Mungamukalipiyanga cha Yehova
‘Mungamukalipiyanga’ Cha Yehova
“Penipo ubeleŵeza [uzeleza] wa munthu utole nthowa yaki ku phasulu, mtima waki ukalipiya Ambuya.”—NTHANTHI 19:3.
KUMBI MUNGAMUKA WULI?
Nchinthu wuli cho chingachitiska munthu ‘kukalipiya’ Yehova?
Ndi fundu zinkhondi nizi zo zingatiwovya kuti tileki kukalipiya Chiuta?
Kumbi titenere kukumbukanji asani takumana ndi masuzgu?
1, 2. Nchifukwa wuli tikhumbika cha kumba mulandu Yehova kuti ndiyu wachitiska masuzgu ngo ŵanthu akumana nangu? Konkhoskani.
TIYERUZGIYI kuti mwaja ndi muwolu winu mwachimangu kwa vyaka vinandi. Zuŵa linyaki mwati mwafika panyumba musaniya kuti vinthu ve mbwee munyumba. Muwona kuti mipandu yabwangandulika, mbali zaphwanyika kweniso pasi pakumbikakumbika. Munyumba mwinu mo mwenga mwakutowa muwoneka nge ku chiza. Kumbi mungayamba kukalipa ndi kukamba kuti, “Nchifukwa wuli muwolu wangu wachita venivi?” Pamwenga muyambengi dankha kufumba kuti, “Ndiyani wachita venivi?” Mwambula kukayika, mungafumba fumbu lachiŵi. Nchifukwa wuli tikamba viyo? Chifukwa chakuti muziŵa kuti muwolu winu wakwanjiwa wangachita cha vinthu viheni viyo.
2 Mazuŵa nganu tiwona kuti charu chanangikiya limu ndi mpweya uheni, viwawa ndipuso mijalidu yiheni. Nge akusambira Bayibolo tiziŵa kuti ndi Yehova cha yo wachitiska masuzgu ngosi yanga. Iyu wangulenga charu ichi kuti chije paradayisu. (Chiy. 2:8, 15) Yehova ndi Chiuta wachanju. (1 Yoh. 4:8) Vo tisambira m’Malemba, vititiwovya kuziŵa chifukwa cho masuzgu nganandi ngachitikiya pacharu chapasi. Satana Diabolo ndiyu wachitiska masuzgu chifukwa ndi “fumu ya charu chinu.”—Yoh. 14:30; 2 Ŵakor. 4:4.
3. Kumbi maŵanaŵanu ngidu ngangatimbanyizgika wuli?
3 Chinanga kuti ve viyo, masuzgu ngosi ngo tikumana nangu wachitiska ndi Satana pe cha. Tikamba viyo chifukwa chakuti vo taŵeni tinangiska ndivu vizisa masuzgu nganyaki. (Ŵerengani Marangu 32:4-6.) Tingazomerezga kuti fundu yeniyi njauneneska chifukwa chakuti te ambula kufikapu ndipu tikhoza kutimbanyizgika maŵanaŵanu, vo vingachitiska kuti tiyendi munthowa yo tingakumana ndi masuzgu. (Nthanthi 14:12) Kumbi venivi vingachitika wuli? Asani takumana ndi masuzgu, tingayamba kumba mulandu Yehova m’malu mwakumba Satana pamwenga kujimba taŵesi. Mwaviyo, tingafika mpaka ‘pakukalipiya Ambuya.’—Nthanthi 19:3.
4, 5. Kumbi Mkhristu ‘wangamukalipiya’ wuli Yehova?
4 Vingachitika nadi kuti tiyambi ‘kukalipiya Ambuya’ kweni tingayanduwa chechosi cha asani tingachita viyo. (Yes. 41:11) Wakulemba ndakatulu munyaki wakukamba kuti: “Janja linu ndifupi ukongwa, mungapumana cha ndi Chiuta.” Asani tikamba vinthu vakususkana ndi Yehova tingaluta patali cha. Lemba la Nthanthi 19:3 likamba kuti uzeleza wa munthu “utole nthowa yaki ku phasulu, mtima waki ukalipiya Ambuya.” Mbuneneska kuti munthu wangakalipiya Chiuta mumtima mwaki kweni nkhwakusuzga kuliziŵa jalidu lenili. Munthu wakhoza kusungiya Yehova vifukwa ndipu venivi vingachitiska kuti waleki kuwungana pamwenga waleki kovya vo gulu likunozga pa nkhani yakusopa.
