KUPHARAZGA uthenga wamampha ndi nchitu yakukhumbika ukongwa yo yichitika pacharu chosi chapasi mazuŵa nganu. Nge ateŵeti aku Yehova, tiwona kuti ndi mwaŵi ukulu ukongwa kugwiraku nchitu yakupanga akusambira. Kweni nyengu zinyaki vija vakusuzga kuti apharazgi alutirizgi kupharazga mwaphamphu. Chifukwa wuli?

Apharazgi anyaki akambiskana ndi ŵanthu amanavi asani apharazga kunyumba ndi nyumba chifukwa chakuti ŵanthu anandi asanirika cha panyumba. Ndipu asani aŵasaniya, akana uthenga wa Ufumu wo apinga pamwenga atiŵatchingiya. Kweni apharazgi anyaki asuzgika maŵanaŵanu chifukwa ŵe ndi chigaŵa chikulu chakupharazgaku ndipu ŵanthu avwisiya ukongwa uthenga wauneneska. Ivi vitiŵafipiska mtima chifukwa chakuti angafiska cha kupharazgiya ŵanthu wosi. Ndipu anyaki apharazga kwa vyaka vinandi kweni umari utuza cha.

Tilekengi cha kukumana ndi masuzgu ngo ngangachitiska kuti tileki kupharazga mwaphamphu. Tikamba viyo chifukwa chakuti charu cho tijamu chiwusika ndi “muheni yo,” Satana Diabolo. Mwaviyo, tisuzgikengi mbwenu kupharazgiya ŵanthu uthenga wamampha.​—1 Yoh. 5:19.

Tingakayikanga cha kuti Yehova watiwovyengi kulimbana ndi masuzgu ngo tingakumana nangu asani tipharazga uthenga wamampha. Kumbi mungachita wuli kuti mulutirizgi kupharazga mwaphamphu? Tiyeni tiwoni vinthu vinyaki vo vingatovya.

Ŵanthu masauzandi nganandi abatizika chaka chechosi ndipu aja Akaboni aku Yehova. Asani mwabatizika pambula kuswera yapa, mungasambira vinandi kwa Akaboni wo apharazga kwa vyaka vinandi. Ndipu asani mwapharazga kwa vyaka vinandi, mungachita umampha kovya apharazgi asonu.

Yesu waziŵanga kuti akusambira ŵaki akhumbikanga kusambizika kuti apharazgengi  mwalusu ndipu wanguŵasambiza mo angapharazgiya. (Luka 8:1) Mwakuyana ŵaka, mazuŵa nganu tikhumbika so kovya apharazgi asonu kuti apharazgengi mwalusu.

Tikhumbika cha kuŵanaŵana kuti mupharazgi wasonu wangaziŵa kupharazga mwalusu asani wasere mu uteŵeti. Iyu wakhumbika munthu munyaki wachanju kuti wamusambizengi. Mupharazgi walusu wakhumbika kusambiza mupharazgi wasonu mo (1) wanganozgeke ndi kuyesere vo wamukambiskana ndi munthu, (2) wangakambiskiyana ndi ŵanthu, (3) wangagaŵiya magazini, (4) wangaweriyaku ku ŵanthu akunweka, ndipuso (5) mo wangachitiskiya sambiru la Bayibolo. Mupharazgi wasonu wangayamba kupharazga mwalusu asani wawona ndi kuchita vo mupharazgi walusu wachita mu uteŵeti. (Luka 6:40) Mupharazgi wasonu wangakondwa ukongwa kuziŵa kuti munthu yo wayenda nayu wangamuwovya asani pakhumbika chovyu. Iyu wangachiskika so ukongwa asani titimulumba ndipuso kumupaska masachizgu nga mo wangapharazgiya.​—Wak. 4:9, 10.

