waku Chiuta weyosi mazuŵa nganu. Mwaviyo, tiyeni tikambiskani mafumbu ngatatu ngakukwaskana ndi ntchitu yo Yesu wakutipaska. Fumbu lakwamba ndakuti, kusazgiyapu pakusambiza ŵanthu vo Chiuta wakhumba, kumbi tikhumbika so kuchitanji? Lachiŵi, kumbi abali ndi azichi wosi mu mpingu, angawovya wuli kuti ŵanthu wo tisambira nawu Bayibolu akuwi mwauzimu? Ndipu lachitatu ndakuti, kumbi tingaŵawovya wuli abali ndi azichi wo akuleka kupharazga, kuti ayambi so kugwiraku ntchitu yakusambiza ŵanthu kuti aje akusambira?
MUŴASAMBIZENGI KUTI ASUNGENGI VINTHU VO YESU WAKULAMULA
3. Kusazgiyapu pa dangu lo Yesu wangukamba, kumbi wangupereka so ulongozgi nuwu?
3 Yesu wakupereka ulongozgi wakuvwika umampha. Iyu wangukamba kuti tikhumbika kusambiza ŵanthu vinthu vo wakulamula. Kweni tingaluwanga cha fundu yakukhumbika ukongwa. Yesu wangukambapu cha kuti: ‘Mukaŵasambizengi vinthu vosi vo ndikukulamulani.’ Kweni wangukamba kuti: Mukaŵasambizengi “kuti asungengi vinthu vosi vo ndikukulamulani.” Kuti tilondo ulongozgi wakuvwika umampha wenuwu asani tisambiza munthu Bayibolu, titenere kumusambiza waka pe cha, kweni titenere so kumulongo mo wangachitiya. (Machi. 8:31) Ntchifukwa wuli kuchita venivi nkhwakukhumbika?
4. Kumbi kusunga dangu kung’anamuwanji? Kambani chakuyeruzgiyapu.
4 “Kusunga” dangu, kung’anamuwa kuvwiya. Tiyeni tikambiskani chakuyeruzgiyapu, cho chingatiwovya kuziŵa mo tingasambiziya munthu kuti wasungengi pamwenga kuvwiya vinthu vo Khristu wakulamula. Kumbi dilayiva yo wasambiza munyaki kwendesa galimotu, wangamuwovya wuli kuti wasungengi marangu nga pa msewu? Chakwamba, watimusambiza dankha marangu nga pa msewu ngo wakhumbika kuvwiya. Kweni kuti wamusambizi kusunga marangu ngenanga, wakhumbika dankha kuchita chinthu chinyaki. Iyu wakhumbika kwende nayu limoza pa msewu, kumupaska ulongozgi pa nyengu yo watendesa galimotu kweniso kumuwovya mo wangagwiriskiya ntchitu ulongozgi wenuwu. Kumbi tingasambiranji pa chakuyeruzgiyapu chenichi?
5. (a) Mwakukoliyana ndi Yohane 14:15; 1 Yohane 2:3, kumbi ŵanthu wo tisambira nawu Bayibolu, titenere kuŵasambiza kuti achitengenji? (b) Kumbi tingaŵapaska ulongozgi nuwu ŵanthu wo tisambira nawu Bayibolu? Kambani vakuyeruzgiyapu.
5 Asani tisambiza ŵanthu anyaki Bayibolu, titiŵasambiza vo Chiuta wakhumba kuti isi tichitengi. Kweni tikhumbika kuchita vinandi. Tikhumbika kusambiza ŵanthu wo tisambira nawu Bayibolu mo angagwiriskiya ntchitu vo asambira pa umoyu wawu. (Ŵerengani Yohane 14:15; 1 Yohane 2:3.) Kuziya mu vo isi tichita, tingalongo wo tisambira nawu Bayibolu kuziŵa mo angagwiriskiya ntchitu fundu za mu Malemba, asani ŵe kusukulu, ku ntchitu pamwenga asani achita masaza. Tingaŵakambiya vo vingutichitikiyapu pa umoyu, kuti tiŵalongo mo kugwiriskiya ntchitu fundu za mu Bayibolu kungutivikiliya pamwenga mo kungutiwovye kuti tisankhi umampha vinthu. Asani te ndi ŵanthu wo tisambira nawu Bayibolu, tingapemphera kwaku Yehova kuti mzimu waki wakupaturika uŵalongozgengi.—Yoha. 16:13.
