Chiuta walivi munthukazi yo tingakamba kuti wakubaliyana nayu mwana. Iyu ndi Mulengi wa vinthu vosi vamoyu. Ŵanthu akulengeka ndi mijalidu yinyaki yaku Chiuta. Ndichu chifukwa chaki munthu wakwamba Adamu, yo Chiuta wakulenga, wadanika kuti “mwana waku Chiuta.” Mwakuyanana ŵaka, Yesu wadanika kuti “Mwana waku Chiuta” chifukwa wakulengeka ndi mijalidu yakuyanana ndi ya Awiski.—Ŵerengani Luka 3:38; Yohane 1:14, 49.

Chiuta wangulenga Yesu wechendalengi Adamu. Ndipu wati walenga Yesu, pavuli paki wangumugwiriskikiya nchitu kuti wapangi vinthu vosi kusazgapu angelu. Ndichu chifukwa chaki Bayibolo likamba kuti, Yesu ndiyu “wakupapika danga wa ulengi wosi.”—Ŵerengani Ŵakolose 1:15, 16.

Yesu wenga mungelu kuchanya wechendawi ku Betelehemu. Nyengu yati yakwana, Chiuta wangusamusa umoyu waku Yesu kutuliya kuchanya kuziwuŵika mu moyu mwaku Mariya ndi chilatu chakuti wachiti kubalika nge munthu.—Ŵerengani Luka 1:30-32; Yohane 6:38; 8:23.

Nchifukwa wuli Chiuta wangukhumba kuti Yesu wachiti kubalika nge munthu pacharu chapasi? Kumbi Yesu wangufiska udindu wapade nuwu? Mungasaniya kwamuka kwa mafumbu ngenanga m’Bayibolo ndipu kukuwovyeningi kuti muvwisisi umampha ndipuso muziŵi vo Chiuta ndi Yesu akuchitiyani.