5 Nchinthu wuli chingachitiska kuti ‘tikalipiyi’ Yehova? Kumbi tingakhwecha wuli chiŵana chaviyo? Tikhumbika kuziŵa kwamuka kwa mafumbu ngenanga kuti tilutirizgi kuja pa ubwezi ndi Yehova Chiuta.
NCHINTHU WULI CHINGACHITISKA KUTI ‘TIKALIPIYI’ YEHOVA?
6, 7. Nchifukwa wuli Ayisraele mu nyengu yaku Mosese angwamba kudinginyika mwakususkana ndi Yehova?
6 Nchinthu wuli chingachitiska kuti mteŵeti waku Yehova wakugomezgeka wayambi kumba mulandu Yehova mumtima mwaki? Tiyeni tikambiskani fundu zinkhondi ndipuso tiwoni vakuwoniyapu va m’Bayibolo, vo vilongo mo anyaki anguwiliya m’chiŵana chenichi.—1 Ŵakor. 10:11, 12.
7 Vinthu viheni vo ŵanthu anyaki angakamba. (Ŵerengani Marangu 1:26-28.) Yehova wanguzisa miliri 10 mwakuziziswa pa mtundu wankhaza wa Aegipiti, Ayisraele angutaskika ku uŵanda ndipu pavuli paki Yehova wangubaya Farao ndi asilikali ŵaki mu Nyanja Yiyera. (Chit. 12:29-32, 51; 14:29-31; Sumu 136:15) Ŵanthu aku Chiuta alindizganga kusere M’charu Chakulayizgika kweni pa nyengu yakusuzga yeniyi, Ayisraele angwamba kudinginyika mwakususkana ndi Yehova. Nchinthu wuli chinguchitiska kuti aŵevi chivwanu? Yiwu anguchita mantha chifukwa cha vinthu viheni vo anguvwa kutuliya ku ŵanthu 10, wo anguluta kuchizonda charu. (Maŵ. 14:1-4) Venivi vinguchitiska kuti Ayisraele anandi aleki kusere ‘m’charu chamampha.’ (Mar. 1:34, 35) Kumbi vinthu viheni vo ŵanthu anyaki akamba, vititichitiska kuti nyengu zinyaki tiŵevi chivwanu ndi kwamba kudinginyika chifukwa cha mo Yehova wachitiya nasi vinthu?
8. Nchinthu wuli chinguchitiska ŵanthu aku Chiuta mu nyengu yaku Yesaya kuti ayambi kumba mulandu Yehova chifukwa cha masuzgu ngo angukumana nangu?
8 Masuzgu ngakhoza kutiguŵiska (Ŵerengani Yesaya 8:21, 22.) Mu nyengu yaku Yesaya, Ayuda angukumana ndi masuzgu nganandi. Yiwu anguzungulirika ndi arwani ŵawu, ŵenga ndi nja chifukwa chakurya chenga chakusoŵa. Suzgu likulu ukongwa lenga lakuti pengavi munthu wakuŵasambiza mazu ngaku Chiuta. (Amosi 8:11) M’malu mwakulindizga Yehova kuti waŵawovyi kumalana ndi masuzgu ngenanga, angwamba ‘kutemba’ fumu yawu ndipuso Chiuta wawu. Kukamba uneneska, ambanga Yehova mulandu chifukwa cha masuzgu ngawu. Asani takumana ndi masuzgu, kumbi tingakamba mumtima mwidu kuti, ‘Yehova wangulekiyanji kundiwovya pa nyengu yo ndakumananga ndi masuzgu?’
9. Nchifukwa wuli mu nyengu yaku Ezekiele, Ayisraele angwamba kuwona vinthu mwambula kwenere?
9 Tiziŵa cha chifukwa cho vinthu vinyaki vichitikiya. Mu nyengu yaku Ezekiele, Ayisraele anyaki awonanga nge kuti nthowa zaku Yehova zenga ‘zakurunjika cha.’ (Ezek. 18:29) Yiwu ayeruzganga Chiuta mwakugwiriskiya nchitu fundu zawu chinanga kuti aziŵanga cha vifukwa vosi vo Yehova wachitiyanga vinthu vinyaki. Asani tivwisa cha nkhani yinyaki ya m’Bayibolo pamwenga mo vinthu vinyaki vichitikiya pa umoyu widu, tikhumbika cha kuŵanaŵana mumtima mwidu kuti nthowa zaku Yehova zamampha cha ndipuso ‘zakurunjika cha.’—Jobu 35:2.
