ŴANAŴANIYANI kuti mwe ndi mubwezi winu yo mutimuyanja ukongwa kweni wachita vinthu vinyaki vo mutivivwisisa cha. Ŵanthu anyaki akoliyanaku navu cha vo wachita, akamba kuti we ndi vilatu vamampha cha kweniso ngwankhaza. Kumbi mungathaŵiliya kuzomerezga vo ŵanthu akamba pamwenga mulindizgengi kuti muvwi uneneska wa nkhani yo, kutuliya kwa mubwezi winu? Asani iyu pengavi pa nyengu yo nkhani iyi yakambikiyanga, kumbi muzizipizgengi mwakuleka kumuyeruzga mwaliŵi kuti wazikonkhoski dankha mo nkhani yo yenge?

Mwechendamuki vo ŵanthu akamba, mukhumbika dankha kuziŵa vinandi vakukwaskana ndi mubwezi winu. Mungajifumba kuti, ‘Kumbi nditimuziŵa umampha munyangu mwenuyu, nanga nchifukwa wuli nditumwanja?’ Mwakuyanana ŵaka, techendayeruzgi Chiuta kuti ngwankhaza, tikhumbika kuŵanaŵaniya so mafumbu ngenanga.

Nyengu zinyaki kungaŵa kwakusuzga kuvwisisa vinthu vo Chiuta wakuchita ndipuso mungazizwa ndi vo iyu wanguzomerezga kuti vichitiki. Pe ŵanthu anandi wo akukambiyeningi kuti Chiuta ngwankhaza ndipu akuchiskeningi kuti namwi so muŵanaŵanengi nge yiwu. Kumbi muzomerezgengi kuti Chiuta ndi muheni mwechendaziŵi vinandi? Kwamuka kwinu kuthembengi pa mo mutimuziŵiya Chiuta. Mujifumbengi kuti, ‘Kumbi ndi vinthu nivi vamampha vo Chiuta watindichitiya?’

Asani mwakumana ndi masuzgu pa umoyu winu, mungayeseka kukamba kuti Chiuta ngwamampha cha. Ŵanaŵanani dankha kwa kanyengu kamanavi. Kumbi Chiuta ndiyu watikuzisiyani masuzgu pa umoyu winu pamwenga ndiyu watikuzisiyani vitumbiku? Nge mo tawone, Satana ndiyu “muwusi wa charu ichi.” (Yohane 12:31) Mwaviyo, Satana ndiyu wachitiska masuzgu nganandi ndi vinthu vambula urunji m’charu ichi. Kuleka kufikapu kwidu kweniso vakuchitika vamabuchibuchi vichitiska masuzgu nganandi ngo tikumana nangu.

Nanga Chiuta waja wachichitanji? Ŵanaŵaniyani vo Bayibolo likamba. Ilu likamba kuti: Chiuta ndiyu ‘wakukwata kuchanya ndi charu chapasi,’ iyu wakupanga maliŵavu ngidu ndipu wakutipanga ‘mwakofya ndipuso mwakuziziswa,’ kweniso likamba kuti, Yehova ndi ‘Chiuta yo mu manja mwaki . . . mwe mvuchi widu.’ (Sumu 124:8; 139:14; Danyele 5: 23) Kumbi mazu ngenanga ngang’anamuwanji?

Mazu yanga ngang’anamuwa kuti tituta kweniso te ndi umoyu chifukwa cha Mulengi widu. (Machitidu 17:28) Mwaviyo, umoyu widu, kutowa kwa chilengedu, kwanjana ndi anyidu, kunowa kwa vakurya, kuziŵa kuti munthu watikwaska, kuvwa ndipuso kuvwa kununkhila kwa vinthu, vosi ivi vawanangwa vakutuliya kwaku Chiuta. (Yakobe 1:17) Kumbi mungazomerezga cha kuti vinthu vosi ivi vichitiska kuti iyu waje Mubwezi widu yo tikhumbika kumutumbika ndipuso kumugomezga?

Kukamba uneneska, mungawona kuti nkhwakusuzga kugomezga Chiuta. Panyaki muwona kuti muziŵa vinandi cha vakukwaskana ndi iyu kuti mumugomezgi. Venivi vakuvwika. Chifukwa chakuti nkhani izi tazikonkhoska mwakudumuwa, tingakonkhoska vifukwa vosi cha vo vichitiska anyaki kukamba kuti Chiuta ngwankhaza. Kweni mukhumbika kuchita phamphu kuti mumuziŵi umampha. * Te ndi chigomezgu kuti asani muchitengi viyo, ndikuti muziŵengi uneneska wakukwaskana ndi Chiuta. Kumbi iyu ngwankhaza? Chiuta ngwankhaza cha kweni iyu “nchanju.”—1 Yohane 4:8.