1, 2. Nchifukwa wuli buku la Sumu chaputala 45 ndakukhumbika ukongwa kwaku isi?

 FUMU ya unkhankhu yikwera pakavalu kuchipunda arwani ŵaki chifukwa yikhumba kuchita vinthu mwauneneska ndipuso mwaurunji. Pavuli pakupunda kwakumaliya, yito munthukazi wakutowa. Fumu yikumbukika ndi kutumbikika m’mugonezi wosi wo utuza. Vinthu vakukondwesa venivi ndivu vikonkhoskeka tikambiskanengi m’buku la Sumu chaputala 45.

² Sumu chaputala 45 yimala ndi nkhani yakukondwesa ŵaka cha kweni le ndi fundu zakukhumbika ukongwa. Mwe vakuchitika vo vingatovya sonu kweniso munthazi. Mwaviyo tiyeni tisandi sumu yeniyi mwakuphwere.

3, 4. (a) Kumbi “makani ngamampha” ngo ngachontha mtima widu ndi nanga, nanga ngangakwaska wuli mtima widu? (b) Kumbi ‘tikamba makani nga karonga’ mu nthowa wuli, ndipu lilimi lidu lija wuli nge nchakulembe?

³ Ŵerengani Sumu 45:1. “Makani ngamampha” ngo ngachontha mtima wa wakulemba sumu ndi kuwuchitiska kuti ‘ubwibwituki’ ngakwaska fumu. Makani ngamampha ngenanga nganguwovya wakulemba sumu kuti waje ndi phamphu kweniso  nganguchitiska lilimi laki kuti lije nge “nchakulembe cha mlembi wazeru.”

⁴ Nanga isi ngatitikwaska wuli? Uthenga wamampha wakukwaskana ndi Ufumu waku Chiuta ndiwu makani ngamampha ngo ngachontha mtima widu. Uthenga wa Ufumu wenuwu, unguja ‘wamampha’ ukongwa mu 1914. Nchifukwa wuli tikamba viyo? Kutuliya m’chaka chenichi, ukuleka kukamba za Ufumu wa munthazi kweni boma lenechu lo liwusa kuchanya. Wenuwu ndi ‘evangeli . . . wa Ufumu’ wo tipharazga “m’charu chosi chapasi uli mbukaboni ku mitundu yosi.” (Mat. 24:14) Kumbi mtima widu ‘ubwibwituka’ ndi uthenga wa Ufumu? Kumbi tipharazga uthenga wamampha wa Ufumu mwaphamphu? Nge wakulemba sumu, nasi ‘tikamba makani nga karonga’ yo ndi Fumu, Yesu Khristu. Tipharazga kuti iyu ndi Fumu Yakusankhika ya Ufumu waku Chiuta. Kusazgiyapu pa fundu yeniyi, tipempha alongozgi a charu wosi ndi ŵanthu ŵawu kuti ajithereski ku fumu yeniyi. (Sumu 2:1, 2, 4-12) Ndipu lilimi lidu lija nge “nchakulembe cha mlembi wazeru” chifukwa chakuti asani tipharazga, tigwiriskiya nchitu Bayibolo.

5. (a) Kumbi Yesu wenga “wakutowa” mu nthowa nizi? (b) Kumbi ‘mazu nga wezi ngapungukanga wuli mumulomu wa Fumu,’ ndipu isi tingamuyezga wuli?

⁵ Ŵerengani Sumu 45:2. Malemba ngakonkhoska vinandi cha vakukwaskana ndi kawonekeru kaku Yesu. Nge munthu wakufikapu, tikayika cha kuti iyu wenga “wakutowa.” Ivi venga viyo chifukwa chakuti wenga wakugomezgeka nyengu zosi kwaku Yehova. Kusazgiyapu pa fundu yeniyi, Yesu wagwiriskiyanga nchitu “mazu nga wezi” pakupharazga uthenga wa Ufumu. (Luka 4:22; Yoh. 7:46) Kumbi tiyesesa kulondo chakuwoniyapu chaki asani tipharazga ndi kugwiriskiya nchitu mazu ngo ngangachontha mitima ya ŵanthu?—Ŵakol. 4:6.