10. Kumbi munthu wangalondo wuli maŵanaŵanu ngaheni ngaku Adamu?
10 Tingatondeka kuzomerezga asani tabuda pamwenga tanangiska. Munthu wakwamba Adamu wangumba mulandu Chiuta chifukwa cha ubudi waki. (Chiy. 3:12) Chinanga kuti Adamu wangubuda mwadala ndipuso waziŵanga vo vatingi vichitikengi asani wanguleka kuvwiya dangu laku Chiuta, iyu wangumba mbwenu mulandu Yehova. Iyu wangukamba kuti Yehova wangumupaska munthukazi muheni. Kwambiya nyengu yeniyo ŵanthu anyaki alondo Adamu, yiwu atumba mulandu Chiuta asani anangiska vinthu. Mwaviyo, tingachita umampha kujifumba kuti, ‘Asani ndaguŵa chifukwa cha vinthu vo ndanangiska, kumbi nditamba kuwona kuti fundu zaku Yehova zakusuzga kuzilondo?’
11. Kumbi tisambiranjipu pa nkhani yaku Yona?
11 Tingayamba kujiŵanaŵaniya mwakujumpha mwesu. M’chimi Yona wangukwiya chifukwa Yehova wanguchitiya lisungu ŵanthu a ku Nineve. (Yona 4:1-3) Nchifukwa wuli wanguchita viyo? Iyu wawopanga kuti wazamuchita soni asani msumba wazileka kubwangandulika. Yona wanguchita lisungu cha ndi ŵanthu a ku Nineve wo angulapa m’malu mwaki wanguŵanaŵaniya ukongwa mbiri yaki. Nasiso tingayamba kujiŵanaŵaniya ukongwa ndipu tingafika ‘pakukalipiya’ Yehova chifukwa chakuwona nge kuti waswera kunanga charu. Asani taja tichipharazga kwa vyaka vinandi vo Bayibolo likamba kuti zuŵa laku Yehova le pafupi, tikhumbika cha kukwiyiya Yehova chifukwa cha ŵanthu wo atitinyoza.—2 Pet. 3:3, 4, 9.
VO TINGACHITA KUTI TILEKI ‘KUKALIPIYA’ YEHOVA
12, 13. Asani mumtima mwidu tayamba kususka vinthu vinyaki vo Yehova wachita, tikhumbika kuchitanji?
12 Kumbi tingachita wuli asani mtima widu wakubuda utamba kususka vinthu vinyaki vo Yehova wachita? Kumbukani kuti kuchita viyo nkhuŵavi zeru. Tiyeni tikambiskani fundu zinkhondi zo zingatiwovya kuti tileki kumba mulandu Yehova asani taguŵa.
13 Jani pa ubwezi wakukho ndi Yehova. Tingakhwecha jalidu lakukalipiya Yehova lo tingaŵa nalu chifukwa chakuleka kufikapu asani tilutirizga kuja pa ubwezi wakukho ndi iyu. (Ŵerengani Nthanthi 3:5, 6.) Tikhumbika kugomezga Yehova ndipuso tikhumbika cha kujiwona nge azeru pamwenga kujiŵanaŵaniya mwakujumpha mwesu. (Nthanthi 3:7; Wak. 7:16) Venivi vitiwovyengi kuti tileki kumba mulandu Yehova asani vinthu viheni vachitika.
14, 15. Nchinthu wuli cho chingatiwovya kuti vinthu viheni vo anyaki angakamba vileki kutitimbanyizga?