Chinanga kuti tikhumbika kukambiskana ndi mwenechu wanyumba asani tipharazga kweni tikhumbika so kukambiskana ndi munthu yo tipharazga nayu. Tingaluwanga cha kuti Yesu wangutuma akusambira ŵaki “ŵaŵi ŵaŵi” kuti akapharazgi. (Luka 10:1) Kupharazgiya limoza, kwaŵawovyanga kuti achiskanengi. Uwu mbukaboni wakuti kupharazga ndi anyidu kutitipaska mwaŵi wakuchiskana.​—Ŵar. 1:12.

Kumbi mungakambiskananji? Mungakambiskana vinthu vakukondweska vo vingukuchitikiyani mu uteŵeti. Mungakambiskana fundu zakukondweska zo mungusaniya muchisambira Bayibolo pakumwija. Kweniso fundu yinyaki yo munguvwa pa maunganu. Asani nkhakwamba kwenda ndi munthu munyaki, mungamufumba mo wakusambiriya uneneska. Nchinthu wuli cho chingumuwovya kusimikizga kuti gulu lidu lilongozgeka nadi ndi Yehova? Kumbi ndi maudindu pamwenga mauteŵeti nanga ngo wapaskika? Kumbi ndi vinthu nivi vo vamuchitikiyapu? Namwi mungamukambiya vo vakuchitikiyani pa umoyu winu. Mwaviyo, kwenda ndi anyidu mu uteŵeti kutitipaska mwaŵi wakulutirizga ‘kuzengana,’ kaya ŵanthu avwisiya pamwenga cha.​—1 Ŵat. 5:11.

Kusambira Bayibolo mwaphamphu kungatiwovya kuti tilutirizgi kupharazga mwaphamphu. “Muŵanda wakugomezgeka yo ndi wakuwamu” watuza mabuku ngo ngaja ndi nkhani zakupambanapambana zo tingasambira. (Mat. 24:45) Tiyeni tiwoni  nkhani yimoza yo tingasambira pakutija. Nkhani yaki njakuti: Nchifukwa wuli nchitu yakupharazga Ufumu njakukhumbika ukongwa? Bokosi la mutu wakuti, “Nchifukwa Wuli Mutenere Kulutirizga Kupharazga Mwaphamphu?” litiwovyengi kuziŵa vifukwa vaki.

Kuŵanaŵaniya fundu za m’bokosi lenili kungatovya kuti tilutirizgi kupharazga mwaphamphu. Asani musambira Bayibolo pakumwija, yesani kufufuza vifukwa vinyaki va m’Malemba vo mukhumbikiya kupharazga mwaphamphu. Pavuli paki, lungurukani pa vifukwa vo ndi Malemba ngaki. Kuchita ivi kungakuwovyani kuti mulutirizgi kupharazga mwaphamphu.

Kanandi gulu laku Yehova lititipasa masachizgu ngo ngatitovya kuti tisazgiyeku lusu lidu mu uteŵeti. Mwakuyeruzgiyapu, kusazgapu pakupharazga kunyumba ndi nyumba, pe so nthowa zinyaki zakupharazgiya nge kulemba kalata, kupharazga pa foni, mumisewu, m’malu ngo musanirika ŵanthu anandi, kumalu nga malonda ndipuso upharazgi wa mwamwaŵi. Kweniso tinganozga kuti tikapharazgi ku chigaŵa cho chipharazgika kaŵikaŵi cha pamwenga kulivi Akaboni.

Kumbi mwe akunozgeka kugwiriskiya nchitu masachizgu ngenanga? Apharazgi anandi wo ayesapu kugwiriskiya nchitu masachizgu yanga ayanduwa ukongwa. Tiyeni tiwoni vakuwoniyapu vitatu.

Mzichi munyaki zina laki April wangugwiriskiya nchitu sachizgu la mu Uteŵeti Widu wa Ufumu wo ukamba mo tingayambisiya sambiru la Bayibolo. Iyu wangupempha ŵanthu atatu wo wagwira nawu nchitu kuti wayambi kusambira nawu Bayibolo. April wanguzizwa ndipuso wangukondwa  ukongwa kuwona kuti wosi anguzomera kusambira Bayibolo ndipu pavuli paki angwamba kuwungana.

