ATEŴETI aku Chiuta achiwere ku Yerusalemu kutuwa ku Babiloni mu 537 B.C.E., Yehova wanguŵafipiya mtima chifukwa cha mo nthowa yenge. Mwaviyo, wanguŵakambiya kuti: “Rongosoni nthowa ya ŵanthu, zengani, zengani ŵagurwi, tuzganimu mya.” (Yes. 62:10) Ŵanaŵaniyani vo Ayuda anyaki anguchita. Yiwu angudanjiyapu kuchinozga nthowa, mwakuwundiya vinkhwawu ndipuso kuyaniska mo mwenga vimadunduma. Kuchita viyo kwatingi kuwovyengi abali ŵawu wo azanga kuvuli kuti ayendi umampha achiwere kwawu.

Venivi viyanana ŵaka ndi nthowa yo munthu wangayendamu kuti wafiski vo wakhumba kuchita kuti wateŵete Chiuta. Yehova wakhumba kuti ateŵeti ŵaki wosi ayendi m’nthowa yeniyi kwambula kutimbanyizgika. Mazu ngaki ngatitichiska kuti: “Uphwere nthowa ya marundi ngaku, po ndipu nthowa zaku zosi zikaziŵikanga nadi.” (Nthanthi 4:26) Kwali ndimwi m’nyamata pamwenga cha, mungagwiriskiya nchitu ulongozgi wakutuliya kwaku Chiuta wenuwu.

Panyaki mukuvwapu ŵanthu achikamba kuti: ‘Mwana uyu we ndi zeru.’ Kanandi anyamata aŵanaŵana luŵi, atuŵa ndi nthazi ndipuso akhumbisiska kuti vinthu viŵayende umampha. Bayibolo likamba mwakuvwika umampha kuti: “Unkhankhu wa anyamata ndi nthazi yawu.” (Nthanthi 20:29) Wampupuka yo wakhumba kuteŵete Yehova, asani wangagwiriskiya nchitu lusu ndi nthazi zaki, wangafiska kuchita viyo ndipuso wangasaniya likondwa lenechu.

Asani wampupuka we ndi zeru ŵanthu awona kuti wangachita vinthu vinandi m’charu. Kaboni wampupuka yo wakwera umampha mayesu, wangachichizgika ndi asambizi pamwenga ŵana anyaki a sukulu kuti  waluti ku yunivesite kuti waje ndi umoyu wamampha m’charu ichi. Ŵanthu anyaki angakambiya wampupuka yo we ndi lusu pa masaza kuti amuwovyengi kufika nangu patali. Kumbi venivi ndivu vitikuchitikiyani pamwenga muziŵa munyinu yo wakumana ndi suzgu lenili? Nchinthu wuli cho chingawovya Mkhristu kuti wasankhi vinthu mwazeru?

Fundu za m’Bayibolo zingawovya munthu kuti wayendi mu nthowa yamampha ukongwa pa umoyu waki. Lemba la Wakutaula 12:1 likamba kuti: “Kumbuka so Mulengi waku mu mazuŵa nga unyamata waku.” Kumbi imwi pamwenga wampupuka, mungachita wuli kuti ‘mukumbukengi Mulengi winu’?

Ŵanaŵaniyani vo vinguchitikiya Eric, a wa ku West Africa. Iyu wayanjanga kutchaya bola. Wati wafika vyaka 15, wangusankhika kuti wakatchayengi mu timu ya charu chaki. Ivi vatingi vichitiskengi kuti wakasambiziki kutchaya bola ku Europe, pavuli paki watingi wakatchayengi ku vyaru vinyaki. Kumbi ulongozgi wakuti ‘kumbuka Mulengi waku’ wanguwugwiriskiya nchitu? Nanga imwi pamwenga wampupuka, mungasambiranjipu?

Eric wangwamba kusambira Bayibolo ndi Akaboni aku Yehova weche pa sukulu. Iyu wangusambira kuti Mulengi waki watuzgengepu masuzgu ngo ŵanthu akumana nangu. Eric wanguziŵa kuti wakhumbikanga kugwiriskiya nchitu nyengu ndi nthazi zaki kuti wachiti khumbu laku Chiuta. Mwaviyo, wangukana kulutirizga kutchaya bola. M’malu mwaki, wangubatizika ndipu wangwamba kuteŵete Chiuta. Pati pajumpha nyengu, wanguja mteŵeti wakovya ndipu pavuli paki wangusere Sukulu ya Abali Ambula Kuto Yakusambiza Bayibolo.