14 Mungazomerezganga cha kuti vinthu viheni vo anyaki akamba vikutimbanyizgeni. Mu nyengu yaku Mosese, Ayisraele ŵenga ndi chifukwa chakuvwika chakugomezge kuti Yehova watingi waŵawovyengi kusere m’Charu Chakulayizgika. (Sumu 78:43-53) Yiwu ŵati ŵavwa vinthu viheni vo azondi 10 ambula kugomezgeka angukamba, anguluwa “nthazi zaki zikuru.” (Sumu 78:42) Asani tilunguruka vo Yehova wachita kweniso tikumbuka vinthu vosi vamampha vo watichitiya, vitiwovyengi kuti ubwezi widu uje wakukho ndi iyu. Kuchita venivi kuchitiskengi kuti maŵanaŵanu ngaheni nga ŵanthu anyaki ngaleki kutipambaniska ndi Yehova.—Sumu 77:11, 12.
15 Nchinthu wuli chingachitika asani titinkha abali ndi azichi anyaki? Ubwezi widu ndi Yehova ungatimbanyizgika. (1 Yoh. 4:20) Ayisraele ŵati ayamba kususka Aroni chifukwa chakusankhika kwaki, Yehova wanguwona kuti asuskanga Iyu. (Maŵ. 17:10) Mwakuyanana ŵaka asani tingayamba kususkana ndi ŵanthu wo Yehova watiŵagwiriskiya nchitu kuti alongozgengi gulu laki pacharu chapasi ndikuti tisuska Yehova.—Ŵah. 13:7, 17.
16, 17. Kumbi tikhumbika kukumbukanji asani takumana ndi masuzgu?
16 Kumbukani kuti ndi Yehova cha yo wachitiska kuti tisuzgikengi. Mu nyengu yaku Yesaya, Ayisraele anguleka kuja pa ubwezi ndi Yehova, kweni iyu wangukhumbisiska kuŵawovya. (Yes. 1:16-19) Chinanga tingakumana ndi masuzgu wuli, tichiskika asani tiziŵa kuti Yehova watitiphwere ndipuso ngwakukhumbisiska kutiwovya. (1 Pet. 5:7) Iyu walayizga kuti watipaskengi nthazi zo tikhumbika kuti tilutirizgi kukunthiyapu.—1 Ŵakor. 10:13.
17 Asani tisuzgika chifukwa cha vinthu vinyaki vambula urunji nge mo wanguchitiya munthu wakugomezgeka Jobu, tikhumbika kukumbuka kuti ndi Yehova cha yo wachitiska vinthu venivo. Yehova watanja urunji kweni watinkha vinthu vambula urunji. (Sumu 33:5) Nge mo wangukambiya Elihu mubwezi waku Jobu, titenere kuzomerezga kuti: “Chiŵi kutali ndi Chiuta kuti iyu wachiti ubendezi, ndipu chiŵi kutali ndi Wanthazizosi kuti wabudi.” (Jobu 34:10) Yehova ndiyu cha yo wachitiska masuzgu m’malu mwaki watitipaska “mpasku wosi wamampha ndi chawezi chosi chizirima.”—Yak. 1:13, 17.
18, 19. Nchifukwa wuli tikhumbika cha kukayikiya Yehova? Konkhoskani.
18 Mungamukayikiyanga cha Yehova. Chiuta ngwakufikapu ndipu maŵanaŵanu ngaki ngapachanya kuluska ngidu. (Yes. 55:8, 9) Mwaviyo, asani ndisi akujiyuyuwa ndipuso akujithereska tizomerezgengi kuti zeru zidu zakupereŵere. (Ŵar. 9:20) Kanandi tiziŵa vosi cha vakukwaskana ndi nkhani yo yachitika. Vingachitika kuti vo ntharika iyi yikonkhoska vikukuchitikiyanipu: “Munthu wakwamba kukonkhoska nkhani watachiwoneka kuti waneneska, mpaka po munyaki waziya kuzimususka.”—Nthanthi 18:17, New International Version.
19 Mwakuyeruzgiyapu, asani munyidu yo titimugomezga wachita chinthu chinyaki cho pakwamba titichivwisisa cha pamwenga tiwona kuti nchambula kwenere, kumbi tithaŵiriyengi kumumba mulandu kuti wachita ubudi? Awa. Panyaki tiŵanaŵanengi kuti tiziŵa vosi cha vakukwaskana ndi nkhani yo. Asani tichita viyo ndi munyidu wambula kufikapu, kumbi tikhumbika cha kuŵagomezga ukongwa Awuskefwi akuchanya, wo nthowa zawu ndipuso maŵanaŵanu ngawu ngapachanya kuluska ngidu?