Gulu lititichiska so kuti tipenjengi ŵanthu wo angayanja nkhani zinyaki za m’magazini ngidu. Ivi ndivu wakuwonere dera munyaki ku United States wanguchita. Iyu wanguŵanaŵana kuluta kuchigaŵa chinyaki kuti wakagaŵiyi Galamukani! yo yenga ndi nkhani yakukwaskana ndi matayala ku mabwana ngosi nga sitolu za matayala. Iyu ndi muwolu waki angugaŵiya so Galamukani! yo yenga ndi nkhani yakuti, “Understanding Your Doctor” mu maofesi nga madokotala ngakujumpha 100 mdera lawu. Iyu wangukamba kuti maulendu yanga ngawovya ŵanthu kuziŵa nchitu yidu yakupharazga ndipuso mabuku ngidu. Ndipu wakuwonere dera mwenuyu ndi muwolu waki angusaniya ŵanthu anandi wo akhumbikanga kuweriyaku.

Mzichi munyaki zina laki Judy wangulembe kalata ku likulu lidu. Iyu wanguwonga ukongwa chifukwa cha masachizgu ngo gulu lingupereka ngakukwaskana ndi upharazgi wa pa foni. Iyu wangukamba kuti ama ŵaki a vyaka 86 wo atamanga, kanandi apharazgiyanga ŵanthu pa foni. Ivi vinguchitiska kuti ayambi kusambira Bayibolo ndi ama anyaki avyaka 92.

Kukamba uneneska, masachizgu ngo ngasanirika m’mabuku ngidu ngatovya ukongwa. Mwaviyo, tingachita umampha ukongwa kungagwiriskiya nchitu chifukwa ngangatovya kulutirizga kuja akukondwa ndi kupharazga mwaphamphu.

Kugaŵiya mabuku nganandi, kuchitiska masambiru nga Bayibolo nganandi ndipuso kovya ŵanthu anandi kuti aje ateŵeti aku Yehova ndivu vilongo cha kuti uteŵeti widu utitiyende umampha. Ŵanaŵaniyani nkhani yaku Nowa. Kupatuwaku ŵanthu a m’banja laki, kumbi iyu wangovya ŵanthu alinga kuti asopengi Yehova? Kweni waziŵika kuti wenga mupharazgi walusu. Chinthu chakukhumbika ukongwa nchakuti titeŵete Yehova mwakugomezgeka.​—1 Ŵakor. 4:2.

Apharazgi anandi a Ufumu asankha kuja ndi vilatu vo angafiska kuti akondwengi ndi nchitu yakupharazga. Kumbi asankha vilatu nivi? Mungasaniya vilatu vinyaki m’bokosi la mutu wakuti, “Jani ndi Vilatu vo Mungafiska.”

Murombengi kwaku Yehova kuti wakuwovyeni kuti uteŵeti winu ukuyendiyeningi umampha. Asani mwafiska vilatu vinu, mukondwengi ukongwa chifukwa chakuziŵa kuti mupharazga uthenga wamampha mwaphamphu.

Mbuneneska kuti mungasuzgika kupharazga uthenga wamampha. Kweni pe vinthu vinyaki vo mungachita kuti mupharazgengi uthenga wa Ufumu mwaphamphu. Muyesesengi kukambiskana ndi munthu yo mupharazga nayu mu uteŵeti, kusambira Bayibolo mwaphamphu, kugwiriskiya nchitu masachizgu ngo gulu lititipasa ndipuso kuja ndi vilatu vo mungafiska. Ndipu chakuzirwa ukongwa nchakuti Chiuta watipaska nchitu yapade ukongwa yakupharazga uthenga wamampha nge Akaboni ŵaki. (Yes. 43:10) Kukamba uneneska, mukondwengi ukongwa asani mulutirizgengi kupharazga mwaphamphu!