Tikwaskika ukongwa ndi vinthu vakuchitiska chitima vo vichitika. Vinthu venivi, vingakwaska maŵanaŵanu ngidu, mo tiwone umoyu ndipuso vingamala nthazi zidu. Fumu Davidi ya mu nyengu ya Ayisraele yingukumana so ndi masuzgu nganandi. Kumbi Davidi wangumalana nangu wuli masuzgu? Sumu yakuchiska yo Davidi wangumba, wangumuka kuti: “Ndi mazu ngangu ku Ambuya; ndi mazu ngangu ndiŵeyere ku Ambuya. Ndipereka kwaku iwu madandaulu ngangu ngosi; nditiŵanene masuzgu ngangu ngosi. Po mzimu wangu wagongowa, imwi muziŵa nthowa yangu.” Davidi wanguromba mwakujiyuyuwa kwaku Chiuta kuti wamuwovyi.​—Sumu 142:1-3.

Sumu yinyaki yo Davidi wangumba, wangukamba kuti: “Chinthu chimoza ndafumba ku Ambuya, chenicho ndichu ndikapenjanga; kuti ndijaliriyi munyumba ya Ambuya mazuŵa ngosi nga umoyu wangu, kudaŵira kunozga kwa Ambuya, ndi kupenjeska munyumba yawu yakupaturika.” (Sumu 27:4) Chinanga kuti Davidi wenga Mlevi cha, iyu wanguma kubwalu kwa balaza lakupaturika pafupi ndi chihema, cho asopiyangamu Yehova. Iyu wangukondwa ukongwa ndichu chifukwa chaki wakhumbisiskanga kuja muchihema umoyu waki wosi, kuti ‘wadaŵiri kunozga kwa Ambuya.’

Mazu ngachihebere ngo akufwatuliya kuti “kunozga” pa Sumu 27:4, ngang’anamuwa “chinthu chamampha pamwenga chakukondwesa.” Nyengu zosi Davidi walungurukanga vo Chiuta wakunozga pa nkhani yakusopa kwauneneska. Tingachita umampha kujifumba kuti, ‘Kumbi nani ndichita nge mo Davidi wachitiyanga?’

Mazuŵa nganu, tiromba kwaku Yehova kuziya munyumba chayiyu cha. Kweni kuziya mu nthowa yakupaturika yo Yehova wakunozga pa nkhani yakusopa kwauneneska. a Asani tilunguruka pa vinthu venivi, nasi tikhoza “kudaŵira kunozga kwa Ambuya.”

Ŵanaŵaniyani jocheru la mkuŵa lo awotchiyangapu sembi lo angulimika pafupi ndi khomu la chihema. (Chit. 38:1, 2; 40:6) Jocheru lenili lamiyanga kuti Chiuta wenga wakunozgeka kulonde umoyu waku Yesu nge sembi. (Ŵah. 10:5-10) Kumbi venivi ving’anamuwanji kwaku isi? Wakutumika Paulo wangulemba kuti: “Asani, tenga teche amawongu, tingwanjaniskikiya kwaku Chiuta mu nyifwa ya Mwana waki.” (Ŵar. 5:10) Asani tivwana kuti Yesu wakutifwiya, ndikuti te pa ubwezi ndi Chiuta. Mwaviyo, Chiuta wakhoza kutiyanja ndipuso kutigomezga. Asani tichita viyo, tijengi pa ‘ubwezi’ wakukho ndi Yehova.​—Sumu 25:14.

Chifukwa chakuti ‘visisitika vilakwa vidu,’ tilonde ‘nyengu za chisisipuska kutuwa kwa Ambuya.’ (Mac. 3:19) Isi tiyanana ndi mukayidi yo walapa vinthu viheni vo wakuchita ndipu wasintha ukongwa pa nyengu yo walindizga kubayika. Wakweruzga wati wawona kuti wasintha, wajala mlandu waki kuti waleki kubayika. Mukayidi yo, wangazika mtima ndipuso wangakondwa ukongwa! Nge wakweruzga mwenuyu, Yehova wachitiya lisungu ŵanthu wo alapa ndipu watuzgapu cheruzgu cha nyifwa.