Asani Eric wangulutirizga kutchaya bola watingi watchukengi kweniso wakhupukengi. Kweni iyu wanguziŵa fundu yauneneska ya m’Bayibolo yakuti: “Uromba wa musambasi ndi msumba waki wakukho, ndipu [“m’maŵanaŵanu ngaki,” NW] we uli nchimiti chitali chakumuvikiriya.” (Nthanthi 18:11) Chuma chingawoneka nge kuti chingavikiliya munthu kweni mbuneneska cha. Ŵanthu wo ajaliya kupenjapenja chuma “akoreka ndi soni zinandi” pamwenga kuti akumana ndi masuzgu nganandi.—1 Tim. 6:9, 10.

Nchakukondwesa kuti ampupuka anandi asaniya likondwa ndipuso aja mwakuvikilirika chifukwa chakuti achita uteŵeti wanyengu zosi. Eric watiti: “Sonu nde mu ‘timu’ likulu la ateŵeti anyengu zosi aku Yehova. Lenili ndi gulu lamampha ukongwa lo ndikhumbika kujamu, ndiwonga Yehova chifukwa chakundilongo nthowa yakusaniliya likondwa lenechu kweniso umoyu wamampha.”

Nanga imwi? M’malu mwakuchita vinthu va m’charu, munganozga ‘nthowa zinu’ mwakuchita upayiniya kuti mukondwesi Yehova.—Wonani bokosi lakuti “ Vitumbiku vo Ndatingi Ndivisaniyengi Cha ku Yunivesite.”

Banja linyaki lati laluta kuchiwona Nthambi ku United States, linguwona kuti abali ndi azichi wo ateŵete pa Beteli ŵenga akukondwa. Muzichi wangukamba kuti: “Pakwamba takhorwanga ndi vo tachitanga.” Pavuli paki, banja lo linguwona kuti lakhumbikanga kusazgiyaku nyengu ndi nthazi kuti lichitengi vinandi mu uteŵeti.

Banja lo, linguwona kuti vinthu vo lakhumbanga kusintha vawonekanga nge vakusuzga. Zuŵa linyaki lakambiskananga Lemba la Zuŵa, lo lingutuliya pa Yohane 8:31, po Yesu wakukamba kuti: “Asani mujaririyengi imwi mu mazu ngangu, nadidi mwe [“akusambira,” NW] ŵangu.” Lati laŵanaŵaniya lemba lenili lingukamba kuti: “Tiyanduwengi asani tingaja ndi umoyu wambula kukhumba vinandi.” Mwaviyo, linguguliska nyumba yawu yikulu, linguleka kuchita vinthu vinyaki vo valitimbanyizganga ndipuso lingusamiya ku mpingu unyaki ko kwakhumbikanga apharazgi anandi. Sonu lichita upayiniya, lizenga Nyumba za Ufumu ndipuso ligwira nchitu pa maunganu ngachigaŵa. Kumbi banja lenili lituvwa wuli? Yilu likukamba kuti: “Tikondwa ukongwa chifukwa chakuja ndi umoyu wambula kukhumba vinandi, tichita vo gulu laku Yehova lititichiska kuti tichitengi.”

Solomoni wakulemba kuti: “Masu ngaku ngalereski kwakudunjika kunthazi, ndipu kuwona kwaku kunyolokengi paurongo paku.” (Nthanthi 4:25) Kuti tileki kutimbanyizgika ndi vinthu vo vingatitondekeska kufiska vo tikhumba kuchita kuti titeŵete Chiuta, tikhumbika kulereska panthazi nge mo wachitiya wakwendesa galimotu.

Kumbi mungachitanji kuti muteŵete Chiuta? Mungachita umampha kwamba uteŵeti wa nyengu zosi.  Mukhoza kuchiteŵete mu mpingu wo we pafupi, wo ukhumbika apharazgi alusu kuti mukawuwovyi kupharazga chigaŵa chosi. Nyengu zinyaki mpingu ungaŵa ndi apharazgi anandi aphamphu kweni we ndi ŵara kweniso ateŵeti akovya amanavi. Kumbi mungaluta kuchiwovya mipingu yeniyi? Kambiskanani ndi wakuwonere dera asani mukhumba kuchita viyo. Asani mukhumba kuluta ku mipingu yakutali, fufuzani dankha kuti muziŵi mipingu yo yikhumbika chovyu. b

Tiyeni tiwere so pa nkhani yo yakonkhoskeka pa Yesaya 62:10. Ayuda anyaki atenere kuti angugwira mwaphamphu nchitu yakunozga nthowa kuti ŵanthu aku Chiuta akafiki umampha kwawu. Asani mutesesa kufiska vo mukhumba kuti muteŵete Chiuta, lutirizgani kuchita viyo. Iyu wakuwovyeningi kufiska vilatu vinu. Lutirizgani kupempha zeru kwaku Yehova kuti wakuwovyeni kumalana ndi vinthu vo vingakutondekeskani kumuteŵete. Pakumaliya, muwonengi mo Yehova wakuwovyiyeningi ‘kuphwere nthowa ya marundi nginu.’—Nthanthi 4:26.