6. Kumbi kusambiza ŵanthu kuti asungengi marangu ngaku Yesu kusazganjipu?
6 Kumbi kusambiza ŵanthu kuti asungengi marangu ngaku Yesu kusazganjipu? Tikhumbika kuwovya ŵanthu wo tisambira nawu Bayibolu kuti ajengi ndi mtima wakukhumba kusambiza ŵanthu anyaki. Kweni ŵanthu anyaki wo tisambira nawu Bayibolu angachita mantha kuti apharazgengi. Mwaviyo, tikhumbika kuzikira asani titiŵapaska ulongozgi, wo kamana ndi kamana ungaŵawovya kuti avwisengi vo asambira, viŵafikengi pa mtima ndipuso kuti achitengepu kanthu. Kumbi tingaŵawovya wuli ŵanthu wo tisambira nawu Bayibolu kuti nawu apharazgengeku uthenga wamampha?
7. Kumbi tingamuwovya wuli munthu yo tisambira nayu, kuti wapharazgiyengeku anyaki uthenga wamampha?
7 Ŵanthu wo tisambira nawu Bayibolu, tingaŵafumba mafumbu nge ngakuti: “Kumbi umoyu winu wasintha wuli chifukwa chakugwiriskiya ntchitu vo Bayibolu lisambiza? Kumbi muwona kuti ŵanthu anyaki nawu akhumbika so kuvwa uthenga wenuwu? Nanga mungachita wuli kuti muŵawovyi?” (Nthanthi 3:27; Mate. 9:37, 38) Mulongoni timapepala munthu yo musambira nayu, to ntchigaŵa cha Vidya Vakusambiziya. Ndipu mukambiyeni kuti wasankhepu kapepala kamoza ko wawona kuti ŵanthu a mu banja laki, abwezi ŵaki pamwenga ŵanthu wo wagwira nawu ntchitu angakayanja. Pavuli paki, mupaskeni timapepala takupambanapambana munthu yo musambira nayu. Yeseriyani nayu limoza kuti mumusambizi mo wangagaŵiya timapepala teniti mwalusu. Chinanga kuti munthu yo tisambira nayu, wangazomerezgeka kuja mupharazgi wambula kubatizika, kweni tikhumbika mbwenu kulutirizga kupharazgiya nayu limoza.—Waku. 4:9, 10; Luka 6:40.
KUMBI WEYOSI MU MPINGU, WANGAWOVYA WULI KUTI WO TISAMBIRA NAWU ALUTI PANTHAZI?
8. Ntchifukwa wuli ŵanthu wo tisambira nawu Bayibolu atenere kumuyanja ukongwa Chiuta kweniso ŵanthu? (Wonani so bokosi lakuti, “ Mo Tingawovye Wo Tisambira Nawu Bayibolu Kuti Amuyanjengi Ukongwa Chiuta.”)
8 Nyengu zosi tikumbukengi kuti Yesu wangukamba kuti tisambizengi ŵanthu anyaki “kuti asungengi vinthu vosi vo” iyu wakulamula. Vinthu venivi, visazgapu kusunga marangu ngaŵi ngakulungakulu, kwanja Chiuta kweniso kwanja ŵanthu. Marangu ngenanga, ngakoliyana ndi ntchitu yidu yakupharazga kweniso kuwovya ŵanthu kuti aje akusambira. (Mate. 22:37-39) Kumbi pe kukoliyana wuli? Chifukwa chikulu cho tipharazgiya ntchakuti titanja Chiuta kweniso anyidu. Kweni ŵanthu anyaki wo tisambira nawu Bayibolu angachita mantha kupharazga. Kweni tingaŵasimikiziya ŵanthu ŵenaŵa kuti Yehova waŵawovyengi ndipu kamana ndi kamana alekengi kuchita mantha. (Sali. 18:1-3; Nthanthi 29:25) Bokosi lo le mu nkhani iyi, likonkhoska vinthu vo tingachita kuti tiwovyi munthu yo tisambira nayu kuti wamuyanjengi ukongwa Chiuta. Kusazgiyapu yapa, kumbi weyosi mu mpingu wangamuwovya wuli munthu yo wasambira Bayibolu kuti wamuyanjengi ukongwa Chiuta kweniso ŵanthu?
9. Muchakuyeruzgiyapu cha munthu yo wasambira kwendesa galimotu, kumbi ndi nthowa nizi zo wasambiriya fundu zakukhumbika?
