Uchimi 1. Vidilirisi

“Kwazamuchitika vidilirisi vikuluvikulu.”—LUKA 21:11.

● Mwana munyaki wachaka chimoza ndi myezi yinayi zina laki Winnie, wangupona nyumba yati yamuwiya ku Haiti chifukwa cha chidilirisi. Atolankhani wo ŵenga kumalu ngo kunguchitika chidilirisi angumuvwa wachiliya chapasipasi. Chinanga kuti mwana uyu wangupona, kweni apapi ŵaki angufwa pa ngozi yeniyi.

KUMBI MAUKABONI NGALONGONJI? Chidilirisi chikulu chanthazi zakukwana 7.0 chati chachitika ku Haiti mu January 2010, ŵanthu akujumpha 300,000 angufwa. Kweniso chinguchitiska kuti ŵanthu anyaki 1.3 miliyoni asoŵi pakuja. Mbuneneska kuti chidilirisi cha ku Haiti chenga chanthazi ukongwa, kweni muvyaru vinyaki namu muchitika so vidilirisi. Vidilirisi vikuluvikulu pafufupi 18 vinguchitika pacharu kutuwa mu April 2009 mpaka mu April 2010.

VO ŴANTHU ANANDI AKAMBA PAKUSUSKA UCHIMI UWU Mazuŵa nganu kuchitika vidilirisi vinandi cha. Mwakupambana ndi vyaka vakuvuli, isi mazuŵa nganu tiziŵa liŵi asani kwachitika vidilirisi chifukwa cha vipangizu va mazuŵa nganu, leka tiwona nge vichitika pafupipafupi.

KUMBI FUNDU YENIYI NJAKUVWIKA? Ŵanaŵaniyani fundu iyi: Bayibolu lididimizga ukongwa chiŵerengeru cha vidilirisi vo vichitikengi mu mazuŵa ngakumaliya cha. Kweni likamba kuti “vidilirisi vikuluvikulu” vazamuchitika “mumalu ngakupambanapambana,” ndipu venivi vazamulongo nyengu yapade.—Mariko 13:8; Luka 21:11.

KUMBI YIMWI MUWONA WULI? Kumbi mazuŵa nganu kuchitika nadi vidilirisi vikuluvikulu nge mo Bayibolu likukambiya limu?

Vidilirisi pakuvija vingawoneka nge mbukaboni wakukwana cha wakuti te mu mazuŵa ngakumaliya. Kweni ngumoza mwa mauchimi ngo ngafiskika ngo ngasimikiziya fundu yeniyi. Tiyeni tiwoni uchimi unyaki wachiŵi.

[Fundu yikulu]

“Isi [asayansi] titividana kuti vidilirisi vikuluvikulu. Kweni ŵanthu wosi atividana kuti vidilirisi vakofya.”—KEN HUDNUT, U.S. GEOLOGICAL SURVEY.

[Mazu ngakukonkhoska chithuzi]

© William Daniels/Panos Pictures