6. Kumbi Chiuta wakutumbika wuli Yesu “muyaya”?

⁶ Chifukwa chakuti Yesu wangujipereka ndi mtima wosi kwaku Yehova, iyu wangumutumbika pa uteŵeti waki wa pacharu chapasi ndipu wangumupaska mphotu wati wapereka umoyu waki nge sembi. Wakutumika Paulo wangulemba kuti: “[Yesu] wati wasanirika mu kawonekedu ka munthu, wangujiyuyuwa, pakuŵa wakuvwiya mpaka ku nyifwa, nyifwa nayu yapa [“chimiti chakutombozgekiyapu,” NW]. Chifukwa chenicho so Chiuta wamutumphuskiya pachanya limu, ndipu wamupaska kwawanangwa zina lapachanya pa zina le losi; kuti mu zina laku Yesu gongonu losi ligwadiyengi, la ŵakuchanya, ndi la ŵapa charu, ndi la ŵakusi kwa charu, ndipu kuti lilimi losi lizomerezgi kuti Yesu Khristu ndi Mbuya, ku unkhankhu waku Chiuta.” (Ŵaf. 2:8-11) Yehova wakutumbika Yesu “muyaya” mwa kumuyuska kuti waje ndi umoyu wambula kufwa.—Ŵar. 6:9

7. Kumbi Chiuta wangumupaska wuli Yesu likondwa kuluska ‘anyaki’?

⁷ Ŵerengani Sumu 45:6, 7. Yehova wangusankha Yesu kuja Fumu ya Ufumu waki chifukwa chakuti wayanjanga urunji ndipuso wachitanga cha vinthu vo vatingi vilekengi kutumbika Awiski. Yehova wangupaska Yesu “likondwa” kuluska ‘anyaki,’ wo ŵenga mafumu nga ku Yuda ngo ngangutuwa mwaku  Davidi. Chifukwa wuli? Chakwamba, Yesu wangusankhika ndi Yehova mwenechu. Chifukwa chinyaki nchakuti Yehova wangumusankha kuti waje Fumu kweniso wa Sembi Mura. (Sumu 2:2; Ŵah. 5:5, 6) Kusazgiyapu pa fundu yeniyi, Yehova wangugwiriskiya nchitu mafuta cha pakumusankha kweni mzimu wakupaturika ndipu ufumu waku Yesu ngwapacharu chapasi cha kweni kuchanya.

8. Nchifukwa wuli tingakamba kuti ‘chitengu chaku’ Yesu nchaku Chiuta, nanga nchifukwa wuli tigomezga kuti muwusu waki ngwaurunji?

⁸ Yehova wangusankha Mwana waki, Yesu kuja Fumu ya Ufumu waki mu 1914. ‘Ndodu yaki ya ufumu ndi ndodu yaukongorekwa’, mwaviyo muwusu waki wazamuja wambula sankhu ndipuso waurunji. Iyu ngwakwenere kuwusa chifukwa ‘chitengu chaki’ nchaku Chiuta. Fundu iyi ying’anamuwa kuti Yehova ndiyu wakumusankha. Kusazgiyapu pa fundu yeniyi, chitengu chaku Yesu chazamuja “muyaya ndi muyaya.” Kumbi mukondwa cha kuteŵete Yehova mwakulongozgeka ndi Fumu yo iyu wakusankha?

9, 10. (a) Kumbi ndi zuŵanji po Khristu wangumangiriya lipanga laki muchiwunu, nanga wanguligwiriskiya wuli nchitu? (b) Kumbi Khristu wazamugwiriskiya wuli nchitu lipanga laki?