9 Ŵanaŵaniyani so chakuyeruzgiyapu cha munthu yo wasambira kwendesa galimotu. Pa nyengu yo watendesa galimotu pa msewu limoza ndi msambizi waki, kumbi wangasambira munthowa nizi? Iyu wangasambira asani wavwisiya vo msambizi waki watimukambiya kweniso asani wawonesesa vo madilayiva nganyaki ngalusu ngachita. Mwakuyeruzgiyapu, msambizi wangamulongo dilayiva munyaki yo wazomereza kuti anyaki adanjiyepu mumalu mwaku iyu. Pamwenga wangamulongo dilayiva munyaki yo wazimwaku magesi ndi usiku, ndi chilatu chakuti magalimotu ngo ngatuwa kunthazi kwaki ngajumphi umampha. Vakuyeruzgiyapu venivi, vingamuwovya munthu yo wasambira kuziŵa fundu zo wangagwiriskiya ntchitu asani watendesa galimotu.
10. Kumbi ndi vinthu wuli vo vingawovya munthu yo wasambira Bayibolu kuti waluti panthazi mwauzimu?
10 Mwakuyanana waka, munthu yo wasambira Bayibolu, yo wayamba kwenda pa nthowa yakuluta ku umoyu, wasambira ku msambizi waki pe cha. Kweni wasambira so ku vakuyeruzgiyapu vamampha va ateŵeti anyaki aku Yehova. Sonu ntchinthu wuli cho chingawovya ŵanthu wo tisambira nawu Bayibolu kuti aluti panthazi mwauzimu? Awunganengi. Ntchifukwa wuli ve viyo? Ntchifukwa chakuti ulongozgi wa mu Malemba wo angasambira pa maunganu, ungaŵawovya kuti aziŵi vinandi, aje ndi chivwanu chakukho kweniso kuti amuyanjengi ukongwa Chiuta. (Machi. 15:30-32) Kweniso ku maunganu, msambizi watovya munthu yo wasambira nayu, kuti waziŵani ndi abali ndi azichi wo angukumanapu ndi vinthu vo iyu wakumana navu. Kumbi ndi vinthu wuli vo munthu yo wasambira Bayibolu wangawona, vo vilongo kuti abali ndi azichi atanjana? Tiyeni tikambiskani vakuyeruzgiyapu ivi.
11. Kumbi vakuyeruzgiyapu nivi vo munthu yo wasambira Bayibolu wangawona mu mpingu, nanga venivi vingamuwovya wuli?
11 Mwakuyeruzgiyapu, mpapi munthukazi yo walera yija ŵana, yo musambira nayu Bayibolu, asani waluta ku maunganu wangawona mzichi munyaki yo nayu walera yija ŵana. Iyu wangachiskika kuwona kuti mzichi uyu watesesa kuza ndi ŵana ŵaki anamana ku Nyumba ya Ufumu. Chakuyeruzgiyapu chinyaki, munthu yo wasambira Bayibolu yo vitimusuzga kuti waleki kukweŵa foja, wangaziŵana ndi mupharazgi munyaki yo vamusuzganga kuti waleki kukweŵa foja, kweni sonu wakuleka. Mupharazgi mwenuyu, wangakambiya munthu uyu mo kwanja ukongwa Yehova kungumuwovye kuti wavwiyi marangu ngaku Chiuta. (2 Akori. 7:1; Afi. 4:13) Mupharazgi uyu wati wamukambiya munthu yo wasambira Bayibolu mo iyu wanguleke kukweŵa, watimukambiya kuti: “Nawiso ungaleka.” Venivi vitimuchiska munthu yo wasambira Bayibolu ndipu wagomezga kuti nayu so wangaleka kukweŵa foja. Ndipu chakuyeruzgiyapu chinyaki so, msungwana yo wasambira Bayibolu wangawona mzichi wachisungwana yo wakondwa pa umoyu waki chifukwa chakuti ndi Kaboni. Asani munthu yo wasambira Bayibolu wawona mo mzichi uyu wakondwe, wangakhumba kuziŵa vinandi vo vichitiska kuti mzichi mwenuyu wakondwengi nyengu zosi.
12. Ntchifukwa wuli tingakamba kuti weyosi mu mpingu wangawovya ŵanthu wo asambira Bayibolu?
12 Asani ŵanthu wo tisambira nawu Bayibolu aziŵa abali ndi azichi akugomezgeka akupambanapambana, angasambira kwaku yiwu kuziŵa vo kusunga dangu laku Khristu lakuti tiyanjengi Chiuta ndi anyidu, kung’anamuwa. (Yoha. 13:35; 1 Timo. 4:12) Nge mo takambiyapu kali, munthu yo wasambira Bayibolu, wangasambira kwa apharazgi wo akumalanapu ndi masuzgu ngakuyanana ndi ngo iyu wakumana nangu. Iyu wangasambira ku ŵanthu ŵenaŵa vinthu vo wakhumbika kusintha kuti waje wakusambira waku Khristu. (Doto. 30:11) Mwaviyo, weyosi mu mpingu, wangawovya munthowa zakupambanapambana kuti ŵanthu wo tisambira nawu Bayibolu aluti panthazi mwauzimu. (Mate. 5:16) Kumbi ndi vinthu wo yimwi mutesesa kuchita kuti muchiski ŵanthu wo asambira Bayibolu wo atuza ku maunganu?