20, 21. Nchifukwa wuli tikhumbika cha kumba mulandu Yehova chifukwa cha masuzgu ngo tikumana nangu?
20 Mukumbukengi chifukwa cho tisuzgikiya. Nchifukwa wuli tikhumbika kukumbuka chifukwa cho tisuzgikiya? Chifukwa chakuti masuzgu nganyaki titingachitiska taŵeni. Asani ndi viyo, tikhumbika kuzomerezga fundu yeniyi. (Ŵag. 6:7) Mungayesanga cha kumba mulandu Yehova chifukwa cha masuzgu ngo mwakumana nangu. Nchifukwa wuli kuchita viyo nkhuŵavi zeru? Ŵanaŵaniyani chakuyeruzgiyapu ichi: Nchinthu wuli chingachitika asani dilayiva watchimbizga ukongwa galimotu pa gulayi? Iyu wakhoza kuchita ngozi. Kumbi muŵanaŵana kuti dilayiva wangamba mulandu wo akupanga galimotu chifukwa cha ngozi yo yingachitika? Awa. Mwakuyanana ŵaka, Yehova wakutilenga ndi wanangwa wakusankha tija vinthu. Iyu wakutipaska so ulongozgi wa mo tingasankhiya vinthu mwazeru. Mwaviyo, tikhumbika cha kumba mulandu Mulengi widu chifukwa cha vo tanangiska.
21 Mbuneneska kuti ndi masuzgu ngosi cha ngo tikumana nangu chifukwa cha vo tanangiska ndipuso vo tachita. Vinthu vinyaki vichitika chifukwa cha “nyengu ndipuso vinthu vamabuchibuchi.” (Wak. 9:11, NW) Chakukhumbika ukongwa nchakuti, tingaluwanga cha fundu yakuti Satana Diabolo ndiyu wachitiska vinthu viheni. (1 Yoh. 5:19; Chiv. 12:9) Iyu ndiyu murwani, Yehova cha!—1 Pet. 5:8.
YESESANI KUTI UBWEZI WINU NDI YEHOVA ULEKI KUMALA
22, 23. Kumbi tikhumbika kukumbukanji asani taguŵa chifukwa cha masuzgu ngo takumana nangu?
22 Asani mukumana ndi masuzgu, kumbukani vo Yoswa ndi Kalebe anguchita. Mwakupambana ndi azondi 10, ŵanthu akugomezgeka ŵaŵi ŵenaŵa angukamba vinthu vamampha. (Maŵ. 14:6-9) Yiwu ŵenga ndi chivwanu mwaku Yehova kweni anguyinga mubozwa kwa vyaka 40 limoza ndi Ayisraele wosi. Kumbi Yoswa ndi Kalebe angudinginyika pamwenga kukwiya kuti Yehova wanguchita vinthu mwambula urunji? Awa. Yiwu angugomezga Yehova ndipu wanguŵatumbika. Chinanga kuti Ayisraele anandi angufwiya mubozwa, pakumaliya Yoswa ndi Kalebe angusere m’Charu Chakulayizgika. (Maŵ. 14:30) Mwakuyanana ŵaka, tazamulonde vitumbiku vaku Yehova asani tileka “kulopwa” pakuchita khumbu laki.—Ŵag. 6:9; Ŵah. 6:10.
23 Asani mwaguŵa chifukwa cha masuzgu, vo anyaki anangiska ndipuso vo imwi munangiska, kumbi mukhumbika kuchitanji? Ŵanaŵaniyani mijalidu yamampha yaku Yehova ndipuso chilindizga cho wakukupaskani. Ŵanaŵaniyani mo umoyu winu watingi uŵiyengi asani mwenga pa ubwezi wakukho cha ndi Yehova. Mwaviyo, lutirizgani kuja pa ubwezi ndi Chiuta ndipu mungayesanga cha kukalipiya Yehova mumtima mwinu!
[Mafumbu]
[Chithuzi papeji 13]
[Chithuzi papeji 15]
Tikhoza kutimbanyizgika asani tivwisiya vinthu viheni vo anyaki akamba (Wonani pandimi 7)
[Chithuzi papeji 17]
Yoswa ndi Kalebe angutumbikika chifukwa agomezganga Yehova (Wonani pandimi 22
