1, 2. Nchifukwa wuli ŵanthu anyaki atanja kurya nkhuyu?

 ŴANTHU anandi atanja kurya nkhuyu [vipasu va chimiti cha mkuyu] ziŵisi pamwenga zakumila. Ayuda a munyengu yakali awonanga kuti nkhuyu zenga zakuzirwa ukongwa. (Nah. 3:12; Luka 13:6-9) Nkhuyu zenizi, nchakurya chakukhumbika ukongwa mu liŵavu ndipu anyaki akamba kuti zitovya kuti mtima upopengi ndopa umampha.

² Nyengu yinyaki, Yehova wanguyeruzgiya nkhuyu ndi mtima. Chiuta wakonkhoskanga mo nkhuyu zitovye mu liŵavu cha. Iyu wakambanga mwakuyeruzgiya. Vo iyu wangukamba kuziya mwa mchimi Yeremiya, vingawovya mtima winu kweniso mtima wa ŵanthu wo mutiŵayanja. Po tikambiskana vo iyu wangukamba, ŵanaŵaniyani vo Akhristu angasambirapu.

3. Kumbi nkhuyu zo zikambika pa Yeremiya chaputala 24 zimiyanji?

³ Tiyeni tikambiskani vo Chiuta wangukamba munyengu yaku Yeremiya pa nkhani ya nkhuyu. M’ma 617 B.C.E., Ayuda achitanga vinthu vo Chiuta wavitinkhanga. Iyu wanguŵakambiya vo vatingi viŵachitikiyengi munthazi, ndipu wanguyeruzgiya mitundu yiŵi ya nkhuyu, “zamampha ukongwa” ndi “ziheni ukongwa.” (Ŵerengani Yeremiya 24:1-3.) Nkhuyu ziheni ukongwa zamiyanga Fumu Zedekiya ndi anyaki wo ayanananga nayu wo ŵenga pafupi kuti asuzgiki ndi Fumu Nebukadanezara ndipuso asilikali ŵaki. Kumbi Ezekiele, Danyele ndi anyaki ŵatatu kweniso Ayuda anyaki wo atingi atolekiyengi ku Babiloni, ŵenga so nkhuyu ziheni? Yiwu ŵenga nkhuyu zamampha. Anyaki mwa ŵanthu ŵenaŵa, atingi aweriyengi so ku Yerusalemu kuti akazengi msumba wo ndipuso nyumba yakusopiyamu. Pati pajumpha nyengu, vinguchitika nadi.​—Yer. 24:8-10; 25:11, 12; 29:10.

4. Kumbi tichiskika wuli ndi vo Chiuta wakukamba vakukwaskana ndi nkhuyu zamampha?

⁴ Pa nkhani ya ŵanthu wo amiya nkhuyu zamampha, Yehova wangukamba kuti: “Ndikaŵapaskanga mtima wakuziŵa  kuti ini ndini [Yehova]; ndipu ŵakaŵanga ŵanthu ŵangu.” (Yer. 24:7) Nchinthu chakuchiska ukongwa kuti lemba lenili ndilu patuwa mutu wa nkhani yeniyi. Chiuta ngwakukhumbisiska kupaska weyosi “mtima wakuziŵa.” Pa nkhani iyi “mtima,” ukoliyana ndi jalidu la munthu. Kukamba uneneska mukhumbika kuja ndi mtima wakuziŵa Chiuta kuti muje mu gulu la ŵanthu ŵaki. Kuti timuziŵi Chiuta, titenere kusambira ndi kugwiriskiya nchitu Mazu ngaki, tikhumbika kulapa ndi kung’anamuka, kupatuliya umoyu widu kwaku Chiuta ndipuso kubatizika mu zina la Ada, Mwana ndi mzimu wakupaturika. (Mat. 28:19, 20; Mac. 3:19) Vingachitika kuti mukuchita kali vinthu vosi ivi panyaki muŵanaŵana kuvichita pamwenga muwungana ŵaka ndi Akaboni aku Yehova.

