Pempheru—Kumbi Tikhumbika Kupemphera Kwaku Yani?
KUMBI mapempheru ngosi ngaluta kumalu ngamoza kwambula kuphwere kanthu kuti munthu wapemphera kwaku yani? Mazuŵa nganu ŵanthu anandi awona viyo. Anandi wo awona kuti visopa vosi vikhumbika kuchitiya vinthu limoza kweniso kuti vosi vakuzomerezeka chinanga kuti visambiza vakupambana, awona kuti fundu yeniyi njauneneska. Kweni fundu iyi njauneneska nadi?
Bayibolu lisambiza kuti mapempheru nga ŵanthu anandi ngalanda. Mu nyengu yo Bayibolu lalembekiyanga, penga ŵanthu anandi wo apempheranga kwa angoza. Kweni Chiuta waŵatcheŵesanga kaŵikaŵi ŵanthu kuti aleki kuchita venivi. Mwakuyeruzgiyapu, lemba la Salimo 115:4-6 likamba kuti: “[Angoza] makutu ŵe nangu, kweni angavwa cha.” Yapa fundu yivwika umampha limu. Sonu kumbi munthu wangachitiya dala dakalaka lakupemphera kwaku chiuta yo wavwengi cha?
Mu Bayibolu mwe chakuwoniyapu chamampha cho chisimikiziya fundu iyi. Eliya yo wenga mchimi wauneneska wangukambiya achimi aku Bala kuti apempheri kwaku chiuta wawu ndipu pavuli paki nayu wapempherengi kwaku Chiuta waki. Eliya wangukamba kuti Chiuta wauneneska ndiyu wamukengi kweni chiuta waboza wamukengi cha. Sonu achimi aku Bala angupemphera kwanyengu yitali kweniso mwaphamphu, mpaka kubongo ukongwa. Kweni angumukika cha! Bayibolu likamba kuti: “Pengavi yo wangumuka; pengavi yo wanguŵikaku maŵanaŵanu.” (1 Mafumu 18:29) Nanga Eliya vinthu vingumuyende wuli?
Eliya wati wamala waka kupemphera, Chiuta waki wangumumuka nyengu yeniyo mwakutumiza motu kutuwa kuchanya wo ungupiriza sembi yaki. Kumbi pempheru laki lingupambana wuli ndi la achimi aku Bala? Pempheru laku Eliya lo likulembeka pa 1 Mafumu 18:36, 37 lingatiwovya kumuka fumbu ili. Pempheru laki lenga lifupi ukongwa, mu Chiheberi chakwambiriya, pempheru ili lenga ndi mazu pafufupi 30. Kweni mu mazu ngamanavi ngenanga, Eliya wanguzumbuwa katatu zina chayilu laku Chiuta lakuti Yehova.
Zina lakuti Bala ling’anamuwa kuti “Mweneku” pamwenga kuti “Mbuya.” Bala wenga chiuta wa Akanani, kweniso penga achiuta anandi amanaamana wo aziŵikanga ndi zina ili. Kweni zina lakuti Yehova ndapade ukongwa, iyu pe ndiyu waziŵika ndi zina ili. Chiuta yo waziŵika kuti Yehova wangukambiya ŵanthu ŵaki kuti: “Ini ndini Yehova. Lenili ndilu zina langu; Unkhankhu wangu nditiwupereka ku munthu weyosi cha.”—Yesaya 42:8.
Kumbi muwona kuti pempheru laku Eliya kweniso mapempheru nga achimi aku Bala nganguluta kumalu ngamoza? Pakusopa Bala, ŵanthu achitanga ureŵi kweniso awotchanga ŵanthu nge sembi. Kweni Yehova wangukambiya ŵanthu ŵaki Ayisirayeli kuti angachitanga cha vinthu vabwekabweka venivi pakumusopa. Sonu ŵanaŵaniyani fundu iyi: Kumbi mungakondwa kuziŵa kuti kalata yo mungulembe bwezi linu lo mutilitumbika ukongwa, yaperekeka ku munthu munyaki yo zina laki lipambana kutali ndi zina la mubwezi winu, ndipu munthu yo we ndi mbiri yakuti wachita vinthu vabwekabweka vo bwezi linu litinkha? Tikayika ukongwa kuti mungakondwa!
Vo Eliya wanguchita ndi achimi aku Bala vingulongo kuti mapempheru ngosi ngaluta kumalu ngamoza cha.
Asani mupemphera kwaku Yehova, ndikuti mupemphera ku Mlengi, Wusewu wa mitundu yosi ya ŵanthu. * Nyengu yinyaki mchimi Yesaya wachipemphera wangukamba kuti: “Yimwi, Yehova ndimwi Awusefwi.” (Yesaya 63:16) Chiuta mwenuyu ndiyu so Yesu Khristu nayu wakambanga wachikambiya akusambira ŵaki kuti: “Ndikwere kwa Ada wo Mbawusemwi, ndipuso kwaku Chiuta wangu yo ndi Chiuta winu.” (Yohane 20:17) Yehova ndiyu Awisi aku Yesu. Yesu wapempheranga kwaku Chiuta mwenuyu ndipu wangukambiya akusambira ŵaki kuti nawu apempherengi kwaku Chiuta mwenuyu.—Mateyu 6:9.
Kumbi Bayibolu lizomereza kuti tingapemphera kwaku Yesu, Mariya, ŵanthu atuŵa mtima pamwenga kwa angelu? Awa, tikhumbika kupemphera kwaku Yehova pe. Wonani vifukwa viŵi ivi vo tikambiya viyo. Chakwamba, kupemphera ndi nthowa yimoza yakusope, ndipu Bayibolu likamba kuti tikhumbika kusopa Yehova pe. (Ekisodo 20:5) Chachiŵi, Bayibolu lilongo kuti ndi Yehova pe yo waziŵika ndi zina laudindu lakuti “Wakuvwa pempheru.” (Salimo 65:2) Chinanga kuti Yehova wapereka maudindu nganyaki ku ŵanthu anyaki, kweni udindu wakuvwisiya mapempheru wakupaskapu weyosi cha. Iyu ndi Chiuta yo wakulayizga kuti wavwengi mapempheru ngidu.
Mwaviyo, asani mukhumba kuti Chiuta wavwengi mapempheru nginu, nyengu zosi mukumbukengi fundu ya mu Malemba iyi: “Weyosi yo wadaniya pa zina laku Yehova wazamutaskika.” (Machitidu 2:21) Kweni kumbi Yehova watuvwa mapempheru ngosi? Pamwenga pe chinthu chinyaki cho tikhumbika kuchita kuti Yehova wavwengi mapempheru ngidu?
^ ndimi 9 Midawuku yinyaki ya visopa yikamba kuti nkhunanga kuzumbuwa zina laku Chiuta, chinanga mungaŵa mupempheru. Kweni zina ili lisanirika maulendu pafufupi 7,000 mumipukutu yakwambiriya ya Bayibolu, ndipu nganandi mwa malu ngenanga ndi mapempheru ndipuso sumu za ateŵeti akugomezgeka aku Yehova.