⁹ Ŵerengani Sumu 45:3. Yehova walunguchizga Fumu yo wakusankha kuti ‘yimangiriyi lipanga laki muchiwunu,’ kung’anamuwa kuzomerezga Yesu kuti wachiti nkhondu ndi ŵanthu wosi wo asuska muwusu waku Chiuta kweniso kuŵayeruzga. (Sumu 110:2) Chifukwa chakuti Khristu ndi Fumu ya Nkhondu yambula kuthereskeka, iyu wadanika kuti, “chilimbi.” M’chaka cha 1914, Yesu wangumangiriya lipanga laki ndipu wanguthereska Satana ndi angelu ŵaki ndi kuŵaponya pacharu chapasi.—Chiv. 12:7-9.

¹⁰ Uku kwenga ŵaka kwamba kupunda kwa Fumu yo yingukwera pakavalu. Yesu wakhumbika mbwenu kumaliza “kupunda” kwaki. (Chiv. 6:2) Yehova wanangengi vinthu vosi va m’charu chaku Satana ndipu Satana ndi mademoni ngaki azamuchita chechosi cha. Chinthu chakwamba cho chazamutuzgikapu ndi Babiloni Mukulu yo ndi visopa vosi vaboza. Yehova wagwiriskiyengi nchitu alongozgi andali kuti abwanganduwi “munthukazi mureŵi” mwenuyu. (Chiv. 17:16, 17) Pavuli paki, Fumu ya Nkhondu yazamulutirizga kubwanganduwa magulu nga ndali. Khristu yo wadanika so kuti “mungelu . . . wa chizenji” wazamumaliza kupunda kwaki mwakuponya Satana ndi mademoni ngaki muchizenji. (Chiv. 9:1, 11; 20:1-3) Tiyeni tiwoni mo buku la Sumu chaputala 45 lingukambiya limu vakuchitika venivi.

11. Nchifukwa wuli Khristu wakwera pakavalu?

¹¹ Ŵerengani Sumu 45:4. Fumu yichita nkhondu kuti yilondi vyaru pamwenga kuti ŵanthu aje akapolu ŵaki cha. Yichita nkhondu yaurunji ndi vilatu vamampha. Iyu yikwera pakavalu “chifukwa cha uneneska, [“kujiyuyuwa,” NW] ndi kuvikiriya urunji.” Yehova ndiyu ngwakwenere kuwusa chilengedu chosi. Uwu mbuneneska wo ukhumbika kuwuvikiriya. Pa nyengu yo Satana wangugaruka, wangulongo kuti Yehova ngwakwenere cha kuwusa. Kutuliya nyengu yeniyo, uneneska wenuwu waja uchisuskika ndi mademoni kweniso ŵanthu. Sonu nyengu yakwana yakuti Fumu yakusankhika ndi Yehova yikweri pakavalu kuti yilongo uneneska wakuti Yehova ndiyu ngwakwenere kuwusa chilengedu chosi.

12. Kumbi Fumu njakujiyuyuwa mu nthowa wuli?

¹² Fumu yikwera pakavalu chifukwa cha kujiyuyuwa. Nge Mwana waku Chiuta wakuwa yija, iyu nchakuwoniyapu chamampha  ukongwa pa nkhani yakujiyuyuwa kweniso kujithereska ku muwusu wa Awiski. (Yes. 50:4, 5; Yoh. 5:19) Mwaviyo, akumulondo ŵaki akugomezgeka nawu atenere kujithereska ku muwusu waku Yehova mu vakuchita vawu vosi. Ŵija ŵeniwo achita viyo, ndiwu azamuzomerezgeka kuzija ndi umoyu m’charu chifya cho Chiuta wakulayizga.—Zek. 14:16, 17.