5. Kumbi uthenga waku Yeremiya chakwamba walutanga ku ŵanthu naŵa?

⁵ Kaya tikuchita kali vinthu vosi vo tazumbuwa, tikhumbika kuŵanaŵaniya za jalidu lidu. Tingaziŵa chifukwa cho tikhumbikiya kuchita viyo kutuliya pa vo Yeremiya wakulemba pa nkhani ya mtima. Machaputala nganyaki nga m’buku la Yeremiya, ngakambanga za mitundu yo yengapu pa nyengu yo, ukongwa mtundu wa Ayuda wo unguwusika ndi mafumu ngankhondi ngakupambanapambana. (Yer. 1:15, 16) Uthenga waku Yeremiya chakwamba wakambanga za anthurumi, anthukazi ndipuso ŵana wo ŵenga paubwezi ndi Yehova. Ambuyawu ŵa ŵanthu ŵenaŵa ndiwu angujipereka kuti ajengi paubwezi ndi Chiuta. (Chit. 19:3-8) Ndipu munyengu yaku Yeremiya, Ayuda anguzomerezga kuti ŵenga paubwezi ndi Chiuta. Yiwu angukamba kuti: “Tituza kwinu; pakuti imwi ndimwi Ambuya Chiuta widu.” (Yer. 3:22) Kumbi muŵanaŵana kuti mitima yawu yenga yamampha?

6. Nchifukwa wuli tikhumbika kuziŵa vo Chiuta wakukamba pa nkhani ya mtima?

⁶ Mazuŵa nganu madokotala ngagwiriskiya nchitu makina ngo awone mo mtima uliri ndipuso mo ugwiriya nchitu, kweni Yehova wachita vinandi kuluska venivi nge mo wanguchitiya munyengu yaku Yeremiya. Chiuta watiwuziŵa umampha mtima ndipu tiwona venivi mu mazu ngaki ngakuti: ‘Mtima ngwakupusika kuruska vinthu vosi, ndipu nguheni ukongwa; njani wangauziŵa? Ini Ambuya [Yehova] . . . nditesa [ndisanda] mtima, kupaska ku munthu weyosi kwakulingana ndi nthowa zaki, kwakulingana ndi chipasi cha machitidu ngaki.’ (Yer. 17:9, 10) Mtima wo Yehova ‘watesa’ ndi mtima chayiwu cha wo kwa vyaka 70 pamwenga 80 ututa nyengu pafufupi 3 biliyoni. M’malu mwaki Yehova wakamba za mtima wakuyeruzgiya. “Mtima” wenuwu ndi wunthu wa mkati, wo umiya vo munthu wakhumba, waŵanaŵana, jalidu ndipuso vilatu vaki. Namwiso mwe nawu mtima waviyo. Chiuta wakhoza kuwusanda, namwiso mukhoza kuchita viyo.

7. Kumbi Yeremiya wanguyikonkhoska wuli mitima ya Ayuda anandi a munyengu yaki?

⁷ Asani tikhumba kuti Yehova wasandi mtima widu titenere kujifumba kuti, ‘Kumbi ndi mtima wuli wo Ayuda anandi ŵenga nawu munyengu yaku Yeremiya?’ Kuti timuki fumbu lenili, ŵanaŵaniyani mazu ngakusuzga kungavwisa ngo Yeremiya wangugwiriskiya nchitu ngakuti: ‘Nyumba yosi yaku Yisraele njambula kuchinjika mu mtima.’ Yeremiya wang’anamuwanga kuchinjika chayiku cha ko anthurumi achiyuda achitanga, ndichu chifukwa chaki wangukamba kuti: ‘Ehe, mazuŵa ngakazanga, atiti Ambuya, penipo ndikalanganga wosi ŵeniwo ŵakuchinjika kweni mbambula kuchinjika.’ Ivi vilongo kuti, Ayuda wo anguchinjika nawuso ŵenga ‘ambula kuchinjika mu mtima.’ (Yer. 9:25, 26) Kumbi venivi vang’anamuwanganji?

8, 9. Kumbi Ayuda anandi akhumbikanga kuchitanji nayu mitima yawu?

