Smita, * wa ku Dhaka, Bangladesh yo wenga ndi vyaka 35, wayanjanga ŵanthu ndipuso waŵachitiyanga lisungu. Ŵanthu akamba kuti wagwiranga nchitu mwakujipereka ndipu wenga munthukazi wamasangu yo wakhumbanga kovya ŵanthu kuziŵa Chiuta. Smita wangutama mwamabuchibuchi ndipu wangufwa pati pajumpha mazuŵa ngamanavi. Venivi vinguchitiska chitima abali ndi mabwezi ngaki.

James ndi muwolu waki a vyaka va m’ma 30, ŵenga ndi jalidu lamampha nge laku Smita. Mu nyengu ya chipwepwi, anguluta kuchiwona anyawu wo ajanga mumphepeti mwa nyanja kuzambwi kwa United States. Ŵe kweniko anguchita ngozi ya galimotu ndipu angufwiya penipo. Abali ŵawu ndi anyawu a ku nchitu anguchita chitima ukongwa.

Mazuŵa nganu vinthu viheni vichitika peposi ndipu tingachita kufumbiriya cha. Anandi atufwa pa nkhondu limoza ndi asilikali. Ŵanthu ambula kunanga asuzgika chifukwa cha ŵanthu wo aphwanya marangu ndipuso achita viwawa. Matenda ndipuso ngozi zikuluzikulu vichitikiya weyosi mwambula kuphwere vyaka. Asani ngozi zachilengedu zachitika mudera zibaya ŵanthu anandi kwambula kusankha. Kusankhana mtundu kweniso vinthu vambula urunji ve peposi. Panyaki vinthu nge ivi namwi vikukuchitikiyanipu.

Ndichu chifukwa chaki nyengu zinyaki tifumba mafumbu nge yanga:

• Nchifukwa wuli vinthu viheni vichitikiya ŵanthu amampha?

• Kumbi Chiuta ndiyu wachitiska vinthu venivi?

• Kumbi ngozi zachilengedu zichitika ŵaka zija pamwenga ŵanthu ndiwu achitiska?

• Pamwenga nchisambizu cha Karma * cha chisopa cha Chihindu ndi Chibuda?

• Asani kwe Chiuta wanthazizosi, nchifukwa wuli ŵanthu amampha watiŵavikiriya cha kuti aleki kukumana ndi masuzgu?

• Kumbi yiŵengepu nyengu yo ŵanthu azamuleka kusuzgika?

Kuti tisaniyi kwamuka kwa mafumbu yanga, titenere dankha kuziŵa kwamuka kwa mafumbu ngaŵi ngakukhumbika ukongwa ngakuti: Nchifukwa wuli vinthu viheni vichitika, nanga nchinthu wuli cho Chiuta wachitengi?