TIWOVYENGI WO AKULEKA KUPHARAZGA KUTI AYAMBI SO KUPHARAZGA
13-14. Kumbi Yesu wanguchita nawu wuli akutumika ŵaki ŵati aguŵa?
13 Tikhumbika kuwovya abali ndi azichi wo akuleka kupharazga, kuti ayambi so kugwiraku ntchitu yakusambiza ŵanthu kuti aje akusambira. Mo Yesu wanguchitiya ndi akutumika ŵaki wo anguguŵa, vilongo mo nasi tingachitiya mazuŵa nganu.
14 Kukumaliya kwa uteŵeti waku Yesu wapacharu chapasi wepafupi kubayika, akutumika ŵaki “wosi angumusiya ndi kuthaŵa.” (Mariko 14:50; Yoha. 16:32) Kumbi Yesu wanguchita wuli pa nyengu yeniyi, yo akutumika ŵaki anguguŵa? Pati pajumpha nyengu yimanavi iyu wati wayuskika, wangukambiya akusambira ŵaki anyaki kuti: “Mungawopanga cha! Lutani mukakambiyi abali ŵangu [kuti ndayuskika].” (Mate. 28:10a) Yesu wanguŵaleka cha akutumika ŵaki. Chinanga kuti yiwu angumuthaŵa, kweni wanguŵadana mbwenu kuti “abali ŵangu.” Nge Yehova, Yesu wenga walisungu kweniso wakugowoke.—2 Mafu. 13:23.
15. Kumbi tituvwa wuli ndi abali ndi azichi wo akuleka kupharazga?
15 Mwakuyanana waka, nasi titiŵaŵanaŵaniya ukongwa abali ndi azichi wo akuleka kupharazga. Yiwu mbabali ndi azichi ŵidu ndipu titiŵayanja! Tiluwa cha ntchitu zamampha zo abali ndi azichi ŵenaŵa achitanga, ndipu anyaki atenere kuti anguchita venivi kwa vyaka vinandi. (Ahe. 6:10) Titiŵasoŵa ukongwa! (Luka 15:4-7) Nge mo Yesu wachitiyanga, kumbi tingalongo wuli kuti titiŵaŵanaŵaniya abali ndi azichi ŵenaŵa?
16. Kumbi tingalongo wuli kuti titiŵaŵanaŵaniya abali ndi azichi ŵidu wo akuleka kuwungana?
16 Tiŵadaniyengi ku maunganu mwachanju. Nthowa yimoza yo Yesu wanguchiskiya akutumika ŵaki wo anguguŵa, nkhuŵadaniya ku maunganu. (Mate. 28:10b; 1 Akori. 15:6) Mwakuyanana waka, nasi tingachiska ŵanthu wo akuleka kuwungana kuti ayambi so kuwungana. Tiziŵa kuti tingakhumbika kuŵadana kananandi waka kuti ŵazi. Tikayika cha kuti Yesu wangukondwa kuti akutumika ŵaki anguluta ko iyu wanguŵadana.—Yeruzgiyani ndi Mateyu 28:16 ndi Luka 15:6.
17. Kumbi tikhumbika kuchita wuli asani abali ndi azichi wo anguleka kuwungana ŵaza ku maunganu?
17 Tiŵalondiyengi ndi mtima wosi. Akusambira aku Yesu angufwatuka ŵati akumana nayu chifukwa chakuti wanguŵalondere umampha, ndipu iyu ndiyu wangwamba kukambiskana nawu. (Mate. 28:18) Kumbi tingachita wuli asani ŵanthu wo anguleka kuwungana ŵaza ku Nyumba ya Ufumu? Isi ndisi tikhumbika kuchitapu kanthu mwakuŵalondere ndi mtima wosi. Pakwamba, tingafipa mtima kuti tikambengenji. Kweni kwambula kuŵachitiska soni, tingaŵakambiya kuti takondwa kuŵawona so.