⁸ Vo Chiuta wangukambiya Ayuda kuti achiti, vititilongo vo mazu ngakuti ‘ambula kuchinjika mu mtima’ ngang’anamuwa. Iyu wanguŵakambiya kuti: ‘Tuzgani khungu la mitima yinu, mwa ŵanthu ŵa ku Yuda ndi ŵakuja mu  Yerusalemu, vinu ukari wangu ungaluta . . . chifukwa cha uheni wa machitidu nginu.’ Nchifukwa wuli Ayuda achitanga vinthu viheni? Mtima wawu wenga uheni. (Ŵerengani Marko 7:20-23.) Kuziya mwaku Yeremiya, Chiuta wangukamba cho chinguchitiska Ayuda kuti achitengi vinthu viheni. Mtima wawu ungugaruka. Maŵanaŵanu ndipuso vo akhumbanga, vamukondwesanga cha Chiuta. (Ŵerengani Yeremiya 5:23, 24; 7:24-26.) Chiuta wanguŵakambiya kuti: ‘Jichinjiyeni ku Ambuya tuzgani khungu la mitima yinu.’​—Yer. 4:4; 18:11, 12.

⁹ Ndichu chifukwa chaki Ayuda a munyengu yaku Yeremiya akhumbikanga kutowesa mitima yawu pamwenga kuti, ‘kuchinjika mu mtima’ ndipu venivi ndivu so ŵanthu a munyengu yaku Mosese anguchita. (Mar. 10:16; 30:6) ‘Kutuzga khungu la mitima yawu,’ kwang’anamuwanga kusiya mijalidu yiheni yo yachitiskanga mitima yawu kuti yije yiheni ndipuso kuti aŵanaŵanengi, akhumbengi vinthu vo vikoliyanaku cha ndi vo Chiuta wakhumbanga.​—Mac. 7:51.

10. Kumbi tikhumbika kuchitanji nge mo Davidi wanguchitiya?

¹⁰ Tiwonga kuti Chiuta watitiwovya kuziŵa mtima wakuyeruzgiya! Ateŵeti anyaki aku Chiuta atijifumba kuti, ‘Nchifukwa wuli nkhani yeniyi yikwaska so Akaboni aku Yehova mazuŵa nganu?’ Ivi ving’anamuwa kuti Akhristu anandi achita vinthu viheni pamwenga ŵe mu gulu la “nkhuyu ziheni” cha, nge mo ŵenge Ayuda anandi munyengu yakali. Mwakupambana ndi Ayuda, ateŵeti aku Chiuta mazuŵa nganu atijipereka ndipuso achita vinthu vamampha. Chinanga kuti ve viyo, tikhumbika kuŵanaŵaniya vo Davidi wanguromba kwaku Yehova kuti: ‘Ndipenjeni, a Chiuta, ziŵani mtima wangu; ndeseni, ndipu bowozgani maŵanaŵanu ngangu. Wonanimu vinu kalimu kaheni mwaku ini.’​—Sumu 17:3; 139:23, 24.

11, 12. (a) Nchifukwa wuli weyosi wakhumbika kusanda mtima waki? (b) Nchinthu wuli cho Chiuta wachita cha?

¹¹ Yehova wakhumba kuti weyosi waje nayu paubwezi kweniso walutirizgi kuchita vinthu vamampha. Po wakonkhoskanga za ŵanthu amampha, Yeremiya wangukamba kuti: “Ambuya mwe ŵa maŵanja, imwi mutesa ŵarunji, imwi muwona mtima ndi zeru [“sana,” NW].” (Yer. 20:12) Yehova Wanthazi Zosi wasanda mtima chinanga ngwa ŵanthu arunji, mwaviyo, tosi tikhumbika kujisanda mwauneneska. (Ŵerengani Sumu 11:5.) Kuchita venivi, kutiwovyengi kuziŵa asani maŵanaŵanu ngidu ndipuso vo tikhumba vikhoza kunanga mtima widu. Asani taziŵa vo vingananga mtima widu, tikhumbika kuvituzgamu. Kuchita venivi kwe nge kutowesa mtima. Kumbi ndi mijalidu niyi yiheni yo yingasanirika mu mtima mwidu? Kumbi tingachita wuli kuti tisinthi mijalidu yeniyo tayisaniya?​—Yer. 4:4.