13. Nchifukwa wuli Khristu wakwera pakavalu ‘chifukwa cha urunji’?

¹³ Khristu wakwera so pakavalu ‘chifukwa cha urunji.’ Iyu wavikiriya ‘urunji waku Chiuta’ wo umiya fundu zaku Yehova zo zititiwovya kuziŵa chamampha ndi chiheni. (Ŵar. 3:21; Mar. 32:4) Pakukamba za Fumu, Yesu Khristu, Yesaya wangukambiya limu kuti: “Karonga wakawusanga mu ukongorekwa.” (Yes. 32:1) Muwusu waku Yesu uzisengi “machanya ngafya” ndi “charu chifya” mwenimo “muja urunji.” (2 Pet. 3:13) Ŵanthu wosi wo azamuja mu charu chifya chenichi, azamukhumbika kukolerana ndi fundu zaku Yehova.—Yes. 11:1-5.

14. Kumbi janja lamaryi laku Khristu lichita wuli “vinthu vakofya”? (Wonani chithuzi cho che papeji 3.)

¹⁴ Po yikwera pakavalu, Fumu yamangiriya lipanga muchiwunu mwaki. (Sumu 45:3) Ndipu pavuli paki yitiligwiriskiya nchitu ndi janja laki lamaryi. Wakulemba sumu wangukambiya limu kuti: “Janja laku lakuryiya [lamaryi] likusambizi vinthu vakofya.” (Sumu 45:4) Asani Yesu Khristu wazikwera pakavalu kuziyeruzga ŵanthu pa Aramagedoni, wazamuchita “vinthu vakofya” kwa arwani ŵaki. Tiziŵa cha nthowa yo wazamugwiriskiya nchitu kuzinanga charu chiheni chaku Satana. Kweni venivi vazamuchitiska mantha ŵanthu a pacharu chapasi wo aleka kuvwiya vo Chiuta watcheŵeska kuti ajithereskengi ku muwusu waku Yesu. (Ŵerengani Sumu 2:11, 12.) Mu uchimi waki wakukwaskana ndi mazuŵa ngakumaliya, Yesu wangukamba kuti “ŵanthu amukufwa chipoyu ndi ofi [mantha], mu chilereze chaku vo vituza pacharu; chifukwa nthazi zakuchanya zisukunikengi.” Iyu wangukamba so kuti: “Ndipu sonu akamuwonanga Mwana wa munthu wakuza mumtambu ndi nthazi ndi unkhankhu ukuru.”—Luka 21:26, 27.

15, 16. Kumbi mbayani wo azamuwovya Khristu pa nkhondu?

¹⁵ Pakukamba zakuza kwa Fumu “ndi nthazi ndi unkhankhu ukuru” kuti yiziyeruzgi, buku la Chivumbuzi likamba kuti: “Ndinguwona kuchanya kwakujurika; ndipu, onani, kavalu wakuti tu, ndi mweniyo wangugara paki wanguzumbulika, Wamagomekezgeka ndi Muneneska; pakuti mu urunji wateruzga ndi waturwa. Ndipu maliŵanja ngakuchanya ngamulondonga pa akavalu atuŵa, akuvwarikika bafuta mutuŵa ndi wakutowa. Ndipu lituwa mumulomu waki lipanga lawuyi, kuti wakoso nalu mitundu: Ndipu wawusengi ŵanthu ndi ndodu yachisulu: Ndipu iyu wakanda nkhandu yamphereska yaukari wakandundu kaku Chiuta wanthazizosi.”—Chiv. 19:11, 14, 15.