18. Kumbi tingaŵachiska wuli abali ndi azichi wo akuleka kupharazga?
18 Tiŵachiskengi ndi mtima wosi. Akusambira aku Yesu atenere kuti afipanga mtima kuti angafiska cha kupharazga pacharu chosi. Chifukwa cha venivi, Yesu wanguŵachiska akusambira ŵaki kuti: “Ini ndiŵengi namwi limoza mazuŵa ngosi.” (Mate. 28:20) Kumbi venivi vinguŵawovya? Hinya. Pati pajumpha waka nyengu yimanavi, yiwu angutangwanika ndi ntchitu ya “kusambiza ndi kupharazga uthenga wamampha.” (Machi. 5:42) Abali ndi azichi wo akuleka kupharazga, nawu so akhumbika kuchiskika. Yiwu angachita mantha kuti ayambi so kupharazga. Kweni tiŵachiskengi kuti agwirengi ŵija cha ntchitu yeniyi. Tilutiyengi nawu limoza mu uteŵeti asani ayamba so kupharazga. Tikayika cha kuti yiwu angawonga chovyu chidu, po atamba so kugwiraku ntchitu yakupharazga uthenga wamampha. Asani ŵanthu ŵenaŵa tichita nawu vinthu nge abali ndi azichi ŵidu, angayamba so kuchita phamphu. Ndipu venivi vingawovya kuti weyosi wakondwengi mu mpingu.
TIKHUMBA KUMALIZA NTCHITU YO TIKUPASKIKA
19. Kumbi tikhumbisiska kuchitanji, ndipu ntchifukwa wuli?
19 Kumbi tilutirizgengi kugwira ntchitu yakusambiza ŵanthu kuti aje akusambira mpaka zukwanji? Mpaka pakumaliya pa nyengu yinu. (Mate. 28:20; wonani Mazu ngo Ngakonkhoskeka, “Nyengu yinu; Nyengu yo yituza; Zinyengu.”) Kumbi tifiskengi uteŵeti wo Yesu wakutipaska? Ndivu tikhumbisiska kuchita! Tikondwa kugwiriskiya ntchitu nyengu yidu, nthazi zidu kweniso chuma chidu kuti tisaniyi ŵanthu wo ndi “maŵanaŵanu ngamampha ngakuŵawovya kuti azisaniyi umoyu wamuyaya.” (Machi. 13:48) Asani tichita venivi, ndikuti titezga Yesu. Iyu wangukamba kuti: “Chakurya changu nkhuchita khumbu laku yo wakundituma ndi kumaliza ntchitu yaki.” (Yoha. 4:34; 17:4) Venivi ndivu nasi tikhumbisiska kuchita. Tikhumba kumaliza ntchitu yo tikupaskika. (Yoha. 20:21) Ndipu tikhumba kuti ŵanthu anyaki, kusazgapu abali ndi azichi anyaki wo akuleka kuwungana pamwenga kupharazga, nawu akunthiyengepu kugwira ntchitu yeniyi limoza ndi isi.—Mate. 24:13.
20. Mwakukoliyana ndi Afilipi 4:13, ntchifukwa wuli tingafiska kugwira ntchitu yo Yesu wakutilamula?
20 Kweni ntchipusu cha kugwira ntchitu yikulu yo Yesu wakutipaska. Chinanga kuti ve viyo, tigwira tija cha ntchitu yeniyi. Yesu wakulayizga kuti iyu waŵengi nasi. Tigwira ntchitu yakusambiza ŵanthu kuti aje akusambira “limoza ndi Chiuta” kweniso “mwakukoliyana ndi Khristu.” (1 Akori. 3:9; 2 Akori. 2:17) Mwaviyo, tingafiska kugwira ntchitu yeniyi. Ndi mwaŵi ukulu ukongwa kweniso vakukondwesa kugwiraku ntchitu yeniyi, kweniso kuwovya ŵanthu anyaki kuti nawu agwirengeku!—Ŵerengani Afilipi 4:13.
SUMU 79 Asambizeni Kuti Aje Akukho
^ ndimi 5 Yesu wangukambiya akusambira ŵaki kuti akasambizengi ŵanthu kuti aje akusambira ndipuso kuti asungengi vinthu vosi vo iyu wanguŵalamula. Nkhani iyi, yikonkhoska vo tingachita kuti tilondo ulongozgi waku Yesu wenuwu.
^ ndimi 66 VITHUZI: Mzichi yo wachitiska sambiru la Bayibolu, wakonkhoske munthu yo wasambira nayu vo wangachita kuti wamuyanjengi ukongwa Chiuta. Pavuli paki, munthu mwenuyu wagwiriskiya ntchitu fundu zitatu zo msambizi waki wamusambiza.