¹² Pe chinthu chinyaki chakukhumbika kuchiziŵa: Tikhumbika cha kuti Yehova ndiyu wachiti kutichichizga kuti tisinthi. Iyu wangukamba za ŵanthu wo amiya “nkhuyu zamampha” kuti ‘ŵaŵapaskengi mtima wakumuziŵa.’ Mwaviyo, Yehova wakukambapu cha kuti wachitengi kuŵachichizga kuti asinthi mtima wawu. Yiwu akhumbikanga kuti aje ndi khumbu lakuja ndi mtima wamampha, wo watingi ulongongi kuti aziŵa Chiuta. Nasiso tikhumbika kuchita viyo.

13, 14. Kumbi mtima ungamunanga wuli Mkhristu?

 ¹³ Yesu wakukamba kuti: “Mu mtima mutuliya maŵanaŵanu ngaheni, zimbanda, maureŵi, mauyaya, maunkhungu, visimisimi vitesi [vaboza], matuka.” (Mat. 15:19) Kukamba uneneska, asani mtima wa mubali wamuchitiska kuti wachiti ureŵi pamwenga chigololu kweni pavuli paki walapa cha, iyu wangayanjika so cha ndi Chiuta mpaka muyaya. Ivi vingachitikiya so munthu yo wechendachitepu uheni nge wenuwu kweni wazomerezga kuja ndi maŵanaŵanu ngaheni ngenanga mu mtima mwaki. (Ŵerengani Mateyu 5:27, 28.) Ndichu chifukwa chaki kujisanda kungatiwovya. Asani musanda mtima winu, kumbi musaniya kuti mwe ndi maŵanaŵanu nga ureŵi ngo Chiuta watingazomerezga cha ndipu ngakhumbika kutuzgikamu mwaku imwi?

¹⁴ Vingachitika kuti mubali ‘wechendabayepu’ munthu kweni wakukwiyiya Mkhristu munyaki mu mtima mwaki mpaka kumutinkha. (Ŵal. 19:17) Kumbi wayesesengi kuti waleki kuja ndi maŵanaŵanu ngaviyo ngo ngangamuchitiska kuti waje ndi mtima uheni?​—Mat. 5:21, 22.

15, 16. (a) Perekani chakuyeruzgiyapu cha mo Mkhristu wangalongore kuti ‘ngwambula kuchinjika mu mtima’ waki. (b) Nchifukwa wuli Yehova wangakondwa cha ndi munthu ‘wambula kuchinjika mu mtima’ waki?

¹⁵ Te ndi mwaŵi kuti Akhristu anandi alivi ‘suzgu mu mtima mwawu.’ Yesu wangukamba so za “maŵanaŵanu ngaheni.” Ivi ving’anamuwa mo munthu wawone vinthu pamwenga jalidu liheni, lo lingananga umoyu wa munthu. Mwakuyeruzgiyapu, munthu wangatimbanyizgika pa nkhani yakuja wakugomezgeka ku ŵanthu a m’banja laki. Mbuneneska kuti Akhristu akhumbika cha kuyanana ndi ŵanthu wo aleka kwanja anyawu m’mazuŵa ngakumaliya nganu kweni akhumbika kuja ndi “chanju cha kawi.” (Ŵar. 1:31) Chinanga kuti vingaŵa viyo, tikhoza kulongo chanju chenichi mwakujumpha mwesu. Ŵanthu anandi akamba kuti “ubali umala cha.” Nyengu zinyaki asani mubali wawu waguŵiskana ndi munthu munyaki, angayesesa kuja ku rwandi la mubali wawu. Ŵanaŵaniyani vo azichi aku Dina anguchita ŵati aja ndi maŵanaŵanu nganthazi ngenanga. (Chiy. 34:13, 25-30) Ŵanaŵaniyani so vo vinguchitiska Absalomu kuti wabayi Amunone. (2 Sam. 13:1-30) Wosi anguchita venivi chifukwa cha “maŵanaŵanu ngaheni.”

¹⁶ Mbuneneska kuti Akhristu auneneska abaya anyawu cha. Nyengu zinyaki angatinkha ukongwa mubali pamwenga muzichi yo wakupambana maŵanaŵanu ndi mubali wawu pamwenga yo atimuŵanaŵaniya kuti wakuchita venivi. Yiwu angakana kucheza nayu ndipuso nyengu zinyaki angakana kumuwoyva. (Ŵah. 13:1, 2) Ziŵani kuti kutinkha abali ŵidu  ndipuso kukana kucheza nawu ndi nkhani yimana cha, chifukwa vilongo kuti tilivi chanju. Yehova, yo wasanda mitima wangawona kuti ‘tikuchinjika cha mu mitima.’ (Yer. 9:25, 26) Kumbukani kuti Yehova wanguchiska Ayuda kuti: ‘Tuzgani khungu la mitima yinu.’​—Yer. 4:4.