Pa vinthu vo vachitikanga pa nyengu yakusopa kwauneneska, Davidi wawonanga kuti Ayisraele anandi awungananga, aŵerenganga ndi kukonkhoska Chilangulu chaku Mosese, awotchanga tinthu to  tatuzganga fungu lakununkhira ndipuso asembi ndi Alevi, achitanga uteŵeti wakupaturika. (Chit. 30:34-38; Maŵ. 3:5-8; Mar. 31:9-12) Vinthu venivi, viyanana ndi vo vichitika mazuŵa nganu.

Nge mo venge kali, mazuŵa nganu “nkhwamampha mbwenu ndi kwakunozga kuti abali aje pamoza!” (Sumu 133:1) Chiŵerengeru cha abali ndi azichi chikuwa ukongwa pacharu chosi chapasi. (1 Pet. 2:17) Mazu ngaku Chiuta, ngaŵerengeka ndi kukonkhoskeka pa maunganu ngidu. Kuziya m’gulu laki, Yehova wapereka ulongozgi wo utitiwovya ukongwa. Pe so mabuku nganandi ngo tingagwiriskiya nchitu pakuchita sambiru lapakutija kweniso pakusopa kwa pabanja. Yumoza wa mu Wupu Wakulongozga wangukamba kuti: “Kulunguruka Mazu ngaku Yehova, kuziŵa cho ngang’anamuwa, kufufuza kuti ndiziŵi vinandi ndipuso kuvwisisa vandiwovya kuti ndijengi pa ubwezi wakukho ndi Yehova kweniso ndikhorwengi fundu zaki.” Kukamba uneneska, ‘chinjeru chingakondwesa mtima widu.’​—Nthanthi 2:10.

Mazuŵa nganu, Yehova wavwisiya zuŵa lelosi marombu ngakuzomerezgeka nga ateŵeti ŵaki. Marombu nga viyo kwaku Yehova ngaja nge fungu la tinthu takununkhira umampha. (Sumu 141:2) Mwaviyo, nchakukondwesa kuziŵa kuti Yehova wakondwa ukongwa asani tiromba mwakujiyuyuwa!

Mosese wanguromba kuti: “Ambuya Chiuta widu, vitumbiku vinu viŵi paku ifwi, ndipu mutisakatiski mwaku vosi vo tichita!” (Sumu 90:17) Po tichita uteŵeti widu mwaphamphu, Yehova watumbika nchitu yidu. (Nthanthi 10:22) Vingachitika kuti tikuwovyapu ŵanthu anyaki kusambira uneneska. Panyaki taja tichikunthiyapu kwa vyaka vinandi chifukwa cha ŵanthu akususka, kutama, kusuzgika maŵanaŵanu pamwenga kutombozgeka. (1 Ŵat. 2:2) Chinanga vingaŵa viyo, tawona “kunozga kwa Ambuya” ndipuso taziŵa kuti awuskefwi akuchanya, akondwa ukongwa ndi phamphu lidu.

Davidi wangumba kuti: “Imwi Ambuya, nchigaŵa changu chakusankhika, mutindipaska chosi cho ndikhumba; umoyu wangu we m’manja nginu.” (Sumu 16:5, 6) Davidi wanguwonga kuti Yehova wenga ‘chigaŵa’ chaki, kung’anamuwa kuja pa ubwezi wamampha ndi Yehova ndipuso mwaŵi wakumuteŵete. Nge Davidi, tingakumana ndi masuzgu kweni tisaniya vitumbiku vinandi kutuliya kwaku Chiuta. Mwaviyo, tiyeni tilutirizgi kwanja kusopa kwauneneska ndipu nyengu zosi tilungurukengi vo Yehova wakunozga pa nkhani yakusopa kwauneneska.