¹⁶ Kumbi “maliŵanja” ngakuchanya ngo ngalondo Khristu kuti ngamuwovyi kuchita nkhondu ngamiya yani? Wati wamangiriya lipanga laki kakwamba kuti watuzgeku Satana ndi mademoni ngaki kuchanya, Yesu wenga limoza ndi “angelu ŵaki.” (Chiv. 12:7-9) Mwaviyo, mphakuvwika kukamba kuti pa nkhondu ya Aramagedoni, Khristu wazamugwiriskiya so nchitu angelu akupaturika. Kumbi wazamugwiriskiya nchitu angelu ŵenaŵa pe? Yesu wangulayizga abali ŵaki akusankhika kuti: “Yo wapunda, ndi yo wasunga nchitu zangu mpaka ku umari, kwaku iyu nkhapaskanga mtufu pa mitundu yo, ndipu wakayiwusanga ndi ndodu ya chisulu, uli ndimo viyaŵi  va dongu viphwanyikiya, nge ndimo ini nani ndarondere mazaza ku Ada.” (Chiv. 2:26, 27) Khristu wazamugwiriskiya so nchitu abali ŵaki akusankhika wo azamukuŵa kuti aluta kuchanya. Akhristu akusankhika azakumuwovya pa nyengu yo wazamuchita “vinthu vakofya” kuti wanangi mitundu ndi nthonga ya chisulu.

17. (a) Kumbi kavalu mutuŵa yo Khristu wakwerapu wamiyanji? (b) Nanga lipanga ndi uta vimiyanji?

¹⁷ Ŵerengani Sumu 45:5. Fumu yakwera pakavalu mutuŵa, kumiya nkhondu yamampha ndipuso ya urunji paurongo paku Yehova. (Chiv. 6:2; 19:11) Kusazgiyapu pa lipanga, iyu we so ndi uta. Tiŵerenga kuti: “Ndingulereska, awonani, kavalu mutuŵa, ndi wakugarapu paki wenga ndi uta; yingupaskika kwaku iyu ndumbu; ndipu wangutuliya kupunda kuti wapundengi.” Lipanga ndi uta vimiya nthowa yo Khristu wazamugwiriskiya nchitu pakunanga arwani ŵaki.

18. Kumbi “mivwi” yaku Khristu yazamulongo wuli kuti “njakuthwa”?

¹⁸ Mwakugwiriskiya nchitu ndakatulu, wakulemba sumu wangukambiya limu kuti ‘mivwi ya Fumu njakuthwa, yigwaza mumtima wa arwani ŵaki’ ndipu yichitiska ‘ŵanthu kuwa pasi paki.’ Ŵanthu anandi azamubayika pacharu chosi chapasi. Uchimi waku Yeremiya ungukambiya limu kuti: “Wo mbakubayika ndi Ambuya mu zuŵa lo akawonekanga kutuwa ku chigoti chimoza cha charu chapasi kwachifika ku chigoti chinyaki.” (Yer. 25:33) Uchimi unyaki wo uyanana ndi wenuwu ukamba kuti: “Ndinguwona mungelu yumoza wakuma mu [“lumwi,” NW]: ndipu wangukambura ndi mazu ngakuru, kuvinene viyuni vosi vo viwuluka mude mukati, ‘Zani kunu! Muwungani pamoza ku dyera likuru laku Chiuta, alinga kuti muryi nyama ya akaronga, nyama ya zinduna, nyama ya vinkhara, nyama ya akavalu ndi akukwerapu ŵawu, ndi nyama yaku wosi, anangwa ndi aŵanda, amana ndi ŵara.’”—Chiv. 19:17, 18.

19. Kumbi Khristu ‘wazamupunda’ wuli, nanga wazamumaliza wuli kupunda kwaki?

¹⁹ Khristu Yesu ‘wazamupunda,’ asani wazibwanganduwa charu chiheni chaku Satana. (Sumu 45:4) Iyu wazamumaliza kupunda mwakuponya Satana ndi mademoni ngaki muchizenji kwa Vyaka 1,000. (Chiv. 20:2, 3) Asani Diabolo ndi angelu ŵaki aziponyeka muchizenji, azamuja nge kuti ŵafwa. Ŵanthu wosi pacharu chapasi wazakuŵatimbanyizga so cha ndipu azakujithereska ku Fumu yawu. Charu chechendasinthi kuja paradayisu, azamuja ndi chifukwa chinyaki chakukondwe ndi Fumu yawu kweniso a 144,000. Tikambiskanengi vinthu vakukondwesa venivi m’nkhani yakulondopu.