17. Kumbi kopa Yehova kungatiwovya wuli kuti tije ndi mtima wakuvwiya?

¹⁷ Asani musanda mtima winu wakuyeruzgiya ndipu mwawona kuti nyengu yinyaki ungulongo kuti unguvwiya cha ulongozgi waku Yehova, ndikuti wenga ‘wambula kuchinjika.’ Vingachitika kuti panyaki munguwopa ŵanthu, mwakhumbanga kutchuka, kukhupuka, mwenga ndi mtima wakugarukiya ndipuso wakujithemba. Asani ndi viyo, ndimwi pe cha mukujapu ndi maŵanaŵanu ngenanga. (Yer. 7:24; 11:8) Yeremiya wangulemba kuti, Ayuda ambula kugomezgeka a munyengu yaki, ŵenga ndi “mtima unononu ndi wakugaruka.” Iyu wangukamba so kuti: “Ŵakamba cha mu mitima yawu, ‘Tiyeni topengi Ambuya Chiuta widu, mweniyo wapaska vuwa munyengu yaki.’” (Yer. 5:23, 24) Mazu ngenanga, ngalongo kuti kuziŵa Yehova ndipuso kumuwopa ukongwa kungatiwovya kuti ‘tituzgi khungu la mitima’ yidu. Ndipu venivi, vingachitiska kuti tije ndi mtima wakuvwiya vo Chiuta wakhumba kuti tichiti.

18. Kumbi Yehova wanguŵalayizganji Akhristu a mu phanganu lifya?

¹⁸ Asani tiyesesa kuchita vo Yehova wakhumba, iyu watipaskengi ‘mtima wakumuziŵa.’ Venivi ndivu wakulayizga Akhristu akusankhika mu phanganu lifya kuti: “Ndikaŵikanga dangu mukati mwawu, ndipu ndikalilembanga pa mitima yawu; ndipu ini ndikaŵanga Chiuta wawu, ndipu yiwu ŵakaŵanga ŵanthu ŵangu.” Pa nkhani yakumuziŵa, iyu wangulutirizga kukamba kuti: “Ndipu munthu kuti warunguchizgengi so mwanasi waki nanga ndi mwana munyaki cha kuti, ‘Ziŵa Ambuya [Yehova],’ pakuti wosi ŵakandiziŵanga, kutuwa ku mumana mpaka ku mura, . . . pakuti ndikagowokiyanga mautimbanizi ngawu, ndipu uheni wawu kuti ndikawukumbukanga so cha.”​—Yer. 31:31-34. a

19. Akhristu auneneska ŵe ndi chilindizga wuli?

¹⁹ Kaya mulindizga kuziyanduwa kwamuyaya mu phanganu lifya kuchanya pamwenga kuzilonde charu chapasi, mukhumbika kumuziŵa Yehova ndipuso kuja mu gulu la ŵanthu ŵaki. Kuti mukalonde vitumbiku venivi, mutenere kugowokereka maubudi nginu kuporote mu sembi yaku Khristu. Kuziŵa fundu yeniyi, kukuwovyeningi kugowoke ŵanthu anyaki, chinanga kuti akukuchitiyani vinthu viheni mwakuti kungaŵa kwakusuzga kuŵagowoke. Asani mukhumbisiska kutuzgamu jalidu liheni mu mtima mwinu, ndikuti mujengi ndi mtima wamampha ndipu mulongongi kuti mukhumba ŵaka kuteŵete Yehova cha kweni mukhumba kumuziŵa ukongwa. Mujengi nge ŵanthu wo Yehova wangukamba kuziya mwaku Yeremiya kuti: “Mukandisaniyanga asani mundipenjengi ndi mtima winu wosi. Ndikasanirikanga ndi imwi.”​—Yer. 29:13, 14.